ფრანსუა ბოზიზე
| ფრანსუა ბოზიზე | ||
 ბოზიზე 2007 წანას | ||
| ცენტრალური აფრიკაშ რესპუბლიკაშ მა-6 პრეზიდენტი | ||
|---|---|---|
| პოსტის გერინაშ ბორჯი | ||
| 15 მელახი, 2003 – 24 მელახი, 2013 | ||
| წიმოხონი | ანჟ ფელიქს პატასე | |
| მონძე | მიშელ ჯოტოდია | |
| პოსტის გერინაშ ბორჯი | ||
| 1979 – 1981 | ||
| დუნაბადი | 14 გჷმათუთა, 1946 მუილა, ფრანგული ეკვატორული აფრიკა (ასეიან გაბონი) | |
| მენოღალობა |  ცენტრალური აფრიკაშ რესპუბლიკა | |
| პოლიტიკური პარტია | ერუანული გოართოიანაფა "კვა ნა კვა" | |
| საქვარუა | ოურდუმე მოღალე, პოლიტიკოსი | |
| ხეშმოჭარუა |  | |
ფრანსუა ბოზიზე იანგუვონდა (დ. 14 გჷმათუთა, 1946) — ცენტრალურ აფრიკალი ოურდუმე მოღალე დო პოლიტიკოსი, ცენტრალური აფრიკაშ რესპუბლიკაშ მა-6 პრეზიდენტი 2003-2013 წანეფს.[1]
ბოზიზე რდჷ ჯარიშკოჩი, ნამუქჷთ შანულამ კარიერულ წჷმოძინეფს მიოჭირინუ 1970-იან წანეფს, ჟან ბედელ ბოკასაშ მართუალაშ ბორჯის. ბოკასაშ გითორაგვაფაშ უკულიან პერიოდის, ბოზიზეს უკებუდჷ შხვადოშხვა პოსტეფი: 1979-1981 წანეფს რდჷ დუდთხილუაშ მინისტრი დო 1981-1982 წანეფს ინფორმაციაშ მინისტრი. ბოზიზე ოკათუდჷ 1982 წანაშ უშედეგე სახენწჷფო გინორთას, ანდრე კოლინგბაშ მეხჷ. ჸათეშ გეშა თის ქიანაქ დატებელქ აჸუ. გეჸვენჯი პრეზიდენტიშ, ანჟ ფელიქს პატასეშ ადმინისტრაციას, ბოზიზეს უკებუდჷ აკოანჯარაფილ ნძალეფიშ შტატიშ უნჩაშიშ პოსტი. 2001 წანას თიქ წიმიჭყჷ ოურდუმე არჸება პატასეშ სააწმარენჯოთ. 2003 წანაშ მელახის, ბოზიზეშ ალმარენჯი ოურდუმე ნძალეფქ ქიდეკინეს ცენტრალური აფრიკაშ რესპუბლიკაშ ნანანოღა ბანგი დო ქუდახუნეს პატასეშ მართუალა. შედეგო ხეშულობა ბოზიზექ ქაშეჸოთჷ ხეშა.[2]
მალას ქიანას ქიდიჭყჷ ომენოღალე ლჷმაქ, ნამუთ 2007 წანაშახ იგინძარებუდჷ. ბოზიზექ ჟირშა (2005, 2011 წანეფს) გემორძგჷ საპრეზიდენტო გიშაგორუეფს. 2012 წანაშ ქირსეთუთას კინ ახალშო ქიდიჭყჷ ომენოღალე ლჷმეფქ. 2013 წანაშ 24 მელახის, ბოზიზექ ცარ ქიდიტუ დო კამერუნშა ინტუ. კამერუნიშ პრეზიდენტიქ, პოლ ბიიაქ თის ოჸურჩე ქიმეჩჷ. 2013 წანაშ 29 მესის, ცარ-შ ახალ თარობაქ თის გეგშუღჷ ჭოფუაშ განჩინება.[3]