ფულხენსიო ბატისტა
| ფულხენსიო ბატისტა Fulgencio Batista | ||
 ბატისტა 1938 წანას | ||
| კუბაშ პრეზიდენტი | ||
|---|---|---|
| პოსტის გერინაშ ბორჯი | ||
| 10 მელახი, 1952 – 1 ღურთუთა, 1959 | ||
| წიმოხონი | კარლოს პრიო სოკარასი | |
| მონძე | კარლოს მანუელ პიედრა | |
| პოსტის გერინაშ ბორჯი | ||
| 10 გჷმათუთა, 1940 – 10 გჷმათუთა, 1944 | ||
| წიმოხონი | ფედერიკო ლარედო ბრუ | |
| მონძე | რამონ გრაუ | |
| პოსტის გერინაშ ბორჯი | ||
| 10 მელახი, 1952 – 4 პირელი, 1952 | ||
| წიმოხონი | ოსკარ განსი | |
| მონძე | ხორხე გარსია მონტესი | |
| დუნაბადი | 16 ღურთუთა, 1901 ბანესი, კუბა | |
| ნაღურა | 6 მარაშინათუთა, 1973 (72 წანერი) მარბელია, ესპანეთი | |
| ნთხორუ აბანი | წიმინდე ისიდორეშ სასაფლა, მადრიდი | |
| მენოღალობა | .svg){kind=small} კუბაშ რესპუბლიკა | |
| პოლიტიკური პარტია | დემოკრატიულ-სოციალისტური კოალიცია (1939-1944) კუბაშ ლიბერალური პარტია (1948-1949) ართოიანი ქიმინჯალაშ პარტია (1949-1952) პროგრესული ქიმინჯალაშ პარტია (1952-1959) | |
| ალმასქუ | 1. ელისა გოდინეს გომეს დე ბატისტა 2. მარტა ფერნანდეს მირანდა დე ბატისტა | |
| სქუალეფი | 9 | |
| საქვარუა | ოურდუმე მოღალე, პოლიტიკოსი | |
| რელიგია | კათოლიციზმი | |
ფულხენსიო ბატისტა ი სალდივარი (ესპ. Fulgencio Batista y Zaldívar; დ. 16 ღურთუთა, 1901 — ღ. 6 მარაშინათუთა, 1973) — კუბარი ოურდუმე მოღალე დო პოლიტიკოსი, კუბაშ პრეზიდენტი 1940-1944 წანეფს დო ოურდუმე დიქტატორი 1952-1959 წანეფს.
დებადჷ ღარიბი ფანიას. დიდაქ ადრე დუღურჷ. 14 წანერი რდუნ თეშ ფანია ქიდიტუ დო ზოხორინელო ცხოვრენდჷ. მუშენდჷ შხვადოშხვა პროფესიათ. 1921 წანას ჰავანაშა მიდართჷ დო აკოანჯარაფილი ნძალეფს ქაკათჷ. 1923 წანას არმია ქიმიოტუ, მარა ჟირი წანაშ უკულ კინ დირთჷ. ბატისტაქ მიპალუ შანულამი პოპულარობა არმიაშ დინახალე. 1933 წანაშ ეკენიას ბატისტა ხემანჯღვერენდჷ რევულუციას, ნამუსჷთ სერჟანტეფიშ ჸარაფის უძახჷნა. რევოლუციაშ შედეგო ქუდახუეს კარლოს სესპედესიშ თარობა. ბატისტაქ დუდი აკოანჯარაფილი ნძალეფიშ ხემანჯღვერო გეგმაცხადჷ დო რეალური ხეშულობა მუქ ქაშეჸოთჷ ხეშა. მარიონეტი პოლიტიკოსეფიშ გიმორინაფათ პროცესეფს მუ მართუნდჷ 1940 წანაშახ. თე წანას თიქ გიშაგორილქ იჸუ კუბაშ პრეზიდენტო. ჸათე პოსტი ბატისტას 1944 წანაშახ უკინებუდჷ. ვადაშ თებაშ უკულ ფლორიდაშა გეგნორთჷ ოცხოვრებშა. 1952 წანას თიქ კუბაშა დირთჷ დო მონაწილენდჷ საპრეზიდენტო გიშაგორუეფს, მარა გომორძგუაშ ჭიჭე შანსი უღუდჷ. 1952 წანაშ 10 მელახის, მუში მოხუჯეეფიშ ალარინათ, ბატისტაქ მანწყუ ოურდუმე გინორთა დო გეგთარაგუ კარლოს პრიო სოკარასიშ თარობა.
ბატისტას ხუჯი დუკინჷ ამერიკაქ, ნამუთ ბატისტაშ რეჟიმს ოურდუმე საქმეეფით, თაშნეშე ფინანსურო დო ლოჯისტიკურო ოხვარუდჷ. ბატისტაქ გაუქვჷ 1940 წანას მეღებული კონსტიტუცია დო შანულამო დოკონჩჷ ადამიერიშ ნებეფი დო მენოღალეეფიშ პოლიტიკური დუდიშულობა. ბატისტაქ ქელირინუ დინდარი დო გოლინიანი პლანტატორეფი. ბორჯიშ გოძვენას, კუბაშ შანქარიშ ინდუსტრია დო კაბეტი პლანტაციეფი ამერიკალეფქ ქაშეჸოთეს ხეშა. თაშნეშე, ჸოფიერი დიხეფიშ 70 პროცენტიქ ურცხოალეფიშ დორხველობაშა გეგნორთჷ. ბატისტაქ დეხოლჷ ამერიკული მაფიას, ნამუეფით აკონტროლენდეს ნარკოტიკეფიშ, პროსტიტუციაშ დო ოლაჸაფე ბიზნესის. ამერიკული კომპანიეფს ბატისტაქ ფინანსურო მომგებიანი კონტრაქტეფი გუფორმუ. ბატისტაშ პოლიტიკათ უკმაყოფილე რდეს კუბაშ მახორუეფი, ნამუეფით ფშხირას ონწყუნდეს დემონსტრაციეფს თიში მართუალაშ მეხჷ. საგამათ, ბატისტაქ გამათხოზუ პოლიტიკური ოპონენტეფს, ნაფულა პოლიციაშ გიმორინაფათ ბრელი ოპონენტი ოჭოფუ, ჯიხას ქუდახუნუ დო ბრელი ხოლო ღურათ დასაჯჷ. 1950-იან წანეფიშე კუბას გიფაჩჷ სოციალისტური იდეეფქ დო პოპულარულო გჷნირთჷ. ბატისტა ძალამს ოცადუდჷ ოპოზიციაშ დოდაღარაფას დო მოჯალაგუას, მარა უშედეგეთ. პროტესტიქ ხოლო უმოსო ქიმიძინჷ დო გენძალიერჷ. აწმარენჯობაშ ხიორს ეფექტურო ხემანჯღვერენდეს 26 კვირკვეშ ყარაფიშ დუმარსხუაფალეფი ფიდელ კასტრო დო ერნესტო ჩე გევარა. თინეფი ირინუანდეს მუჭოთ ოთინჩალე მეთოდეფს თაშნეშე პარტიზანული ტაქტიკას. 1958 წანაშ ქირსეთუთას მოხვადჷ გინმაჭყვადალი ლჷმაქ რევოლუციონერეფს დო ბატისტაშ ნძალეფს შქას (სანტა-კლარაშ ლჷმა). ბატისტაქ დემარცხჷ. 1959 წანაშ 1 ღურთუთას თიქ გინორინაშ გეშა ოფიციალურო გეგმაცხადჷ დო კუბაშე ინტუ. თიქ დიო დომინიკარეფიშ რესპუბლიკაშა მიდართჷ დო უკულ პორტუგალიაშა. რინაშ ეკონია პერიოდის ესპანეთის ცხოვრენდჷ, სოდეთ დოღურჷ 1973 წანაშ 6 მარაშინათუთას, 72 წანერქ. დასაფულებური რე მადრიდიშ წიმინდე ისიდორეშ სასაფლას.