ჯასტინ ბიბერი

ჯასტინ ბიბერი
ჯასტინ ბიბერი 2011 წანას
ბიოგრაფია
თახმი ჯოხო	ჯასტინ დრიუ ბიბერი
დებადჷ	1 მელახი, 1994 (ასაკი 17)
ბადებაშ აბანი	სტრეტფორდი ონტარიო, კანადა
ჟანრი/ეფი	პოპ მუსიკა, თეხანური რ’ნ’ბ
საქვარუა/ეფი	მაბირე, ბირაშ ავტორი, მუსიკოსი
ინსტრუმენტი/ეფი	ვოკალი, გიტარა, ფორტეპიანო, პერკუსია
აქტიური	2009 - ამდღარშახ
ლეიბლი/ეფი	Island, RBMG
ასოციაციეფი	აშერი
ვებხასჷლა	justinbiebermusic.com

ჯასტინ დრიუ ბიბერი (ინგლ. Justin Drew Bieber) (IPA: [ˈbiːbər])- (დ. 1 მელახი, 1994) რე კანადარი პოპ/რ’ნ’ბ მაბირე. თიში კარიერაქ დიჭყუ Youtube–ით, მუჟამსით 2007 წანაშე თიქ დიჭყუ დორხველი ვიდეოეფიშ Youtube-ის გიმობჟინაფა. თინა მოგვიანაფილო მიოგორუ სკუტერ ბრაუნქ, ნამუქუთ ალაჩამა კითხუ აშერს, სოიშახ ბიბერიქ ხე მაჭარუ „Island Records“-წკუმა. ოგურიწყულე რე, ნამუდა ბიბერიქ მუშით დიგურუ პიანინოშ, დოლიშ, გიტარაში დო ოჸეშ მეგამა.

ბიოგრაფია

ჯასტინ ბიბერიქ 1994 წანაშ 1 მელახის სტრეტფორდის, კანადაშ პროვინცია ონტარიოს დებადუ. მუსიკალური მუნაჩამეფი ჯასტინს მასქერეფშე ქაუნუ: მუმა, ჯერემი ბიბერი, გიტარაშ მეგამას აფუდუ ხვამილაფირი, დო დიდა, პეტი მალეტე, ნამუსით თეშ წოხოლე ჟურნალი „ფლეიბოიქ“ ტარკალე ფოტოსესიაშ მონწყუალაშენ ობაღინაფალო საინტერესო ჰონორარი მიარზუ, ართ ჟამს მენდიშმუმაჩამალი ვოკალისტო იკოროცხუდ. რთული დაჯერებელი რე, ნამუდა ბირათი ჯასტინი გვალო მუზმარენ წანარე დეინტერესუ, თით უმოსო, ნამუდა 2 წანაშე თინა ინტერესის გიმირჩქინუანდუ შხვადოშხვა მუსიკალური ინსტრუმენტიშ, გჷშაკერძაფილო – გიოშკუმალარი ინსტრუმენტეფიშ გეზათ. ბაღამობას ჯასტინი მუსიკაშ გაკვეთილეფშა გილეშუ დო თეჟამს მუს პროფესიონალური დონეშა შეულებუ მეგამა გიოშკუმალარი, სიმეფამი დო კლავიშეფამ ინსტრუმენტეფს. 12 წანერი ჯასტინქ მაკათურობა ქიმიღუ აბანური ვოკალური კონკურსის „სტრეტფორდ აიდოლი“ დო, თიშ უმკუჯინუო, ნამუდა თიში კონკურენტეფი კონკურსიშახ სერიოზულო რდეს დაკებული მუსიკათ, დო ჯასტინი ხვალე დიდაშ თოჸუჯიშ თუდო, ჸუდეს იბირდუ, თიქ მაჟირა აბანიშ დაკება ქუმახერხუ. თიმ ჟამს ახალი გონწყუმილი რდჷ მუსიკალური პორტალი „Youtube“, სოდგათ შხვადოშხვა კატეგორიაშ ვიდეოფაილეფიშ დოდვალა შილებედუ. წორეთ თე საიტის ქიგედუ ჯასტინიშ დიდაქ ჸუდეს გინოღალირი მუსხირენი ომოჸოროფული მუსიკალური რგოლი. თე რგოლეფს ძალამაი მალას გურჩქინდუ თაყვანისმცემელეფიშ ედომუშამი არმიაქ, ნამუეფუთ დიო ხოლო 2007 წანას ანტკიცენდეს, ნამუდა ჯასტინ ბიბერი საგებიო დონეშ მურიცხო გინირთუდუ.

კარიერა

წორეთ „Youtube-შე“ დეინტერსუ მენეჯერი სკუტერ ბრაუნქ ჯასტინით დო ინტერნეტიშ მეშქაშალათ ბიბერეფიშ ფანიას დეკავშირჷ დო წოროხანდაფა მიარზუ. თიმ წანას ჯასტინქ ბრაუნწკუმა ართო ატლანტაშა მიდართუ, სოდგათ ჩინაფილ რეპერი დო პროდიუსერი აშერი გეჩინებაფუ. თიშ უმკუჯინუო, ნამუდა ჯასტინი აშერწკუმა შიოხვამილაფაშ ჟამს 13 წანერი რდჷნ, მურიცხიქ ქიდეჯერუ თიში ნიჭი დო აღფრთოვანებულქ ქუდოსკიდუ თიში ვოკალური ქანცით. აშერწკუმა ართო ჯასტინქ „Island Records-შა“ ქიმერთუ, სოდგათ თის მურჩქილუეს დო 2008 წანას მაართა ოფიციალური კონტრაქტი გუფორმეს. საინტერესო რე, ნამუდა კონტრაქტიშ მეჯინათ, ჯასტინს მუშით ოკო გინუჭყვადუდუკო, მიწკუმა უსხუნუდუ წოროხანდაფა, – აშერწკუმმა დო ვარი ჯასტინ ტიმბერლეიკწკუმა. ოეკონიეთ ჯასტინქ აშერწკუმა წოროხანდაფა გეიშაგორუ დო მუჭოთ მუსიკალური ექსპერტეფი ჭარუნა, თიქ თინი გიშგორუა ქიმინუ. თიმ წანას ჯასტინ ბიბერი ააშ–იშ არძაშე უმოსო მენდიშმუმაჩამალი პოპ-შემრსულებელო მირჩქინეს, დო საგებიოს თის „Teen Singing Sensation“-ს ანუ „თინეიჯერი მაბირე სენსაციას“ უძახუნა.

2009 წანას ჯასტინ ბიბერქ მაართა სინგლი – „One Time“ გიმაშკუ, მუქუთ უნელო გინირთუ საგებიო დონეშ ჰიტო. თიში ვანორმალური ფანი-ცირეფი ქოთ ჩხუპენდეს მუსიკალური მაღაზიეფს, თიშენ ნამუდა ქუჭიშუაფუდესკონ ართიანშა სინგლიშ ჸიდირი, მუქუთ გჷშაშკუმალაშე დეფიციტურო გინირთუ. გიმოშკუმალაშე 2 მარაშა სინგლიქ მა-12 აბანი დეკინუ „კანადაშ ჩხე პოპ-ოშარს“, დო მაართა ალბომი, ჯოხოდვალათ „My World“, ჯასტინ ბიბერქ 2009 წანაშ დამორჩილს გიმაშკუ. ალბომქ მალას მიშუ პოპულარაფა თინეიჯერეფიშ შქას, დო კლიპეფქ ბირეფშე „One Time“ დო „One Less Lonelygirl“, „ემტივიშ“ ჰიტ-აღლუმეფი ქჷდეკინეს.

2010 წანაშ მელახის გიშართუ ჯასტინ ბიბერიშ მაართა ალბომიშ ედოუშამი ვერსიაქ – „My World 2.0“. ალბომიშ გიშულას წოხოლე ომძღუდუ სინგლიში დო კლიპიშ – „Baby-შ“ გიშულა, ნამუეფქუთ, შილებე ირაგადინასინ, აფეთქუ მუსიკალური ჰიტ-აღლუმეფი. კლიპი თიზმა პოპულარულო გინირთუ, ნამუდა ხვალე „Youtube-ის“ თინა 250 მილიონი ადამიერქ ქოძირუ, მუდგათ საიტიშ რეკორდი ქუდარცხუ დო წოხოლენ რეკორდიშ მაღვენჯი – ლეიდი გაგა შანულამო ქაწიტუ უკახალე. ოშინალი რე, ნამუდა ჯასტინ ბიბერიქ გინირთუ მაართა პოპ-შემრსულებელო, ნამუშ ართჟამო შკვითხოლო ბირაქ ამერიკაშ არძაშე პრესტიჟულ ჩარტის – „ბილბორდ ტოპ 100-ის“ ქუმოხვადუ.

ჯასტინ რე არძაშე ჭიჭე მურიცხი, ნამუშ გეშათ ხანტუშური ფილმის გინიღანა. ფილმიშ რეჟისორი, ჯონ ჩუა რე, ნამუთ ავტორიე პოპულარული ფილმეფიშ „ბიჯგი წოხოლე 2: შოშეეფი“ დო „ბიჯგი წოხოლე 3D“-შ. ფილმიშ გინოღალეფი ჯასტინიშ კონცერტეფიშ ჟამს, კულისებს დო სცენას მეურსუ. ვარაუდენა, ნამუდა ფილმი, ჯასტინიშ ალბომეფიშ ნერო, წჷმოძინელი იჸუაფუ. შხვეფ შქას, ჯასტინიშ ჰობი ფილმეფიშ ჯინა რე დო თიში არძაშე უმოსი მოწნებული ფილმეფიე: „მარუო მილი“ დო „ეშმაკიშ გჷშარაჸუა ემილი როუზიშე“. თეშ მეტი, დუდიშული ჟამს ჯასტინს უჸორს ბურთუაშ, გოლფიშ, ჰოკეიშ ლაჸაფი, სკეიტბორდით სიონტინი დო ფანეფწკუმა ურთიართალა „Facebook-იშ“ დო „Twitter-იშ“ მოხვარათ.

მუსიკაშ გალე, ჯასტინ ბიბერიშ ჯოხო კოსმეტიკური მეშქაშალას დო შურსანთხოეფსჷთ ორცხუ. კერძოთ, 2011 წანაშ მელახის გიმაჩამალო გიშმურს ოსურეფიშო მერჩქინელი შურსანთხო მუდგაშ გოჭყაფას ჯასტინსით აფუ კათაფი ეჭოფილი, ოდო თიმ წანასჷთ ზარხულს გიმაჩამალო გიშურს ბირცხეფიშ ლაკი, მუდგასჷთ ჯასტინიშ კომპოზიციეფიშ ჯოხოეფი გეძუ.

2011 წანაშ 14 ფრევალს გიშურს ფილმი ჯასტინიშ კათაფათ ჯასტინ ბიბერი: დღას ვა თქუა დღას. თინა ეთმოსახუნს მაბირეფიშ რინას, ქარანუას, ჰობის. თაშნეშიშე ფილმის მაჯინე ძირუნს თიში კონცერტეფიშ ნოჭყვედეფს.

დისკოგრაფია

• My World 2.0 (2010)

რესურსეფი ინტერნეტის

• ჯასტინიშ არხი საიტის YouTube
• ჯასტინიშ დღაური საიტის Twitter