ფრანც კაფკა

ვიკიპედიაშე
ფრანც კაფკა

ფრანც კაფკა 1906 წანას
დაბადებაშ თარიღი:

3 კვირკვე, 1883

დაბადებაშ აბანი:

პრაღა

ღურაშ თარიღი:

3 მანგი, 1924

ღურაშ აბანი:

ვენა

საქვარუა:

ჭარუ, ნოველისტი

პერიოდი :

XX ოშწანურა

ფრანც კაფკა (Franz Kafka, დ. 3 კვირკვე, 1883, პრაღა - ღ. 3 მანგი, 1924, ვენა) — XX ოშწანურაშ ართ-ართი დიდი გერმანულნინამი ჭარუ დო ნოველისტი, მიდგაშ ნახანდეფიშ უმენტაშობაშ გჷმობჟინაფაქ ხვალე ავტორიშ ღურაშ უკული მიხუჯინუ. დებადჷ პრაღას აშკენაზი ურიეფიშ ფანიას. თიში უნიკალური ჭარუაშ სტილი ამდღარშახ იკჷნენც კრიტიკოსეფიშ დო მაკითხირალეფიშ გჷშაკერზაფილ თოჸუჯის.

რინა[რედაქტირაფა | წყუშ რედაქტირაფა]

5 წანერი კაფკა.

ფრანც კაფკაქ დებადჷ 1883 წანაშ 3 კვირკვეს ნოღა პრაღას. მუმა – ჰერმან კაფკა (1852–1931) ურიულ ბადებაშ ჩეხი რდჷ. ნანა – იულია კაფკა (1856–1934). ჸუნდჷ ჟირი ჯიმა დო სუმი და. ჟირხოლო ჯიმაქ დოღურჷ თეიშახ, სოიშახ ჭარუ 6 წანერო გჷნირთჷდჷნ. 1889–1893 წანეფც კაფკა გურაფულენდჷ დაჭყაფურ სკოლას (Deutsche Knabenschule), თეშ უკული თიქ გჷნილჷ გიმნაზიაშა, ნამუთ 1901 წანას გაათუ. პრაღაშ უნივერსიტეტიშ თებაშ უკული, კაფკა ეთმეჭოფუნც სამართალიშ დოქტორიშ ხარისხის დო მუშობას იჭყანც სადაზღვიო ფირმას, სოდეთ რინაშ ლიაშახ მუშენდჷ. 1917 წანას კაფკაქ დელახჷ ტუბერკულოზით, მუდგაშ გეშათ 1924 წანაშ 3 მანგის ჭარუქ შური გოტუ ვენაშ სანატორიუმც. რინაშ განწხანც კაფკაქ გჷმაბჟინუ გვალო მუსხირენი თხობელუა. ღურაშ წოხოლე ჭარუქ მუში მაჸალე ჭარუ მაქს ბროდის დუჩინჷ მუში ნაჭარეფიშ აკოსოფუა, მარა მაჸალექ თენა ვაქიმინჷ. დახე არძო ნაჭარაქ გჷმობჟინაფილქ იჸუ ჭარუშ ღურაშ უკული.

გონათუა[რედაქტირაფა | წყუშ რედაქტირაფა]

კაფკაშ ოდაბადური ნინა გერმანული რდჷ, დუდიშულო ღვალენდჷ ჩეხურსჷთ. მოგვიანაფილო ქჷდიგურუ ფრანგული ნინა დო კულტურათ. თიში ურიული გონათუა ალაზჷმაფათ დაღარი რდჷ. დუდშე თინა ბოშეფიშ დაჭყაფურ სკოლას გურაფულენდჷ, ოდო თიში თებაშ უკული მჷშართჷ კლასიკურ გიმნაზიაშა. ფრანცი გოსოფური მოგურაფე რდჷ.

გიმნაზიაშ თებაშ უკული გურაფა აგჷნძორჷ პრაღაშ უნივერსიტეტის ქიმიაშ ფაკულტეტის, მორო ჟირი მარაშა სამართალიშ ფაკულტეტშა გჷნილჷ. თი ბორჯიშო იურისპრუდენცია პრესტიჟულ დო პერსპექტიულ დარგო იკოროცხჷდჷ, წორას ათეშენ ჰერმან კაფკაქ სქუაშ გჷნოჭყვიდირაფათ ბაღინაფილქ ქჷდოსქიდჷ. უნივერსიტეტის გურაფაშ პერიოდის მუმალ ჭარუს ბრელი დუდიშული ბორჯი უღუდჷ, მუდგაქჷთ შარა გოუნწყჷ ქჷდუგურუაფუდჷკო ხელუანობაშ ისტორია. მალას თიქ სტუდენტურ კლუბის ქაკათჷ, ნამუთ ლიტერატურულ ონჯუეფც მანჯჷნდჷნ. მაართა კურსიშ ლიას კაფკაქ აკოხვადჷ მაქს ბროდის, თაშნეშე მუმალ ჭარუს, მიქჷთ მუში უხოლაში მაჸალეთ გჷნირთჷ ჟურნალისტ ფელიქს უელსწკჷმა ართო.

1906 წანაშ 18 მანგის ფრანციქ სამართალიშ დოქტორიშ ხარისხი გეჭოფუ.

ოინალუ[რედაქტირაფა | წყუშ რედაქტირაფა]

1907 წანაშ 1 გერგობათუთას კაფკაქ მუშობა ქჷდიჭყჷ უდიდაშ იტალიურ სადაზღვიო კომპანიას, სოდეთ ედომუშამი რინას მუშენდჷნ. კომპანიას თიში გუნაწია ნაინალას ძალამც აფასენდეს, თაშნეშე დიდ პატის არზენდეს მუჭოთ ინტელექტუალ, ბონი, ჯგირი იუმორიშ მაღვენჯი ადამიერც.

დორხველი რინა[რედაქტირაფა | წყუშ რედაქტირაფა]

ჭარუშ მაართა ჸოროფა, მუჭოთ ბიოგრაფეფშო რე ჩინებულინ, რდჷ მილენა ჯეშენსკა, ჩეხი პროფესორიშ ოსურსქუა. თინაქ ბრუო თუთა მუკორთჷ ფსიქიატრიულ ოლეხეს მუმაშა ფარაშ მეხირუაშენი, ნამუსჷთ უკული მუში ოჸოროფულეფც არზენდჷნ. ოლეხეშე დუდიშ გჷშაღალაშენო თიქ ჩილო მიდაჸუნჷ გერმანულნინამ ურიას ერნსტ პოლაკის. უღულქ ვენას ქჷდიხორჷ. პრობლემეფქ თინეფიშ ართოიანი რინას მალასჷნე გორჩქინდჷ დო ქომონჯიშე მიწოჸოთამილ მილენაქ კოკაინც ქო მიანძალჷ, მორო მალას ქჷმეხვადჷ ნამდა ღულა შარას გერდჷნ დო გეგნოჭყვიდჷ ჟურნალისტობაშა ქჷმუთხუმუდჷკო ხე. 1919 წანას, კაფკაშ მუსხირენი თხობელუაშ (ჭარუქ მუში თელარას ხვალე მუსხირენი თინეფშეიანი გჷმაბჟინუ) კითხირიშ უკული, ქჷმეჭარჷ თის, სოდეთ თინეფიშ ჩეხურო გჷნოთანგუაშ ნებას თხულენდჷ. თე მინაჭარას მაჸუნჷ ინტენსიური მეჭარ-მოჭარუაქ ფრანცი დო მილენა შქას. მორო საბოლათ თინეფიშ მეჭარ-მოჭარუა ვაგაგჷნძორებე, რახან მილენას ვაკოდჷ ქომონჯიშ დათხია დო ვართ კაფკას გჷმურჩქინუ ინიციატივა. მოგვიანაფილო, 1944 წანას, მილენაქ ნაცისტეფიშ ოკონცენტრაციე კარეს დოღურჷ.

1912 წანას კაფკაქ მაქს ბროდიშ ჸუდეს აკოხვადჷ ფელის ბაუერს, ნამუთ ოხორანდჷ ბერლინს დო მუშენდჷ დიქტოფონეფიშ მაწარმებელ კომპანიასჷნ. თინეფც ხუთი წანაშ განწხანც უღუდეს მეჭარ-მოჭარუა, შხირას აკმოხვადუდეს ართიანც დო ქოთ ჟირშა ულამუდეს დაგურგინება, მორო საბოლათ, 1917 წანას, თინეფიშ ართოიანი რინაქ გეთუ. თეშ ბაძაძო ბრელი კაფკაშ უკმაკურ აჩემებეფც დო შქურინეფეც მიოჭარანც, ბრელი რაგადანც თის ხოლო, ნამდა ფრანცის ვაუჸორდჷ ფელისინ, ხვალე ფანიაშ აკოქიმინუა ოკოდჷ, მუამუშიშა ქუძირაფუდჷკო, ნამდა ნორმალური ადამიერი რდჷნ (თის დო მუამუშის ართიანწკჷმა გარკვიებული პრობლემეფი უღუდეს).

ღურა[რედაქტირაფა | წყუშ რედაქტირაფა]

1923 წანას კაფკაქ აკოხვადჷ დორა დიამანტის, ურიული ბადებაშ პოლონარ მართლმადიდებელს. წორას თიწკჷმა მუკიჸონჷ ჭარუქ შურდგჷმაშ ეკონია წარმოწანა. თინეფც ართიანი ძალამც უჸორდეს. უღული ართო ბრელც შარალენდჷ, მორო 1924 წანას თე ჰამო რინა კაფკას ტუბერკულოზიშ გაუფრაშებაქ მიოჭყვიდაფუ. თიქ სანატორიუმშა ინჭუ დორაწკჷმა ართო, მით შურდგჷმაშ ეკონია წუნეფშახ თის ხასჷლას ალუურდჷ. ჭარუქ 40 წანაშ ხანც დოღურჷ.

რესურსეფი ინტერნეტის[რედაქტირაფა | წყუშ რედაქტირაფა]