სალვადორ დალი
.jpeg)
სალვადორ დალი (კატ. Salvador Dalí – ედომუშამი სალვადორ ფელიპ ჟასინტ დალი დომენეკი, კატ. Salvador Domènec Felip Jacint Dalí i Domènech, Marquis de Púbol; დ. 11 მესი, 1904, ფიგერასი, კატალონია – ღ. 23 ღურთუთა 1989, ფიგერასი) ― ესპანარი მახანტალი, ფერჭარუ, გრაფიკოსი დო სკულპტორი, სიურეალიზმიში წჷმჷმარინაფალი.
დინორე |
ბიოგრაფია [რედაქტირაფა]
სალვადორ დალიქ დებადჷ 1904 წანაშ 11 მესის ესპანეთის, კატალონიურ ნოღა ფიგერასის, ნოტარიუსიშ ფანიას. სახუათი ხელუანობაშ გურაფა დიჭყჷ ოხანტურე სკოლას. 1914-1918 წანეფს გურაფულენდჷ ოდაბადურ ნოღას მარისტეფიშ ორდენიშ აკადემიას. 1916 წანას არდადეგეფშა იშარჷ ნოღა კადეკასშა, სოდეთ ეზიარუ̂ მოდერნისტულ ხელობუას. დალიშ მაართა პერსონალურ გჷმოფინუაქ მინწყუ 1919 წანას. 1921 წანას მუმაქ გინოჭყვიდჷ სალვადორიშ მადრიდშა გოტება, სან-ფერნანდოსიშ აკადემიას გურაფაშ ოგჷნძარაფალო. ნანანოღას სალვადორქ გეჩინებაფუ ხელუანობაშ თიჯგურა წჷმჷმარინაფალეფი, მუჭომეფით რდეს ლუის ბუნიუელი, ფედერიკო გარსია ლორკა დო პედრო გარფიასი.
მადრიდის სალვადორი მუშ ნახანტეფს კუბიზმიში დო დადაიზმიში აკოწყორუას ოცადჷდ. 1926 წანას სალვადორი აკადემიაშე გარიცხეს დუდძიკალობაშ გეშა. თიმ წანას სალვადორქ მაართათ იშარჷ პარიზშა, სოდეთ პაბლო პიკასო გეჩინებაფუ. მუშ დორხველი სტილიშ გორუას დალი 1920-ამ წანეფიშ ეკონიას პიკასოშ დო ხუან მიროში შემოქმენდალაში გოლინათ ქიმინჷნს მუშ ნახანდეფს. 1929 წანას ლუის ბუნიუელწკჷმა ართო მუშენს ფილმშე ― ანდალუსიური ჯოღორი. თაქ ქეშეხვადჷ მუშ მუმაულარ ჩილს ― გალას (ელენე დიაკონოვა), ნამუთ თი ბორჯიშო ფრანგი პოეტიშ, პოლ ელუარიშ ჩილი რდჷ.
დალიშ ნახანტეფ შხვადოშხვა გჷმოფინუეფს მონაწილენდეს, მუქჷთ დიდ პოპულარობა მოუღჷ დალის. 1929 წანას დალი ანდრე ბენეტონიშ დორსხუაფილ სიურეალისტეფიში ბუნაშა მიშელჷ.
1934 წანას დალიქ ოფიციალურო დექორწინ გალაწკჷმა.
ესპანეთიშ ლჷმაშ დო ფრანკოშე ნძალაალობაშ ხეშა ეჭოფუაშ უკული დალის უალებუობაქ მოურთჷ სიურეალისტეფიშ ბუნაწკმა, ნამუეფით მეკვარჩხანე არზეფს იზიარენდეს. დალი გოუტეს ბუნაშე. თე ბორჯის თქუ დალიქ: „სიურეალიზმი - თენა მა ვორექ.“
მაჟირა თელქიანაშ ლჷმაშ დოჭყაფაშ უკული დალიქ გალაწკჷმა ართო გინილუ̂ ააშ-შა, სოდეთ ჩხორო წანას რდჷ. 1942 წანას მუქ გჷშაშქუ ავტობიოგრაფიული რომანი. მუშ ლიტერატურ ცადეფქ ხოლო წჷმოძინელქ იჸუ - წიგნიქ ბესტსელერო გინირთჷ.
ესპანეთშა დორთაშ უკული დალიქ ოდაბადურ ფიგერასის ქჷდიხორჷ. 1981 წანას პარკინსონიშ ლახარაქ ქაღოლჷ. 1982 წანას დოღურუ გალაქ. სალვადორ დალიქ დოღურუ 1989 წანაშ 23 ღურთუთას. დასაფულებური რე ფიგერასის, მუშ ჸუდეშ ოზეს.
შემოქმენდალა [რედაქტირაფა]
- აპარატი დო ხე
- კარაკანი ჩხოუ
- მაბონუ ოსური
- ოსურიშ დო შურდგჷმილიშ სიმბიოზი
- სიურეალისტური კომპოზიცია
- უდუბაღინაფილი კორინეფი
- პოლ ელუარიშ პორტრეტი
- ფანტასმაგორა
- დიდი მასტურბატორი
- ლჷბუ საათეფი
- ათროპომორფული სეკრეტერი
- ტელეფონი – ომარი
- დივანი "მეი უესტიშ ლერჩქვეფი"
- დიდი პარანოიკი
- ძღაბი ოსინთურწკჷმა
დო შხვ.
ინტერესუანი ფაქტეფი [რედაქტირაფა]
სალვადორ დალის ორხველჷ ნარაგადი - „ირფელშე ინტერესუანი თელქიანას მა დო გალა ვორეთ, მაჟირა აბანს მა ვორექ, მასუმა აბანს შხვა ირფელი, მუშო ოკო რაგადი, ჩქიმო გალაში მეკოროცხუათ.
სალვადორქ 1969 წანას ქიმინ ჩუპა ჩუპსიში სლოგანი.
სალვადორ ათაშ უდარენდჷ დუს პაბლო პიკასოს: „პიკასო ესპანარი რე, მა ხოლო. პიკასო გენიოსი რე, მა ხოლო გენიოსი ვორექ. პიკასოს არძა ქიანას იჩინენა. მათ მიჩინენა. პიკასო კომუნისტი რე, მა ვარ.
რესურსეფი ინტერნეტის [რედაქტირაფა]
- სალვადორ დალი on ბურუსი ((ქორთ.))
