მემედ აბაშიძე
მემედ იბრაჰიმიშ სქი აბაშიძე, მემედ-ბეგი (დ. 1873, ბათუმი — ღ. 1937) — ქორთუ ოჯარალუე მოღალე, ჭარუ, პუბლიცისტი. სანჯაყ-ბეგ აბაშიძეეფიშ გამნარყი. სტალინური რეპრესიეფიშ გეშა ღურჷ 1937 წანას.
დოჭყაფური განათება მიღჷ ქორთუეფს შქას ჭარუა-კითხირიშ გჷმაფაჩალი ჯარალუაშ ბათუმიშ სკოლას. მუმაშ დუდალათ ქიდიგურუ არაბული, სპარსული დო თურქული ნინეფი. ომოღალე ასპარეზიშა გუშართჷ XX ოშწანურაშ დაჭყაფუს. სისტემატურო ბეშტანდჷ პუბლიცისტურ ჭარილეფს ქორთულ პრესას. აქტიურო მუშენდჷ მუსულმან ქორთუეფს შქას ერუანული იდენტობაშ მოძინაშო დო საქორთუოშ ართიანობაშო, მუშ გეშათ მუსხირენშა რდჷ ჭოფილი დო გინოხორაფილი. 1917 წანას დირთჷ ბათუმშა. დუდენდჷ ქორთუ მუსლიმანეფიშ ოჩეჟმოქიმინჯე ჯარალუას. 1918 წანას პროტესტით აუხვადჷ აჭარაშა მუშულირ თურქეფს, მუშ გეშათ ოჭოფეს დო ტრაპიზონიშ ჯიხას ქიმთახუნუეს. ჯიხაშე ირტჷ, ქუმორთჷ ქართშა დო დუდშა ქინუდირთჷ „სამუსულმანო საქორთუოშ გჷმადუდიშულაფარ კომიტეტის“. 1919—1921 წანეფს რედაქტორენდჷ გაზეთ „ომუსულმანე საქორთუოს“ („სამუსლიმანო საქართველო“). მაკათური რდჷ აჭარას სხუნუეფიშ ხეშუულებაშ გენწყუალაშო ეტახილ ლჷმას. რდჷ ოოლქე რევკომიშ მაკათური, საქვარენდჷ შხვადოშხვა ოგამამინჯალე პოსტეფს. ქართულო გინოთანგჷ ომარ ხაიამიშ, ნამიქ ქემალიშ ნაჭარეფი. რე მუსხირენი თხობელუაშ ავტორი.
ლიტერატურა[რედაქტირაფა | წყუშ რედაქტირაფა]
- გერსამია ს., მემედ აბაშიძე. ბიოგრაფიული ნარკვევი, ბათ., 1960;