ლობელიშ აპურტაკი

ლობელიშ აპურტაკი (ლათ. Veratrum lobelianum) — მიარეწანიანი ართლებერამი ოდიარე ჩანარი შორიაშობურეფიშ ფანიაშე.

ჩანარიშ ღერი ფსქელი დო მიარეფურცელამი რე. აპურტაკიშ ჟილენი ნორთი გოქიქილერი რე. ჩანარიშ სიმაღალა 1-1,5 მეტრშახ ანჭუ. ფურცელეფი ჯერღვეფიშ მანგას ტკვაჩილი რე დო გიმენჸურეშე გოქიქილერი. გიმენი ფურცელეფი უმოსი დიდი ზჷმაშ რე, კვიზინაფათ ფართო-ელიფსური დო ბოლოწვანდამი რე, ჟილენი — ლანცეტა რე დო გჷნძეთ აწოწვანდაფილი; ფურცელეფი ღერსგოკარკატელი, ინოხუნაფილი. წოროპიოლეფი ფართომარქვალიაშობური რე, პიოლეფიშ ყერწიშე ელაზჷმაფათ გჷნძე. პიოლფორუ გურგინიშობური რე, მოწვანე-ჸვინთელი, გინოფაჩილი, ირი თიშ ფურცელი ელიფსური რე, ჯინჯიშჸრე ოცაცაიათ გინულირი, ქანთელი ფოჩვათ გოჸუნაფილი.

ტვრრიანეფი პიოლოფორუშ ნერჩის გემარგჷ. გუმნაღელი 3-ბუდნამი მოგჷნძე კოლოფია რე, ნამუთ ბუდნეფო ჯინჯიშახ ინწყჷმუ. თასიმოჸვინთალე რე, ტაბაჩა დო სუამი. ფესვეტი კუნტა დო ფსქელი უღუ.

ლობელიშ აპურტაკი ჩანს სუბალპურ ორტყაფუს, ალპურ ზონასჷთ ჩანს ზუღაშ დონეშე 2500 მ–შახ. ოშა-გოშათ აბხვადჷნა ტყაშ ორტყაფუს. აპურტაკი მაღალი გვალაშ ოდიარუს უმენტაშო გოფაჩილი რე დო უდუთხინაფუ ჟვერი ჩანარი რე. თიშ არძა ნორთი წალამი რე. შხირი რე ედომუშამი საქორთუოს — ყაზბეგიშ, ბორჯომ-ბაკურიანიშ, ბახმაროშ, დუშეთიშ დო შხვა ანგანობეფს. თეშ მოხ, გოფაჩილი რე მელენკავკაციას, ბჟადალ დო ბჟაეიოლ ცჷნდჷრს, მორჩილ აზიას, შორიშ ბჟაეიოლს, სქირონაშქა ზუღაშ ანგანობას.

რესურსეფი ინტერნეტის

• ლობელის შხამა — Veratrum lobelianum (ინგლისური)