ჯექ ნიქოლსონი
| ჯექ ნიქოლსონი
Jack Nicholson |
|
|---|---|
ჯექ ნიქოლსონი (2010) |
|
| დაბადებაშ ჯოხო: |
ჯონ ჯოზეფ ნიკოლსონი |
| დაბადებაშ აბანი: |
ნიუ-იორკი, ააშ |
| დებადჷ: | 22 აპრილი, 1937 |
| საქვარუა: | არტისტი, რეჟისორი |
| ქარანუაშ წანეფი: |
1958–ამდღარშახ |
| ალმასქუ(ეფი) | სანდრა ნაიტი (1962–68) |
| აკადემიაშ ჯილდოეფი | |
| ოსკარი უუჯგუშაში არტისტი ქომოლკოჩიშო |
|
| 1975 - მიდგარენქ გუგულიშ ოგვაჯეს გეგნოფურინჷ |
|
| 1997 - უჯგუში ვა რე | |
ჯონ ჯოზეფ „ჯექ“ ნიქოლსონი (ინგლ. Jack Nicholson; დ. 22 პირელი, 1937) — ამერიკალი არტისტი, რეჟისორი, პროდიუსერი დო ჭარუ, თ.გ. „მეთოდური რსულებაშ“ სკოლაშ არტისტი, ჩინებული ნევროტული ხასიათეფიშ რუმე, კომედიური პორტრეტეფით. ამერიკაშ კინოაკადემიაშ ჯილდოშა ვითოჟირშა რდჷ ნომინირაფილი (გიმორძგჷ 3-შახ), მუთ ნამდგარდია შხვა ქომოლკოჩი არტისტიშე უმოსი რე, დო კჷნასქიდჷ ხვალე მერილ სტრიპის (17 ნომინაციაშე 3 ოსკარი) ოართე ნომინაციეფით. თის თაშნეშე ეჭოფილი აფუ 7 ორქოშ გლობუსი დო კენედიშ ცენტრიშ პრემია 2001 წანას.
1994 წანას გჷნირთჷ ართ-ართი არძოშე ახალნორდი არტისტო, ნამუსჷთ მიაჩჷ ამერიკაშ კინოაკადემიაშ პრემიაქ რინაშულ მეჭირინაფეფშო. ჯექ ნიქოლსონი ოკათჷდჷ ჩინებული კინოფილმეფც „ხუთი ლექინი პიესა“, „ჩინური კვარტალი“, „მიდგარენქ გუგულიშ ოგვაჯეს გეგნოფურინჷ “, „ფოშტალიონი ირო ჟირშა რეკჷნც“, „ჭითეფი“, „სინაზეშ ნინა“, „ბეტმენი“, „მუსხირენი ჯგირი ბოში“, „ჰოფა“, „გერი“, „უჯგუში ვა რე“, „შმიდტიშ გეშა“, „ჸოროფა წესეფიშ მეჯინათ დო თინეფიშ უმუშოთ“ დო „ჟირმანგი ლაჸაფი“.
დინორე |
ბიოგრაფია [რედაქტირაფა]
ჯექ ნიქოლსონქ დებადჷ 1937 წანაშ 22 პირელც, ნიუ-იორკის, მასხაპალიშ ჯუნ ფრენსის ნიკოლსონიშ (ოსცენე ჯოხო ჯუნ ნილსონი) ფანიას.[1][2] ბაღანაშ დაბადებაშე ამშვი თუთათ ორდო, კერზოთ 1936 წანაშ 16 გჷმათუთას ჯუნ ნილსონქ ჩილო აჸუნჷ იტალო-ამერიკალ მასხაპალც დონალდ ფურჩილოს (ოსცენე ჯოხო დონალდ როუზი),[3] ნამუსჷთ უკვე ჩილი ჸუნდჷ დო თიშ უმკუჯინუო, ნამდა ალმასქუს თიქ უპიჯჷ ბაღანაშ ერდუალან, ჯუნიშ დიდაქ — ეთელქ მუქ გჷნოჭყვად ბაღანაში მუკოლუაფა, ოდო ჯუნს თეთ მეშქაშალა ქჷმეჩჷ გუგინძორებუდჷკო მუში ოსხაპუე კარიერა. თიშ უმკუჯინუო, ნამდა ჯექიშ მუმათ ფურჩილო რე მერჩქინელინ, ბიოგრაფი პატრიკ მაკჯილიგენი მუში წიგნის „ჯექიშ რინა“ ადასურენც, ნამდა ჯექ ნიქოლსონიშ ბიოლოგიური მუმა შილებე ჸოფედჷკო ჯუნიშ მენეჯერი ლატვიური გამნარყიშ ედი კინგი.[4] შხვა წყუეფიშ მეჯინათ, ჯუნს თვითან ვა უჩქუდჷ ჯექიშ თახმი ბიოლოგიური მუმაშ მინობა.[1] ჯექ ნიქოლსონიშ დიდა რდჷ ირლანდიური, ინგლისური და ჰოლანდიური გამნარყიშ,[5] მორო თვითან ჯექი დო მუში ფანია ირწუმუაფუნა, ნამდა თინეფი ირლანდიური გამნარყიშ რენან.[6][7]
ჯექ ნიქოლსონქ ირდჷ მუში ბაბუშ – ჯონ ჯოზეფ ნიკოლსონიშ (უნივერმაგიშ ოსინთეეფიშ მუმანწყუალი) დო ეთელ მეიშ (სტილისტიშ, კოსმეტოლოგიშ დო მოჸოროფული ხანტუშ) ჸუდეს. ჯექ ნიქოლსონს მიორჩქჷდჷ, ნამდა თინეფი მუში მასქერეფი რენან. თიშ გეშა, ნამდა თიში მასქერეფი თახმო ვა რდეს დადი დო ბაბუნ, ოდო თახმო და რდჷ დიდან, თიქ ხვალე 1974 წანას გეგჷ, თაიმიშ ჟურნალისტიშე, ნამუთ თიშე სტატიას ჭარუნდჷნ.[8] თი ბორჯიშო ჯექიშ ბაბუ დო დადი ღურელეფი რდეს (ოსქვებურო 1963 დო 1970 წანეფც).
ნიკოლსონიშ თქუმათ, თის ვა უჩქჷ მი რე თიში ბიოლოგიური მუმა, ოდო სიმართე ხვალე ეთელი დო ჯუნს უჩქუდეს, მორო თეშ გეშა თინეფი მითინწკჷმა ვარაგადანდეს.[8]
ნიკოლსონქ ირდჷ ნეპტუნ-სიტის.[9] ერდეს კათოლიკური ეკლესიაშ მეჯინათ.[5][6]. თეიშა, სოიშახ სკოლაშა დიჭყჷ გილულან,თიში ფანიაქ ქჷდიხორჷ სპრინგ-ლეიკის (ნიუ-ჯერსი).[10][11] „ნიკი“, მუჭოთ თის სკოლაშ მაჸალეეფი უძახდესჷნ, ხშირას ოსურუდჷ მანასქუანიშ ოშქარი სკოლას, სოდეთ 1954 წანაშ გჷმოშქუამალას თინა „კლასიშ კლოუნო“ გეგშეგორეს. თეატრალურ დო დრამატულ პრემიეფც სკოლას პატიჩამაშ ღანკით თიშ ჯოხოს გჷთმიოდვანდეს.
კარიერა [რედაქტირაფა]
მუჟამცჷთ ჯექ ნიქოლსონქ მაართანო ქჷმოხვადჷ ჰოლივუდისჷნ თინა კურიერო მუშენდჷ უილიამ ჰანაწკჷმა დო ჯოზეფ ბარბერაწკჷმა MGM-იშ ანიმაციურ სტუდიას. თექ მუშობაბორჯის ნიკოლსონს მიარზის დჷმაჭყაფუ ხანტუ მულტიპლიკატორიშ თანანდებობა, მორო ნიკოლსონქ უვარუ, რახან თის ხვალე არტისტობა ულამუდჷ. [12] კინოს თიშ დებიუტიქ აკოდირთჷ მორჩილბიუჯეტამ დრამას, ჯოხოდვალათ „მანგარინჯე მაჸვილარი“ (1958), სოდეთ ილაჸაფჷ თარი როლი. 1960 წანას როლი ეჭოფჷ როჯერ კორმანიშ ფილმის „ოშქურანჯუობეფიშ ჭიჭე მაღაზია“, სოდეთ ილაჸაფჷ მაზოხისტიშ როლი. 1963 წანას როჯერ კორმანქ კჷნე ქჷმეჩჷ ნიკოლსონს როლი კინოს. თეჟამო არტისტის როლქ ხვადჷ ფილმის „ყვარანი“. კჷნე თი წანას როლი ეჭოფჷ ფილმის „შქურინი“, სოდეთ თიწკჷმა ართო ილაჸაფჷ თიშ მუმალი ალმასქუქ სანდრა ნაიტიქ.
თიშ გეშა, ნამდა კარიერას პერსპექტივეფი ვა მიშეძირედჷნ, ნიკოლსონქ დახე დუდი ეკონიაშახ მეუჯღუნჷ სამუშას კამერაშ გინოხ – სცენარისტო დო რეჟისორო. მაართა წჷმოძინაქ ხვადჷ თიათ 1967 წანას, მუჟამცჷთ გჷშართჷ ფილმიქ „ტრიპი“, ნამუდგაშ სცენარიშ ავტორი ნიკოლსონი რდჷ. ფილმის თარი როლეფი ილაჸაფეს ჰენრი ფონდაქ დო დენის ჰოპერქ. ართი წანაშ უკული ნიკოლსონქ პროდიუსირო იმუშუ ფილმიშო „დუდი“, სოდეთ ილაჸაფეს პოპ როკიშ ბუნაშ მაკათურეფქ The Monkees. ჰენრი ფონდაქ, დენის ჰოპერქ დო ჯექ ნიქოლსონქ დუდი აკიშაყარეს ართო 1969 წანას, მუჟამცჷთ თინეფც მოუხვადეს ლაჸაფიქ ფილმის „უნარღელი ცხენენჯი“. ნიკოლსონქ ილაჸაფჷ ჯორჯ ჰენსონიშ როლი დო თენა რდჷ თიში მაართა ქვერსემშანულამი წჷმოძინა კინოს. თე როლშო კარიერას მაართანო წჷმარინეს ოსკარიშ ნომინაციას. ართი წანაშ უკული ნიკოლსონი კჷნე რდჷ ნომინირაფილი ოსკარიშ პრემიაშა. თეჟამო უუჯგუშაში არტისტიშ ჯილდოქ ნიკოლსონს ხვადჷ თიათ ფილმ „ხუთი ლექინი პიესა“-ს ლაჸაფებულ როლშო.
ჯექ ნიქოლსონიშ კანდიდატურა ისხუნუდჷ ფილმიშო „ეგზორცისტი“, მორო დემიენ კარასიშ როლს არტისტი ჯეისონ მილერი ქჷდარინეს. 1970-ამ წწ. მაართა გვერდის ნიკოლსონიშ კინოროლეფშე ოშინალიე: „რსხულიშ რჩქინა“, „პროფესია: რეპორტიორი“, „ეკონია რაზმი“, „ჩინური კვარტალი“. თე ჟირ ეკონია ფილმის ლაჸაფებული როლშო ნიკოლსონი ნომინირაფილი რდჷ ოსკარიშ პრემიაშა. ნიკოლსონი მაჸალენდჷ რომან პოლანსკიშ ალმასქუწკჷმა შერონ ტეიტწკჷმა, ნამუქჷთ ჩარლზ მენსონიშ ოკიბირალო გჷნირთჷ. შერონ ტეიტიშ ღურაშ უკული ჯექიქ პოლანსკის ხუც ქალუდირთჷ დო გურც ეთმუკინანდჷ თის.[13][14]
1975 წელს ნიკოლსონქ ეჭოფჷ მუში მაართა ოსკარი თარი როლს ლაჸაფიშენ ფილმის „მიდგარენქ გუგულიშ ოგვაჯეს გეგნოფურინჷ“. ჯექიქ ასახიერჷ რენდლი მაკმერფიშ როლი, ნამუთ ფსიქიატრიულ ოლეხეს მუთმოხვადუ. 1976 წანაშ ჭიჭე როლი ეჭოფჷ ფილმის „ეკონია მაგნატი“, სოდეთ თარი როლი თიხანც ახალნორდი რობერტ დე ნიროქ ილაჸაფჷ.
ჯექ ნიქოლსონქ რანწკით მაჟირა ოსკარი ეჭოფჷ 1983 წანას ლაჸაფებული როლშო ფილმის „სინაზეშ ნინა“, ნამუდგაშ რეჟისორი გოხოლუდეს ჯეიმს ბრუქსი. ნიკოლსონი აგჷნძორენდჷ კინემატოგრაფის ოჸოფარე მოღალეობას. 1980-ამ წწ. ფილმეფშე შანულამიე: „ნათება“, „ფოშტალიონი ირო ჟირშა რეკჷნც“, „სინაზეშ ნინა“, „პრიციშ ფანიაშ ღრისება“, „ისტვიკარი ალქაჯეფი“, „ბეტმენი“ დო შხვ. ფილმ „ბეტმენიშ“ უკული 1996 წანას ნიკოლსონი კჷნე წოროხანდენც რეჟისორ ტიმ ბარტონწკჷმა, თეჟამო ჯექიქ როლი ეჭოფჷ ფანტასტიკურ კომედიას „მარსი მუმანტუნა!“. გეჸვენჯი ოსკარიშ პრემიაქ ნიკოსლონს მიაჩჷ 1997 წანას ლაჸაფებულ როლშო ფილმის „უჯგუში ვა რე“, სოდეთ თის პარტნიორობა გუწუ ჰელენ ჰანტიქ. რეჟისორი ჯეიმზ ბრუქსი. 2002 წანას გჷშმურც ფილმი „შმიდტიშ გეშა“, სოდეთ ნიკოლსონი გეჸვენჯი ოსკარიშ ნომინაციას წჷმარინეს.
2006 წანას ნიკოლსონქ დართჷ მუში ოარტისტე „უკუმელა განს“ ირლანდიარი მაფიოზიშ ფრენკ კასტელოშ როლს ოსკარამ ფილმის „ჟირმანგი ლაჸაფი“, სოდეთ დუდი აკიშაყარეს ჰოლივუდიშ არტისტეფქ მეტ დეიმონქ, ლეონარდო დიკაპრიოქ, მარკ უოლბერგიქ დო შხვ.
ნიკოლსონიშ ბოლო წანეფიშ ნახანდეფშე შანულამიე კინოფილმეფი: „ჸოროფა წესფიშ მეჯინათ დო თინეფიშ უმუშოთ“, „ჟირმანგი ლაჸაფი“, „სოიშახ ვაღურინ“ დო შხვ. თე ეკონია ფილმის მოხვადჷ ლაჸაფიქ ჰოლივუდიშ მურიცხი მორგან ფრიმენწკჷმა.
დორხველი რინა [რედაქტირაფა]
ჯექ ნიქოსლონი შხვადოშხვა ბორჯის რომანტიულ მაჸალუას რდჷ არტისტეფწკჷმა დო მოდელეფწკჷმა, თინეფ შქას რდეს: მიშელ ფილიპსი, ბებე ბუელი დო ლარა ფინ ბოილი. ხანგინძე ბორჯიშ მალობას (1973-1989 წწ.) ნიკოლსონი ურთიართალას რდჷ არტისტ ანჟელიკა ჰიუსტონწკჷმა.
მუსხირენ წანაშ განწხანც ჯექ ნიქოლსონი დო მარლონ ბრანდო მეძობელო ოხორანდეს მალჰოლანდ დრაივს. ბრანდოშ ღურაშ უკული ჯექიქ ქიჸიდჷ მეძობელიშ დორხველი ჸუდე $6.1 მლნ. დოლარშა. გოხოლუას ოხორანდჷ თაშნეშე არტისტი უორენ ბიტი. ნიკოლსონი მაჸალობურ ურთიართალას რდჷ ჟურნალისტ ჰანტერ თომპსონწკჷმა.
ფილმოგრაფია [რედაქტირაფა]
| წანა | ჯოხოდვალა | როლი | მიკოღანკუა |
|---|---|---|---|
| 1958 | მანგარინჯე მაჸვილარი | ჯიმი უოლესი | |
| 1960 | გვიანია ჸოროფაშო | ბადი | |
| 1960 | ბედინერი ფელურუა | ჯონი ვერონი | |
| 1960 | ოშქურანჯუობეფიშ ჭიჭე მაღაზია | უილბურ ფორსი | |
| 1960 | სტადს ლონიგანი | უირი რაილი | |
| 1962 | გოსოფილი დიხა | უილ ბროშესი | |
| 1963 | შქურინი | ანდრე დიუვალიე | თაშნეშე ტიტრეფც მუჭოთ რეჟისორი |
| 1963 | ყვარანი | რექსფორდ ბედლოუ | |
| 1964 | ფურინუა ჭყორინიჸურე | ჯეი უიკჰემი | თაშნეშე სცენარიშ ავტორი |
| 1964 | პულვერიშ შანი | დოლანი | |
| 1964 | უკოხოლენი კარი ჯოჯოხეთიჸურე | ბარნეტი | |
| 1965 | ნტება სოთინი ვარ | უესი | მუჭოთ პროდიუსერი |
| 1966 | ჸოთამა მარცხებაშახ | ბილი სპირი | მუჭოთ პროდიუსერი |
| 1967 | სირუა წიმინდე ვალენტინიშ დღას | ჯინო | ვა მიშინუაფუ ტიტრეფც |
| 1967 | ჯოჯოხეთიშ მოტო–ანგელოზეფი | პოეტი | |
| 1967 | ტრიპი | სცენარიშ ავტორი | |
| 1968 | ფსიქ –აუტი | სტოუნი | |
| 1968 | დუდი | ჰიმსელფი | |
| 1969 | უნარღელი ცხენენჯი | ჯორჯ ჰენსონი | |
| 1970 | ნათერი დღას ქოძირუნქ ირიათონობას | ტედ პრინგლი | |
| 1970 | სირჩქალუეშ ამარყენჯეფი | ბანი | |
| 1970 | ხუთი ლექინი პიესა | რობერტი | |
| 1971 | რსხულიშ რჩქინა | ჯონათან ფერსტი | |
| 1971 | უშქურანჯი აბანი | მიტჩი | |
| 1971 | თიქ თქუ შარალუა | ||
| 1972 | მაფა მარვინ გარდენსი | დევიდ შტებლერი | |
| 1973 | ეკონია რაზმი | ბილი ბადასკი | |
| 1974 | ჩინური კვარტალი | ჯ.ჯ. ჯეიკ გიტსი | |
| 1975 | იღბალი | ოსკარ სალივანი | |
| 1975 | მიდგარენქ გუგულიშ ოგვაჯეს გეგნოფურინჷ | რენდლი მაკმერფი | |
| 1975 | პროფესია: რეპორტიორი | დევიდ ლოკი | |
| 1975 | ტომი | სპეციალისტი | |
| 1976 | მისურიშ მუკართაფუ | ტომ ლოგანი | |
| 1976 | ეკონია მაგნატი | ბრაიმერი | |
| 1978 | ობჟათეჸურე | ჰენრი ლოიდ მუნი | თაშნეშე რეჟისორი |
| 1980 | ნათება | ჯექ ტორენსი | |
| 1981 | ფოშტალიონი ირო ჟირშა რეკჷნც | ფრენკ ჩამბერსი | |
| 1981 | რეგტაიმი | ყურსალი პლაჟის | ვა მიშინუაფუ ტიტრეფც |
| 1981 | ჭითეფი | იუჯინ ო’ნილი | |
| 1982 | თანჯა | ჩარლი სმითი | |
| 1983 | სინაზეშ ნინა | გარეტ ბრიდლავი | |
| 1984 | ოხვამეშ ორეკეშიშ შქურინი | ||
| 1985 | პრიციშ ფანიაშ ღრისება | ჩარლი პარტანა | |
| 1986 | ეჭვება | მარკ ფორმანი | |
| 1987 | ისტვიკარი ალქაჯეფი | დერილ ვან ჰორნი | |
| 1987 | ტელეამბეფი | ბილ რორიჩი | |
| 1987 | ნარშავა | ფრენსის ფელანი | |
| 1989 | ბეტმენი | ჯოკერი | |
| 1990 | ჟირი ჯეიკი | ჯ.ჯ. „ჯეიკ“ გიტსი | თაშნეშე მუჭოთ პროდიუსერი/რეჟისორი |
| 1992 | ქომოლკოჩური უჰამუობეფი | იუჯინ ერლ ექსლაინი/გერი ბლისი | |
| 1992 | მუსხირენი ჯგირი ბოში | ნათან ჯესეპი | |
| 1992 | ჰოფა | ჯიმი ჰოფა | |
| 1994 | გერი | უილ რენდელი | |
| 1995 | პოლიციარი შარააკართუს | ფრედი გეილი | |
| 1996 | ზისხირი დო ღვინი | ალექს გეიტსი | |
| 1996 | ონჯუაშ მურიცხი | გარეტ ბრიდლავი | |
| 1996 | მარსი მუმანტუნა! | პრეზიდენტი ჯეიმზ დეილი / არტ ლენდი | |
| 1997 | უჯგუში ვა რე | მელვინ ადელი | |
| 2001 | პიჯუა | ჯერი ბლეკი | |
| 2002 | შმიდტიშ გეშა | უორენ შმიდტი | |
| 2003 | ჭყორინიშ მართუა | ბადი რაიდელი | |
| 2003 | ჸოროფა წესეფიშ მეჯინათ დო თინეფიშ უმუშოთ | ჰარი სენბორნი | |
| 2006 | ჟირმანგი ლაჸაფი | ფრენსის „ფრენკ“ კასტელო | |
| 2007 | სოიშახ ვაღურინ | ედვარდ კოული | |
| 2010 | სოჸურეშე გიჩქუნა? | ჩარლზ მედისონი | |
| 2011 | ამერიკანა | ედგარ ჯონსონი |
რესურსეფი ინტერნეტის [რედაქტირაფა]
- (ინგლისური) ჯექ ნიქოლსონი — კინოფილმეფიშ ინტერნეტ-მუნაჩემეფიშ ბაზას
- ჯექ ნიქოლსონი (ინგლისური)
- ჯექ ნიქოლსონი (ინგლისური)
- ჯექ ნიქოლსონი (ინგლისური)
- ჯექ ნიქოლსონი (ინგლისური)
სქოლიო [რედაქტირაფა]
- ↑ 1.0 1.1 Marx, Arthur (1995). On His Own Terms. Cigar Aficionado.
- ↑ Douglas, Edward (2004). Jack: The Great Seducer — The Life and Many Loves of Jack Nicholson. New York: Harper Collins, გვ. 14. ISBN 0060520477.
- ↑ Berliner, Eve. Marriage certificate of June Nilson and Donald Furcillo. Young Jack Nicholson: Auspicious Beginnings. Evesmag.com. 2001.
- ↑ McDougal, Dennis (October 2007). Five Easy Decades: How Jack Nicholson Became the Biggest Movie Star in Modern Times. Wiley, 8, 278 გვ.. ISBN 0471722464.
- ↑ 5.0 5.1 The Religious Affiliation of Jack Nicholson. Adherents.com (August 23, 2009).
- ↑ 6.0 6.1 'I Wasn't Inhibited by Anything'. Parade Magazine (December 4, 2007). კითხირიშ თარიღი: February 16, 2007.
- ↑ Ebert, Roger (November 27, 1983). Interview with Jack Nicholson. Chicago Sun-Times. კითხირიშ თარიღი: February 16, 2007.
- ↑ 8.0 8.1 ჯექ ნიქოლსონიშ გეშა: ჯექ ნიკოლსონიშ ბიოგრაფია, ფაქტეფი
- ↑ McDougal, Dennis (October 2007). Five Easy Decades: How Jack Nicholson Became the Biggest Movie Star in Modern Times. Wiley, გვ. 7. ISBN 0471722464.
- ↑ McDougal, Dennis (October 2007). Five Easy Decades: How Jack Nicholson Became the Biggest Movie Star in Modern Times. Wiley, გვ. 16. ISBN 0-471-72246-4. "When Jack was ready for high school, the family moved once more-this time two miles (3 km) farther south to old-money Spring Lake, Jersey's so called Irish Riviera, where Ethel May set up her beauty parlor in a rambling duplex at 505 Mercer Avenue."
- ↑ Nicholson, Jack. "No Getting Away From NJ: Hollywood legend Jack Nicholson attempts to elucidate the definitive quality of New Jersey.", New Jersey Monthly, November 15, 2010. Accessed July 14, 2011. "I grew up on the Shore...in Neptune, Neptune City, Manasquan, and Spring Lake. Graduated from Manasquan [High School]. No offense to Atlantic City, but, where we grew up, we called it 'The Shore.'"
- ↑ McGilligan, P. Jack's Life. W.W. Norton & Company, 1994.
- ↑ Dunne, Dominick. “Murder Most Unforgettable“, Vanity Fair, April 2001. კითხირიშ თარიღი: January 28, 2009.
- ↑ McDougal, Dennis (2007). Five easy decades: how Jack Nicholson became the biggest movie star in modern times. John Wiley and Sons, 109–110 გვ..
