ჯამუ დო ქაშმირი

**ჯამუ დო ქაშმირი**
დოგრი जम्मू और कश्मीर
ურდუ: جموں اور کشمیر‎‎
ლადაქ. ཇ་མུ་དང་ཀ་ཤི་མིར།
ინგლ. Jammu and Kashmir
გერბი;	შილა;
ქიანა	ინდოეთი
სტატუსი	ავტონომიური შტატი
ადმინ. ცენტრი	* სრინაგარი (საზარხულო) ჯამუ (საზოთო);
შხუ ნოღა	სრინაგარი
შხუ ნოღეფი	ჯამუ
მადუდე	გუბერნატორი:; ნარინდერ ნათჩ ვოჰრა; თარი მინისტრი:; მუფთი მოჰამად საიდი; კანონმადვალუ ორკანო:; ჟირპალატიანი პარლამენტი (89+36)
ოფიც. ნინეფი	დოგრი, ქაშმირული, ურდუ
მახორობა (2011);	12 548 926 (19-ა აბანი)
მეჭედალა	56,47 კოჩი/კმ²
ფართობი	222 236 კმ² (6-ა აბანი)
ბორჯიშ ორტყაფუ	UTC+5:30
კოდი ISO 3166-2	IN-JK
	ოფიციალური ვებ-ხასჷლა
	ჯამუ დო ქაშმირი

ჯამუ დო ქაშმირი (დოგრი जम्मू और कश्मीर, ურდუ: جموں اور کشمیر‎‎, ლადაქ. ཇ་མུ་དང་ཀ་ཤི་མིར།, ინგლ. Jammu and Kashmir) — ინდოეთიშ ჸოფირი შტატი ქიანაშ ოორუეშე. შტატიშ უდიდაში ნოღა დო საზარხულო ნანანოღა — სრინაგარი, საზოთო ნანანოღა - ჯამუ. შტატიშ მახორობა — 12 548 926 ადამიერი (19-ა აბანი შტატეფს შქას; 2011 წ.).

შტატი იდვალუაფუდჷ ჰიმალაიშ გვალეფს. ჯამუ დო ქაშმირს ბჟაეიოლშე უხურგანდჷ ჩინეთიშ ოკათე რესპუბლიკა, ობჟათეშე - ჰიმაჩალ-პრადეშიშ დო პენჯაბიშ შტატეფი, ოორუეშე დო ბჟადალშე - პაკისტანი. ჸოფირი ჯამუ დო ქაშმირიშ სათაროშ ტერიტორიაშ ედომუშამი ვარდა ნორთობურ დორხველობას, პაკისტანი დო ჩინეთი ინდოეთის ონირზჷნა. პაკისტანი, ინდოეთიშე კონტროლირაფონი ჯამუ დო ქაშმირიშ შტატიშ ნორთის, ოკუპირაფილ ტერიტორიათ კოროცხჷნს^[1]. პაკისტანშე კონტროლირაფონი ქაშმირიშ ნორთი, გორთილიე აზად ქაშმირო დო გილგიტ-ბალტისტანო. მუშჸურე, ჩინეთის ოკუპირაფილ აფჷ მერკეთდოხორელი, მარა სტრატეგიულო შანულამი რაიონი აქსაიჩინი, თაშნეშე მაღალგვალამი ტერიტორიაშ ნორთი.

2019 წანაშ 5 მარაშინათუთას, ინდოეთიშ თარობაქ ქიანაშ კონსტიტუციაშე 370-ა ბირგულიშ ეშაღალა გეგნოჭყვიდჷ ჟირ მორსხუ ტერიტორიათ დორთუალაშ გეშა, ნამუშით ოორუეშ შტატის გიშაკერძაფილ სტატუსი ერზიებუდჷ, დო ჟირი მორსხუ ტერიტორიათ დორთუალაშ გეშა კანონპროექტი გემშეღჷ — ჯამუ დო ქაშმირი დო ლადაქი. თე გჷნოჭყვიდირს წჷმი აწოჸუნდჷ შტატის ტერიტორიას შანულამი ოურდუმე ნძალაშ აკოშაყარუა, კომენდანტიშ სათიშ მიშაღალა, შტატიშ მასშტაბით ინტერნეტშა დო მობილური რსხუშა მეჭირინაფაშ გოხურგუა, თაშნეშე მაბანობური პოლიტიკური ლიდერეიშ ჭოფუა^[2].

გეოგრაფია დო კლიმატი[რედაქტირაფა | წყუშ რედაქტირაფა]

ჯამუ დო ქაშმირიშ ტერიტორიას იდვალუაფუ ქაშმირიშ ლეხერი, ტავიშ ლეხერი, ჩენაბიშ ლეხერი, პუნჩიშ ლეხერი, სინდიშ დო ლიდერიშ ლეხერეფი. თარი ქაშმირიშ ლეხერიშ სიფართე 100 კმ. დო 15 520,3 კმ² ფართობი რე. ლეხერი ოორუე-ბჟაეიოლშე მითმიარსხუაფუ ჰიმალაეფს. ოშქაშე სიმაღალა დოხოლაფირო ომაგჷ 1850 მეტრას, პირ-პანჯალიშ რაიონს - 5000 მეტრას. ჯელამი ჰიმალაიშ უშხუაში წყარმალუ რე, ნამუთ გჷშმახჷრჷჩანს ქაშმირიშ ლეხერს. წყარმალუეფი ინდი, ტავი, რავი დო ჩენაბი თარი წყარმალუეფი რენა, ნამუთ შტატის გჷშმახჷრჩანან. ჯამუ დო ქაშმირსმუსხირენი ჰიმალაიური ჯიშთი იდვალუაფუ. ზუღაშ დონეშე, მუშ ოშქაშე სიმაღალათ, 5753 მ., ჯიშთი სიჩენი, ნამუთ სიგჷრძათ 70 კილომეტრი რენ, უგჷრძაშიე ჰიმალაეფს.

ჯამუ დო ქაშმირიშ შტატიშ კლიმატი, მაღალი ორტყაფუობაშ გეშა ირო ითირუ. ობჟათეშე, ჯამუშ ელმოლს, კლიმატი რჩქვანელობურო მუსონურიე. ჩხე სეზონს, ჯამუს ძალამი სინჩხე რე დო ტემპერატურაქ შილებე 40 °C-შახ იუასი (კვირკვეს დო მარაშინათუთას).