ხოსე მუხიკა
| ხოსე მუხიკა José Mujica | ||
 მუხიკა 2011 წანას | ||
| ურუგვაიშ მა-40 პრეზიდენტი | ||
|---|---|---|
| პოსტის გერინაშ ბორჯი | ||
| 1 მელახი, 2010 – 1 მელახი, 2015 | ||
| წიმოხონი | ტაბარე ვასკესი | |
| მონძე | ტაბარე ვასკესი | |
| დუნაბადი | 20 მესი, 1935 მონტევიდეო, ურუგვაი | |
| ნაღურა | 13 მესი, 2025 (89 წანერი) მონტევიდეო, ურუგვაი | |
| მენოღალობა |  ურუგვაი | |
| პოლიტიკური პარტია | ტუპამაროსი (1966-1972) ფართე ფრონტი ერუანული მაკათურობაშ ჸარაფი (1989 წანაშე) | |
| ალმასქუ | ლუსია ტოპოლანსკი | |
| სქუალეფი | ვაჸუნდჷ | |
| საქვარუა | პოლიტიკოსი, ფერმერი | |
| ხეშმოჭარუა |  | |
ხოსე ალბერტო „პეპე“ მუხიკა კორდანო (ესპ. José Alberto Mujica Cordano; დ. 20 მესი, 1935 — ღ. 13 მესი, 2025) — ურაგვაალი პოლიტიკოსი, რევოლუციონერი დო ფერმერი, ურუგვაიშ პრეზიდენტი 2010-2015 წანეფს.
მუხიკა 1960-იან წანეფიშე ოკათუდჷ რევოლუციური ორგანიზაცია ტუპამაროსის. ორგანიზაცია ლჷმენდჷ რეპრესიული მართუალაშ მეხჷ. რევოლუციური აქტივიზმიშ გეშა მუხიკა ბრელშა რდჷ ჭოფილი. 1971 წანას თინა გასამართეს, პოლიციარიშ ჸვილუა ქეკადვეს დო ჯიხას ქუდახუნეს. მარა ჯიხაშე ინტუ. უკულ კინ ოჭოფეს. მუხიკა ჯიხას 14 წანაშ გოძვენას ხედჷ. ჸათე პერიოდის თის კონწარო ოქცუდეს დო აწამენდეს. 1985 წანას, მუხიკა დო შხვა პოლიტიკური პატიმარეფი გადუდიშულეს. უკულიანი ბორჯის, ტუპამაროსიშ მაკათურეფქ აკიართიანეს მეკვარჩხანე ფართე ფრონტიშ წჷმმარინაფალეფიწკჷმა დო გაჭყეს ლეგალური პოლიტიკური პარტია ერუანული მაკათურობაშ ჸარაფი. ახალდუნარსხუა პარტიაშ დინახალე მუსიკაქ შანულამი პოპულარობა მიპალუ დო თიში ართ-ართი ლიდერი გინირთჷ.
1995 წანას მუხიკაქ გიშაგორილქ იჸუ ურუგვაიშ წჷმმარინაფალეფიშ პალატაშ მაკათურო დო 2000 წანას ურუგვაიშ სენატიშ მაკათურო. ტაბარე ვასკესიშ ადმინისტრაციას, 2005-2008 წანეფს მუხიკას უკინებუდჷ ოფუტეშ მეურნობაშ მინისტრიშ პოსტი. 2009 წანას, ფართე ფრონტიშ კოალიციაქ მუხიკა ქჷმწარინუ პრეზიდენტობაშ კანდიდატო. 2009 წანაშ საპრეზიდენტო გიშაგორუეფიშ მაჟირა ტურს მუხიკაქ დამარცხჷ ურუგვაიშ ჸოფილი პრეზიდენტი ლუის ალბერტო ლაკალე.
მუხიკაშ მართუალაშ ბორჯის, ურუგვაიქ შანულამი ეკონომიკური წჷმოძინეფს მიოჭირინუ. მიძინჷ ქიანაშ ედპ-ქ, დერკჷ უმუშელობაქ, ქიმიძინჷ მინიმალური ხეშქირაქ. მუხიკაშ ადმინისტრაციაქ მანჯჷ შხვადოშხვა პროგრესული რეფორმეფი: აბორტიშ დეკრიმინალიზაცია, მარიხუანაშ ლეგალიზაცია, ართ სქესიანი კათაშ გურგინუაშ ლეგალიზაცია დო შხვა.
მუხიკას ფშხირას მიშინუანდეს მუჭოთ მოსოფელიშ არძაშე უმოს ღარიბი პრეზიდენტის. თინა მუში ხეშქირათ ღარიბეფს დო მორჩილი მეწარმეეფს ოხვარუდჷ. ვარია თქუ ოფიციალური რეზიდენციას ხორინიშ გეშა დო მუში მორჩილი ჸუდეს ოხორანდჷ, მონტევიდეოშ გალეგანობას. მუხიკა რდჷ კაპიტალიზმიშ კონწარი კრიტიკოსი.