ჯან ძინშენი

ათე სტატიას, ჩინურ ჯოხო დო გვარს, გვარ რე ჯან.

ჯან ძინშენი
张竞生
ჯან ძინშენი 1920-იან წანეფს
ჯოხო დაბადება შვანს	ჯან ძიანლიუ
ბიოგრაფიული ჩინებეფი
დაბადებაშ თარიღი	20 ფურთუთა, 1888
დაბადებაშ აბანი	რაოპინიშ აკანი, გუანდუნი, ჩინეთიშ იმპერია
ღურაშ თარიღი	18 მანგი, 1970 (82 წანერი)
ღურაშ აბანი	ჩინეთიშ ოკათე რესპუბლიკა
საქვარუა:	ფილოსოფოსი, სექსოლოგი
მენოღალობა	ჩინეთი ჩინეთი
ერუანობა	ჩინარი
ალმასქუ	ჰუან გუანანი (გ. 1935)

ჯან ძინშენი (ჩინ. 张竞生, ინგლ. Zhang Jingsheng; დაბადებაშ ჯოხო ჯან ძიანლიუ, ჩინ. 张江流; დ. 20 ფურთუთა, 1888 — ღ. 18 მანგი, 1970) — ჩინარ ფილოსოფოს დო სექსოლოგი. თიქ დებადჷ ვაჭარეფიშ ფანიას, ბჟაეიოლ გუანდუნს. თინა რდჷ ტუნმენხოიშ რევოლუციონარეფიშ აქტიურ ალმარენჯი. პეკინიშ უნივერსიტეტის გურაფაშ ბორჯის, ჯანქ სოციალურ დარვინიზმიშ, მენცარულ რასიზმიშ დო ევგენიკაშ ევროპულ იდეეფიშ ფანატიკურ პროპაგანდისტო გინირთჷ. წორეთ თე ბორჯის ითირუ თიქ მუშ ჯოხო „ძინშენით“, მუთ მარგალურო „გინოსქილადაშო ლჷმას“ (გადარჩენისთვის ბრძოლა / competition for survival) შანენს.

1911 წანაშ რევოლუციაშ უკული, ჯანქ ოგურაფუშა საფრანგეთშა გეგნორთჷ დო 1919 წანას ფილოსოფიაშ დოქტორიშ ხარისხ გეჭოფჷ ლიონიშ უნივერსიტეტის. 1920 წანას ჩინეთშა დორთაშ უკული, თინა პეკინიშ უნივერსიტეტიშ პროფესორ რდჷ დო გჷმაბჟინუ ჟირ წინგი, ნამუეფჷთ ესთეტიკაშ მუკი-მუკი ეგაფილ უტოპიურ ჯარალუაშ იდეას არზენდჷ ხუჯის.

1926 წანას თიქ გჷმაბჟინუ სექსოლოგიურ ტექსტი — „სექსიშ ისტორიეფი“ (Sex Histories), ნამუქჷთ უკაბეტაშ სკანდალ გჷმიჭანუ. თე ნახანდიშ გეშა ჩინურ მედიაქ დო აკადემიურ წირეეფქ თინა გეძიცაშ ობიექტო გინაშქვეს დო ტაბლოიდეფქ ქიგიოდვეს გიოძიცალ მეტჯოხო — „დოქტორი სექსი“ (Dr. Sex; 性博士). შანულამ აკადემიურ დო რეპუტაციულ მოჯალაგუაშ უკული, ჯანქ შანხაის უმწუძინუო ქეშეცადჷ წინგეფიშ მაღაზიაშ გონწყჷმას, მოგვიანეთ მუშ ოდაბადეშა დირთჷ დო მითინწკუმა კონტაქტშა ვემშმეშუნ თეშ აგჷნძორენდუ რინას. ჩინეთიშ კულტურულ რევოლუციაშ ბორჯის თინას რედგვარდიალეფქ (ჭითა გვარდიალეფქ) თხოზინ ქუდუჭყეს დო 1970 წანას, გინოხორაფას (ხვილიშუას) დოღურჷ.

ბიოგრაფია

ორდოიან წანეფ დო გონათუა

ახალნორდ ჯან ძინშენი (თი ბორჯის ჯან ძიანლიუ), 1906 წანაშ გოხოლუას

ჯან ძინშენიქ დებადჷ 1888 წანაშ 20 ფურთუთას, რაოპინიშ აკანს, გუანდუნიშ პროვინციას. თიშ ორიგინალურ ჯოხო რდჷ ჯან ძიანლიუ (张江流). თინა გურაფულენდჷ უამპოაშ ოურდუმე დაჭყაფურ სკოლას, სოდეთ ჩინეთიშ იმპერიულ დინასტიაშ აწმარენჯ ტუნმენხოიშ რევოლუციონარეფიშ იდეეფს ქეკათხოზჷ. სკოლაშე გიშაჸოთამაშ უკული, ჯანქ შეხვადჷ ტუნმენხოიშ ლიდერს სუნ იატსენს დო მალას პეკინიშ იმპერიულ უნივერსიტეტის ქენირიცხჷ.

პეკინს გურაფაშ ბორჯის, ჯანქ ხოლოს გეჩინებაფუ ევროპულ სოციალურ დარვინიზმიშ იდეეფ დო თიშ აქტიურ პროპაგანდისტო გინირთჷ. ათე ბორჯის თიქ მუშ დუდს ჯოხო დჷთირუ დო „ძინშენი“ ქიგიდჷ. საფრანგეთშა ულაშ უკული, თიქ გურაფა დიო პარიზიშ უნივერსიტეტის გაგჷნძორჷ, სოდეთ 1914 წანას ფილოსოფიაშ დიპლომ გეჭოფჷ, 1919 წანას ლიონიშ უნივერსიტეტის დოქტორიშ ხარისხ დოთხილჷ თემაშე ჟან-ჟაკ რუსოშ გეშა, ნამუთ თიშ ართ-ართ თარ ფილოსოფიურ ინსპირაცია რდჷ.

აკადემიურ კარიერა დო სკანდალურ „სექსიშ ისტორიეფი“

ჯან ძინშენიშ დოქტორიშ დიპლომ ლიონიშ უნივერსიტეტშე, 1919 წანა

ჩაი იუანპეიშ რეკომენდაციათ, 1920 წანას ჯანქ პეკინიშ უნივერსიტეტის პროფესორიშ პოსტ ქიდეკინჷ. თიშ პოლიტიკურ დო ფილოსოფიურ ნახანდეფს ეჭარილ რდჷ უტოპიურ „ახალ ჩინეთი“, ნამუთ ესთეტიკაშა დო სენტიმენტალურალაშა იჸუაფუდჷ გერსხილი. მუშ უტოპიას ჯანი ერუანულ ევგენიკაშ პროგრამაშ მიშაღალას თხულენდჷ, ნამუსჷთ თიშ არზით, ჩინარ რასაშ სიდაღარეეფ დო კილეფ ოკო გეგშუთინუდჷკო. თინა სერიოზულო რდჷ ხვამილაფირ მენცარულ რასიზმიშ თეორიეფით.

1926 წანას, ჯანქ გჷმაბჟინუ სექსოლოგიურ კათელ „სექსიშ ისტორიეფი“ (Sex Histories). წინგის დეტალურო რდჷ გოსხუნილ მუსხირენ ადამიერიშ სექსუალურ გჷმოცადაფა, ნამუთ ჯანქ ოჯარალუე გჷმოკითხირიშ ოსხირშა შაყარუ. წინგის უკაბეტაშ კომერციულ წჷმოძინა უღუდჷ, მარა თის ხოლო უმოს კაბეტ დო მუმაჯილიკარ სკანდალქ ქუმაჸუნჷ ჩინეთიშ კონსერვატიულ ჯარალუას. მედიაქ დო პრესაქ ჯანს გეძიცაშ ღანკით „დოქტორი სექსი“ (Dr. Sex) გიოდვეს. წინგიშ კაბეტ პოპულარალაქ მიარე უალობე პორნოგრაფიულ გოგჷნძორაფაშ გიშაშქუმალა გჷმიჭანუ შხვა ავტორეფშე. თიშენ ნამჷ-და, გოგჷნძორაფეფსჷთ ჯან ძინშენიშ ჯოხო გეჭარუდჷნ, კათაქ ებორჯჷ, გურქ ვა გაჩინეს ნანდულო ნამუ რდჷ ჯანიშ ორიგინალურ ნახანდ დო ნამუ ვარინ.

ეკონია წანეფ დო გოჭყოლიდაფა

თე სკანდალქ ჯანიშ პროფესიულ დო აკადემიურ რეპუტაცია ედომუშამო მოჯალაგუ. კრიტიკაშ გეშა თიქ აკადემიურ სფერო ქჷდიტუ დო შანხაის „სისქვამეშ წინგეფიშ მაღაზია“ (Beauty Bookshop) გონწყჷ, სოდეთ სექსუალურ გონათუაშ ტექსტეფს დო ევროპულ ლიტერატურაშ ნათანგეფს გიშმაშქვანდჷ. მოგვიანაფილო, თიქ ოდაბადეშა დირთჷ დო გოჭყოლიდაფას დო უჩინებუობას აგჷნძორენდჷ რინას.

ჩინეთიშ კულტურულ რევოლუციაშ ბორჯის, ჯან ძინშენ მუჭოთ „ბურჟუაზიულ“ დო „დეკადენტურ“ მოაზირე, მაოისტურ ხეშუულებაქ დო რედგვარდიალეფქ კონწარ თხოზინიშ თუდო ქიგიორინეს. თიქ ღურჷ 1970 წანაშ 18 მანგის, ხვილიშუას. კვაჭილ დო სკანდალურ რინაშ უმკუჯინალუო, თიში ღურაშ უკულიან პერიოდის თიშ ნახანდეფიშ აკადემიურ ფასებაქ რადიკალურო დითირჷ დო ედომუშამ გოუქვაფაშე — მაღალ, პოზიტიურ ფასებაშა გეიკინჷ.

ქოძირით თაშნეშე

• სექსოლოგია
• ჩინეთიშ კულტურულ რევოლუცია

რესურსეფ ინტერნეტის

• ინგლისურ ვიკიპედიაშ ორიგინალ სტატია (Zhang Jingsheng)