ჩიკაგო
ჩიკაგო (თაშნეშე ჩინებული რე მუჭოთ "მაჟირა ნოღა" ვარა "ბორიაშ ნოღა", პოტავატომიშ ტომიშ ინდიალეფი, ნამუეფით თე აბანს ოხორანდეს ჩეკანამეფიშ ახალმახორუეფიშ მუკორჩქინშახ თე აბანს "ჩეეკაგუ"-ს უძახჷდეს) - მახორობათ მასუმა უდიდაშ ნოღა ააშ-ს ნიუ-იორკიშ დო ლოს-ანჟელესიშ უკული. ჩიკაგო იდვალუაფუ შქა-ბჟადალიშ შტატ ილინოისის მიჩიგანიშ ტობაშ ობჟათე-ბჟადალ ოძგაშეშ მანგას. გალენსაგანოეფიშ დო გოხოლუას გოდვალირი ქაუნთეფიშ მეკოროცხილო ჩიკაგოლენდიშ დიდი მეტროპოლია 10 მილიონშახ მახორუს ეთმეკოროცხჷნს.
1833 წანას დორცხუაფილ მორჩილ სათანჯო ოხორექ ოლდ-ნორზვესტიშე ნოღაშა გინირდჷ დო გევითარჷ მოსოფელიშ ართ-ართ მადუდე მეტროპოლიათ დო ამდღა ჩიკაგო მოსოფელს "ალფა" (არძაშე ჟინჯირამი) ნოღეფიშ ვითურს რე. ჩიკაგო რდჷ აბანი, სოდგათ მოსოფელს მაართა ცაშმადგუქ იკიდჷ დო ამდღანერშო თინა შქაბჟადალუშ ფინანსური, ოტრანსპორტე დო კულტურული ნანანოღა რე. ნოღა თაშნეშიშე ჩინებული რე თიში ეთნიკური ანდაფერუანალათ. ჩიკაგოშ ცაშმადგუეფი, აბანური საბზადი, პოლიტიკური ტრადიციეფი დო სპროტული ბუნეფი თიში არძაშე ჩინებული სიმბოლოეფი რე.