დაუდ-ფაშა გურჯი

ვიკიპედია ხასჷლაშე
გეგნორთი: ნავიგაცია, გორუა

დაუდ-ფაშა გურჯი, თახმი ჯოხო დავით გიორგის სქი მანველაშვილი (დ. 1767 ვარა დოხოლაფირო 1774, თუდოლენი ქართლი; ღ. 1851, მედინა) — ერაყიშ ეკონია მამლუქი მადუდე 1817-1831 წანეფს. ქორთული გამნარყიშ (მანველაშვილი). ბაღანობას ქიხვამილეს ჭკორით მოვაჭარეეფქ დო ოსმალეთის გეგმოჩეს. ქო მოხვადჷ ბაღდადიშ ფაშა სულეიმან ბუიუქწკჷმა, ნამუქჷთ თინა მამლუქეფიშ ოგურაფუს ქო მიაბარჷ. ოგურაფუშ თებაშ უკული უკებუდჷ შხვადოშხვა პოსტი(საფაშოშ მარწკინდიშ მათხილე, ხაზინადარი, დავთარდარი დო შხვა). გჷნირთჷ დო ვარი ერაყიშ მადუდეთჷნ, გეგნუდირთჷ ოსმალეთიშ სულთანს დო დუდენდჷ ზოხორინელ ოდინოხოლენე დო ოგალენე პოლიტიკას. არმია გეგნოქიმინჷ ევროპულ ყალდაშა, ერაყის 1829 წანას გონწყჷ მაართა სტამბა[1], გამუშეღჷ ოვაჭარე მონოპოლია ოფუტურ-ომეურნულ პროდუქტეფშა. ოცადჷდჷ რუსეთ-ოსმალეთიშ 1828-1829 წანეფიშ ლჷმა მუში ორგებაფალო გეგმურინუაფუდჷკონ დო ერაყიშ ზოხორინელობა გუმეკენჯებუდჷკონ.1830 წანას სულთანქ თშ მეხჷ ჯარი მიდაჯღონჷ, დაუდ-ფაშა გურჯიქ დემარცხჷ დო 1831 წანაშ ეკენიას თურქეფს ქაშუოლჷ ხეშა. 1832 წანას სულთანიშ ზოჯუათ ოკათჷდჷ ანატოლიაშა მიშაჭკირილ მუჰამედ ალიშ ლოშქიშ მეხჷ ლჷმას. 1834 წანას ბოსნიაშ მადუდეთ ქო დარინეს. ჟირი წანაშ უკული სტამბოლშა გეგნიჸუნეს, სოდეთ უკებუდჷ შხვადოშხვა პოსტი. 1839-1841 წანეფს ანკარაშ ვილაიეთის დუდენდჷ. 1841 წანას სახენწჷფო ომოინალეშე გეგნოდირთჷ. 1846 წანას მედინას ქო დიხორჷ დო დორხველი თხუალათ მაჰმადიშ საფულეშ გესაძინეთ ქო დირინუ. ღურჷ 1851 წანას მედინას, დასაფულებური რე ხალიფა ოსმანიშ საფულეშ ხოლოს.

ლიტერატურა[რედაქტირაფა]

  • ბეი-მამიკონიანი გ., ქართველ მამელუკთა მბრძანებლობა ერაყში XVIII და XIX საუკუნეებში, «საქართველოს სსრ მეცნიერებათა აკადემიის მოამბე», 1944, ტ. 5, № 7;
  • ჯანელიძე დ., სილაგაძე ბ., ქართველი მამლუქები ეგვიპტესა და ერაყში, თბ., 1967;
  • Huart C. J., Histoire de Bagdad dans les Temps modernes, P., 1901;
  • ჩოჩიევი ვ., ქსე, ტ. 3, გვ. 399, თბ., 1978

სქოლიო[რედაქტირაფა]

  1. ბ. სილაგაძე, „ქართველი მამლუქები ერაყში“, ქართი, 1967, ხს. 261