ალქიმია
ალქიმია (არაბ الكيمياء) — შქა ოშწანურეფს რდჷ მენცარობა, ნამუშ ღანკი შხვადოშხვა ლითონეფიშ ძვირფას ლითონეფო (ოქრო, ვარჩხილი) გინორთინაფა რდჷ. ალქიმიკოსეფს ოქრო არძაშე უმოს ედომორინელი ნივთიერებათ მიოჩქჷდეს დო თინერ ნივთიერებას გორჷნდეს, ნამუთ უბრალო ლითონიშ ოქროშა გინორთინაფას გიაჩქარენდუ. თე ნივთიერებას ნამთინე „ფილოსოფიურ ქუას“, ნამთინე „ჭითა ნჯილოს“, დო შხვა „უღურალაფაშ ელექსირს“ უძახჷდჷ. ალქიმიკოსეფქ, თიშ ვემკუჯინალუო, ნამუდა ღანკიშა ვემიაჭირინეს, იშენით დიდი თია მიშეღეს ქიმიაშ გოვითარაფაშა. თინეფქ გაჭყეს ბრელი ქიმიური ლაბორატორია, სოდგათ აშეგურეს ნივთიერებაშ ბრელი მუშება, გიმიგონეს ბრელი ლაბორატორიული ხეჭკუდი. ალქიმიკოსეფიშ არძაშე ჩინებული ღანკეფი ორდჷ: არძანერი მეტალიშ ოქროშა ვარა ვარჩხილიშა გინორთინაფა(ქრისოპოეია) დო პანაცეაშ ანუ რინაშ ელექსირიშ ხაზჷრაფა. თენა რე წამალი ნამუთ საშუალებას ირძენს დასკილიდუას არძანერი ლახარა დო ქიმერჩას უღურალაფა. შქა ოშწანურეფიშ ოჭყაფუს ევროპალი დო აზიარი ალქიმიკოსეფქ დიდი ჟამი დუთმეს ფილოსოფიური ქუაშ, ლეგენდარული ნივთიერებაშ გორუას, ნამუთ მიაზრებუდუ უციო ინგრედიენტო ჟირხოლო ჟიდოგიმოკოროცხილი ღანკიშ მიოჭირინაფალო.
