ედუარდი (ტობა)
ედუარდი, რუტანზიგე — ტობა ბჟაეიოლ აფრიკას, უგანდას დო კონგოშ დემოკრატიულ რესპუბლიკას. იდვალუაფჷ წყარმალუ ნილოსიშ აუზის, ბჟაეიოლი აფრიკაშ რიფტულ სისტემას. ედუარდიშ ტობაშ ფართობი 2,325 კვ.კმ., მაქსიმალური სიგირძა 77 კმ., მაქსიმალური სიგანა 40 კმ., ოშქაშე სიტომბა 17 მ. დო მაქსიმალური სიტომბა 112 მ. რე. ტობა იდვალუაფჷ კონგოშ დემოკრატიულ რესპუბლიკაშ დო უგანდაშ სახენწჷფო ხურგის, ზუღაშ დონეშე 912 მეტრაშ სიმაღალას. ედუარდიშ ტობას ინაკათუ წყარმალუეფი: ნიამუგასანი, იშაშა, რუტშურუ, რვინდი, ნტუნგვე, ლუბილია. ტობაშე გიშმურს წყარმალუ სემლიკი. ტობაშ ღანჩოშ ფართობი 12,096 კვ.კმ. რე. ედუარდიშ ტობა ორხველჷ ვირუნგაშ ერუანული პარკიშ (კონგო) დო დიაფალი ელიზაბეტიშ ერუანული პარკიშ (უგანდა) ტერიტორიეფს. ტობაშე არძაშე უხოლაში ნოღეფი რე: კასესე დო ბუტემბო. ტობას ჯოხოქ გიადჷ დიდი ბრიტანეთიშ მაფაშ ედუარდ VII-შ პატიოცემელო. 1973-1977 წანეფს ტობას ჯოხოდუ ზაირიშ (კდრ) დიქტატორიშ იდი ამინიშ სახელი. ამინიშ გინორაგვაფაშ უკულ, ტობას კინ მუშ ჯოხოდვალაქ დართჷ.