მენცარობეფიშ ერუანული აკადემია
მენცარობეფიშ ერუანული აკადემია (ინგლ. National Academy of Sciences) რე ამერიკაშ მენცარული, ვათარობული ორგანიზაცია, ნამუქჷთ დირსხუ 1863 წანაშ 3 მელახის, ააშ-იშ პრეზიდენტიშ აბრაამ ლინკოლნიშ ხეშმოჭარილი ინკოროპრაციაშ აქტით. აკადემიაშ მაართა პრეზიდენტი რდჷ ამერიკალი ფიზიკოსი ალექსანდერ დალას ბეიჩი. მენცარობეფიშ ერუანული აკადემია ამერიკაშ მენცარობეფიშ, ინჟინერიაშ დო მედიცინაშ ერუანული აკადემიეფიშე ართ-ართი რე, ინჟინერიაშ ერუანული აკადემია დო მედიცინაშ ერუანული აკადემიაწკჷმა ართო. აკადემია ირ წანას ღებულენს ახალ მაკათურეფს. აკადემიაშ მაკათურობა დიდი პრესტიჟი რე. 2016 წანაშ მუნაჩემეფით აკადემიას ჸუნს 2,350 მაკათური დო 450 საირქიანო მაკათური. მენცარობეფიშ ერუანული აკადემიაშ 190 მაკათურქ მიპალუ ნობელიშ პრემია მენცარობაშ შხვადოშხვა დარგეფს. მენცარობეფიშ ერუანული აკადემიაშ არძაშე უმოსო პრესტიჟული ჯილდოეფი დო პრემიეფი რე: ჯონ კარტიშ პრემია, ჰენრი დრეიპერიშ მენდალი, ლოურენს სმიტიშ მენდალი, გილბერტ მორგან სმიტიშ მენდალი, ზელმან ვაკსმანიშ პრემია, ალექსანდერ აგასისიშ მენდალი, სტენლი მილერიშ მენდალი, კომსტოკიშ პრემია დო შხვა. მენცარეფიშ ერუანული აკადემიაშ შტაბ-ბინა იდვალუაფჷ ნოღა ვაშინგტონს.
გიშარჩქინელი მაკათურეფი[რედაქტირაფა | წყუშ რედაქტირაფა]
- 1873, ედუარდ ჩარლზ პიკერინგი (1846–1919) რდჷ აკადემიაშ არძოშე ახალგაზრდა მაკათური
- 1924, ფლორენს რენა საბინი (1871–1953) რდჷ მაართა ოსური მაკათური
- 1965, დევიდ ბლექველი (1919–2010) რდჷ მაართა აფრიკალი-ამერიკალი მაკათური
- 2013, ბენ ბარესი (1954-2017) რდჷ აკადემიაშ მაართა ტრანსგენდერი მაკათური
რესურსეფი ინტერნეტის[რედაქტირაფა | წყუშ რედაქტირაფა]
