პიჩვანი

ვიკიპედიაშე

პიჩვანი თაშნეშე პიჩუა, ხონება — კანკალე რელიგიაშით გოთნჯილი ბორჯის ირნერი ვარდა ზოხოიანი ოჭკომალიშ (გიშაკერზაფილო ხორციშ, ჩხომიშ, ბჟაშ პროდუქტეფიშ), თაშნეშე ვაოპიჩუე ფირქეფიშ მეღებაშ ვაშინერება.

ვაოპიჩუე ფირქეფი — მუჭოთ წესი, რე ფირქეფი, ნამუთ იკათუანს თიჯგურა გინაფეფიშ აღქმას, ნამუთ ვაშინერებული რე პიჩვანიშ პერიოდის. სამანგ: ვეშილებე ქომოლკოჩიქ იფირქას ოსურშე, ნამუთ რინას არძაშე უმოსო უჸორსჷნ, არძაშე უმოსო ოკონი, მორო თიში რელიგიაშ წჷმმარინაფალ-მანჯღვერეშე ოჸია ვემუღებჷ.

ქირსიანობას[რედაქტირაფა | წყუშ რედაქტირაფა]

პიჩვანი მოურს შორიში ულირშე, მუჟამსჷთ ოჭკომალიშ სიჭიჭა თიში დაზოგებაშ ქიმინუეფს თხულენდჷ. უკული მიაჩჷ რელიგიური სანქციაქ, მუჭოთ "ადამიერიშ შურიშ წიმინდუაშ დო გოახალაფაშ" საუჯგუშო საშუალებას, კათოლიკური რწუმა მიარედღამ პიჩვანს ვათხულენს, ხონულენა ხვალე დიდპიჩვანიშ მაართა მარაშ თუთაშხა დღას, კჷნორულაფაშ დო ქირსეშ გეკულასერს, ნებაშ მარაშ ობიშხა დღას. პროტესტანტეფს ვაუღჷნა პიჩვანიშ დღალეფი (ანგლიკანეფიშ მოხ), გიშაკერძაფილო ჭყანიერი რე პიჩვანიშ წესეფი მართლმადიდებელობას.

მართლმადიდებელი ოხვამე[რედაქტირაფა | წყუშ რედაქტირაფა]

მართლმადიდებელ ოხვამეს გვალო 4 მიარედღამი პიჩვანი რე:

  1. დიდპიჩვანიქირსეშ მაბარჩხალე თანაფაშ კინოხ (მაყარე რე დო იგჷნძარებუ 7 მარას).
  2. პეტრე-პავლობაშ პიჩვანი — წმ. პეტრეშ დო წმ. პავლეშ დღახუშ კინოხ (1–5 მარა).
  3. მარაშინაშ პიჩვანი — დიდი ოხვამერი ღორონთიშნანაშ კჷნორულაფაშ (მარაშინაშ) კინოხ (2 მარა).
  4. ქირსეშ პიჩვანი — ქირსეშ დღახუშ კინოხ (6 მარა).

ართდღამი პიჩვანი რე:

  • ირ მარაშ ჯუმაშხა დოობიშხა წორულიშ მოხ, თიშ გეშა ნამჷ-და ჯუმაშხას იუდაქ გჷმოჩუ იოსე ქირსე, ობიშხას — იოსე ქირსე ჯვარს მაცუნეს.
  • წაკურთხიაშ კინოხიანი დღა - 18 იანვარი.
  • წმ. იოანე ნათელმიმაჩეშ დუდიშ კვათუაშ დღა - 11 ეკენია.
  • ჯვარამაღალება - 27 ეკენია.

ედომუშამო დოხოლაფირო ჟიროში დღა წანმოწანას. პიჩვანიშ დღალეფს ვაშინერს ოხიოლე ამბეეფს კათაფა, გურგინუაშ ონოფული, ოსურწკჷმა ურთიართობა.

ბასილ კესარიალი წარუნდჷ: "პიჩვანქ შქირიტუ ჭყანა დაჩხირიში, აკუოთუ პიჯი ნჯილოეფს, პიჩვანი ხვამას ცას ეიოჭირინუანს... მანჯღვერე რე ცხონაფაში, ნანა რე სინთელეში, მარწაფალი მარდუეფიში, ოსკვამერი რჩინუეფიში, ჯგირი ალმაჸვენჯი მოშარეეფიში".

იუდაიზმის[რედაქტირაფა | წყუშ რედაქტირაფა]

იუდაიზმის საართო პიჩვანიშ დღალეფიშ მოხ (ოსხუნალი დღალეფი, ეიოშნალი დღალეფი) მეღებული რე მასქერეფიშ მაშინაფალი პიჩვანი დო შხვა.

ისლამს[რედაქტირაფა | წყუშ რედაქტირაფა]

ისლამიშ მეჯინათ, კონწარი პიჩვანი, საუმი (რამადანიშ თუთას, თაშნეშე შხვა დღალეფს ნებაჸოფური პიჩვანი) მოორწუმეს გუთმუხურგანს ლუკაშ მეღებას ბჟაშ ეშულაშე დილულაშა. თე მუმაქიონაფალი წესი იჭანუანს შურიელო ცოდაშ მუკონწყუმაშ კორინს დო ხეთ ჸვაშა მონჭაფას, მუსლიმეფიშ თინეფშო ნარღი, ნამუეფსთ ვეშულებუ მუნეფიშ დუდიშ გუმოდიარუა დო მატერიალური გაჭირებაშ გეშა აძულებური რე შქირენდანი.

თაშნეშე ქოძირით[რედაქტირაფა | წყუშ რედაქტირაფა]

რესურსეფი ინტერნეტის[რედაქტირაფა | წყუშ რედაქტირაფა]