ლიკიშ ობსერვატორია
ლიკიშ ობსერვატორია (ინგლ. Lick Observatory) — ასტრონომიული ობსერვატორია, ნამუთ იდვალუაფჷ დიაბლოშ ქჷნდჷრიშ ჰამილტონიშ გვალას, ზუღაშ დონეშე 1283 მეტრაშ სიმაღალას, კალიფორნიაშ ნოღა სან-ხოსეშე 46 კმ-იშ მაშორას. ობსერვატორიას ადმინისტრირენს კალიფორნიაშ უნივერსიტეტი დო თიში შტაბ-ბინა იდვალუაფჷ კალიფორნიაშ უნივერსიტეტიშ კამპუსის. ობსერვატორია გიშარჩქინელი ამერიკალი ბიზნესმენიშ დო ფილანთროპიშ ჯეიმს ლიკიშ ჯოხონობაშ რე, ნამუქჷთ მიშეღჷ დიდი ფინანსური კონტრიბუცია ობსერვატორიაშ დორსხუაფაშა. ობსერვატორიაქ გინწყჷ 1887 წანას. ლიკიშ ობსერვატორიაშ ასტრონომეფქ მიოგორეს პლანეტა დიაშ შხვადოშხვა ალმაშარეეფს: ამალთეას, ელარას, ჰიმალიას დო სინოპეს, ეგზოპლანეტეფს, ასტეროიდეფს, ემისიაშ ღოზეფს დო შხვა. 1891 წანას ალბერტ აბრაჰამ მაიკელსონიქ აკეთჷ დიაშ უდიდაში ალმაშარეეფიშ ზომაშ კალკულაცია. ობსერვატორიას იდვალუაფჷ 9 ტელესკოპი: დონალდ შეინიშ ტელესკოპი, რობოტული ტელესკოპი APF, ანნა ნიკელიშ რეფრაქტორული ტელესკოპი, ჯეიმს ლიკიშ რეფრაქტორული ტელესკოპი, რეფრაქტორი კროსლი, კაცმანიშ რობოტული ტელესკოპი დო შხვეფი.