დიდი ობიშხა

დიდი ობიშხა, მაჟირანეროჭითა ობიშხა, ნებაშ მარაშ ობიშხა დღა. დაწესჷ ქირსიანულ ოხვამექ თი დღაშ ეიოშინალო, მუჟამსჷთ იოსე ქირსე ჯვარს მაცუნესჷნ. ათე მოლინაშ სახარებაშული ინტერპრეტაცია თეჯგურა რე:

იოსეშ მოჯოგე პაპათარეფქ იუდაშ შენწირებათ ოჭოფეს იოსე დო წჷმურინეს ურიასტანიშ მამართალს პონტოალ პილატეს დო თიში ჯვარს მოცუნაფა მითხუეს. თინა გოლგოთაშ გვალაშა გეკიჸონეს, სოდე ურიეფი დჷმაშებუეფს ღურათ ასაჯენდესჷნ. თინწკჷმა პასექიშ დღახუ რდჷ დო ართი დასაჯაფალიშ გოდუდიშულაფა შილებედჷ. პილატექ გვერი ბარაბა გაგჷშეჸონჷ დო ქოკითხჷ: ნამუ გუადუდიშულათია. კათაქ ბარაბაშ გოდუდიშულაფა მითხუ. პილატე ვარდჷ დორწუმაფილი ქირსეშ დჷნოშურს, მარა კათაშ არყებას მუთხილუ, ტაშტი ქჷმაღალაფუ, ხელეფი გიბონჷ დო თქუ: თე საქვარს მა უბრალე ვორექია. თეშ უკული, კათაშ მოთხუალათ, იოსე ქირსე ჯვარს აცუნეს.