ანტონიო ვივალდი

ვივალდიშ ოეგებიე პორტრეტი

ანტონიო ლუჩიო ვივალდი (იტალ. Antonio Lucio Vivaldi; დ. 4 მელახი, 1678, ვენეცია ― ღ. 28 კვირკვე, 1741, ვენა), მეტსახელი Il Prete Rosso („ჭითა პაპა“), რდჷ ვენეციარი პაპა, ბაროკოშ ეპოქაშ კომპოზიტორი დო მევიოლინე. თიში ოთხი ოვიოლინე კონცერტი, „წარმოწანაშ ბორჯეფი“, ორხველჷ ბაროკოშ ეპოქაშ ართ-ართი არძოშე პოპულარული მუსიკალური ნაწარმებუს.

[რედაქტირაფა] ბიოგრაფია

ანტონიო ვივალდიქ დებად 1678 წანაშ მელახის, ნოღა ვენეციას. ჭიჭე ანტონიო დაბადებაშ ბორჯის დონათეს. კჷლმაძიარეფიშ ვარაუდით, ახალ დაბადებულც ვარა სინთელეშ პრობლემა უღუდუ, ვარა მერსხილი რდჷ თი დიხაშ ნწალუაშა, ნამუთ ვივალდიშ დაბადებაშ დღას უძანძუანდ ნოღას. მორო, საეკლესიო ნათუაქ მოხვად მუში დაბადებაშე ჟირი თუთაშ უკული.

ვიოლინოშ მეგამა ანტონიოქ მუმაშე, ჯოვანი ბატისტაშე დიგურუ. ჯოვანი ბატისტა რდჷ ართ-ართი Sovvegno dei musicisti di Santa Cecilia-შ დუმარსხუაფალი, ნამუთ წჷმმარინუანდ მუსიკოსეფიშ დო კომპოზიტორეფიშ ართნერი პროფესიული გოართამაფას. თე ასოციაციაშ პრეზიდენტი რდჷ ჯოფანი ლეგრენზი, სან-მარკოშ ბაზილიკაშ კაპელაშ მაესტრო, ნამუქუთ ორდოამი ასაკისჷთ აწუჩჷ ჭიჭე ანტონიოს დიდი მუსიკალური მუმალი. მუჭოთ რჩქჷ ვივალდიშ სინთელეწკჷმა მერსხილი პრობლემა თიშნერი მენორსამი რდჷ, ნამდა თის ვა შეალებუ ქუდუგურუაფუდუკო ოშურე ინსტრუმენტეფიშ მეგამა, შურღალაშ უბაღინაფუობაშ გეშა.

15 წანერქ, 1693 წანას თიქ გურაფა დიჭყჷ ოშურიელე ოგურაფალც დო თიწკჷმა თიში ღანკი რდჷ პაპა გჷშურთუმუდუკო. 1703 წანას, 25 წანერქ ქოთ იკურთხუ პაპათ დო თიწკჷმა თიშ მეტსახელი რდჷ Prete Rosso, ვარა "ჭითა პაპა", ოეგებიეთ თიში ჭითა თუმეფიშ გეშა. ჭე მოგვიანაფილო, დოხოლაფირო 1704 წანას, თის მუში სინთელეშ დგომარებაშ გეშა უვარიეს ოდღახუე ლიტურღიაშ ჩატარება. ათავრეშე მოჸუნაფილი თინა ჭიეჭიეთ მუკმაჩირთუ აქტიური პრაქტიკას, მორო იშენი სქიდუდ პაპათ.

Ospedale della Pietà-ში, 1703 წანაშ ეკენიას ვივალდიქ გინირთ Ospedale della Pietà-შ ოჸურჩეს maestro di violino (ვიოლინოშ მაგურაფალო). ვენეციას გვალო 4 ათეშნერი დოწესაფილაფა რდჷ. თინეფიშ ღანკი რდჷ ქიმუჩამუდესკო განათლება დო გეურდუდესკონ წჷმოტებული, ომბოლი დო უღვეჯი ფანიაშ სქუალეფი. თინეფი იფინანსებუდეს რესპუბლიკაშ ფონდეფშე.ბოშეფი ქიდიგურუანდეს ვაჭრუას დო ოჸურჩეს ტებულენდეს 15 წანაშ ასაკის, ოდო ცირეფი ღებულენდეს მუსიკალურ განათლებას დო არძოშე ნიჭიერეფი გინმირთუდესOspedale della Pietà-შ ბუნაშ დო ორკესტრიშ მაკათურეფო.

ანტონიო ვივალდიშ თე თანამდებობას დორინაფაშე მალას ომბოლეფიშ ოჸურჩესშ ეიორდალეფიშ ბუნაქ ქმიშუ დიდი ჯოხო დო პატიცემა რესპუბლიკაშ თანჯეფც გალეთ. წორეთ ვივალდიქ დოჭარჷ თინეფიშ კონცერტეფიშ, კანტატეფიშ დო ოშურიელე მუსიკაშ უმენტაში ნორთი. მორო კომპოზიტორიშ მერინა Ospedale della Pietà-ს დუდალაწკჷმა ობაღინაფალაო აშჷმოთებული რდჷ. მადუდურეფიშ სხუნუ ირი წანას ონწყუნდ კალიშ ღვაფას მაგურაფალეფიშ გჷშაგორუაშ გეშა. მორო, ოკო ირაგადუას, ნამდა ვივალდიშ დოტებაშე კალიშ ღვაფა ირო გადარით ითებუდ დო 1709 წანას დიდი კომპოზიტორქ მიოდინუ თე სამუშა 7 ხონარით 6-იშ მეხჵ. ოდო ართი წანაშ უკული, მუჭოთ შტატგალენი მუსიკოსი კინე დართინეს ოსპედალეშა. მუჭოთ რჩქუნ დუდალობუაქ დერწუმ თიშ გენიალობას. უკვე 1713 წანას თიქ გინირთჷ თე დოწესაფილაფაშ მუსიკალურ ქიმერონიშ გამამინჯეთ. ოდო 1716 წანას წჷმუძინეს დო გეჭოფჷ ჯოხოდვალა maestro di' concerti.

წორეთ თე წანეფც დოჭარჷ ვივალდიქ მუში მუსიკალური ნაწარმონებეფიშ უმენტაშობა, თინეფ შქას მიარე ოპერა დო კონცერტი.

1705 წანას გჷშეშკ მუში ნაწარმონებეფიშ მაართა კორობილქ Opus 1, ნამუთ იკათუანდ ჟირი ვიოლინოშ 12 სონატას. 1709 წანას გჷშეშკჷ მაჟირა კორობილქ Opus 2. 1718 წანას ვივალდიქ დიჭყ შარალუა. მუში ხშირი შარალუაშ უმკუჯინუო Ospedale della Pietà ყაბულც რდჷ თიშო ხეშფარა ჷნუგაფუდუკონ, კომპოზიტორითინეფც დუჭარუნდ თუთას ჟირი კონცერტის დო ჩაატარენდ მეცადინეობას ხუთშა იშენ და თიმ ბორჯის, მუჟამც ვენეციას რდჷნ. ანგარიშთინუაშ ფურცელეფი მაუჭყაფუანა, ნამდა თიქ 1723-1733 წანეფც თის 140 კონცერტიშ დოჭარუაშ ფხეშფარა გუნუგეს. მუსხირენ თეატრი, ნამუეფუთ ირონი კონკურენციას რდეს ართიანწკმა. ვივალდიშ მაართა ოპერა Ottone in villa- ქ დიდგუ 1713 წანას ვენეციას ვარინ განზერიას ვიჩენცაშ თეატრის.გეჸვენჯი წანას ვივალდიქ უკვე ვენეციაშა გჷნილჷ დო გჷნირთჷ Sant'Angel-იშ თეატრიშ იმპრესარიოთ, სოდეთ დოდგეს თიში ოპერა Orlando finto pazzo (RV 727). მორო თე ოპერა ვა გამულენდ თიჟამიშ მაჯინეშ მოთხუალეფც, ათეშეჟირი მარაშ უკული ვივალდიქ აძულებურქ იჸუ მუნწყუმუდუკო თინა თეატრიშ რეპერტუარშე დო დუთირუდუკო თიმ ბორჯიშო უმოსი პოპულარული წჷმორინაფათ. 1715 წანას თიქ მაჯინეს აწურინუ ოპერა Nerone fatto Cesare (RV 724, დინაფილიე). თენა რდჷ შქვითი ომპოზიტორიშ ქიმინელი ოპერა, სოდეთ ვივალდი რდჷ ლიდერი. ეჟამც ოპერას დიდი წჷმოძნაქ ხვადჷ თიათ.

1716 წანას ვივალდიქ დოჭარხოლო ჟირი ოპერა L'incoronazione di Dario (RV 719) დო La costanza trionfante degli amori e degli odi (RV 706). ეკონია თინეფშეიანქ თინერი პოპულარულო გჷნირთ ნამდა ჟირი წანაშ უკული უკვე თირელი დო გადამუშებული Artabano re dei Parti (RV 701, დინაფილიე) იდგუმუდ შხვადოშხვა თეატრეფიშ სცენებფც დო ოეკონიეთ 1732 წანას პრაღასჷთ ქჷდიდგჷ. წორეთ თე პერიოდის დოჭარჷ ანტონიო ვივალდიქ ჩინებული წარმოწანაშ ბორჯეფი, ნამუთ წჷმმარინუანც ვიოლინოშ 4 კონცერტის. მუჭოთ იარგამებუნ თე მუსიკაშ დოჭარუაშ მილმაჩამალი წყუს წჷმმარინუანდ მანტუაშ გოხ რენჯი სქვამი ოფუტეშ ელჷ-მოლჷ. თე ნაწარმებუქ მახვამილუ რევოლუცია მუსიკალური კონცეფციას. თინეფც გენიალური კომპოზიტორქ არგამას დოხანტჷ მაფერიშ ხარჩალი, ჩიტეფიშ ღურჭული, ჯოღორეფიშ ლალაფი, მეშხურეეფიშ წჷმოძახინეფი, შტორმი, წყჷნარი სერეფი, გოჸინილი პეიზაჟეფი, დაჩხირიშ კიალი. არძო თე სცენა თოლწოხ წჷმომდირთუნა თეგენიალური მუსიკაშ მოსიმაფა შვანც.

მუში კარიერაშ კონკას კომპოზიტორქ ოჭარჷ საქორწილო კანტანტა Gloria e Imeneo (RV 687), სპეციალურო ლუი XV-იშ ქორწინებაშოთ მეჯღუნილი დო La Cetra მეჯღუნილი იმპერატორ ჩარლზ VI-შა. 1728 წანას თინაქ პირადო შეხვად იმპერატორს ტრიესტის, პორტიშ კიდუაბორც გჷმულირც. ჩარლზის თეშ მეწონჷ "ჭითა პაპაშ" მუსიკაქ, ნამდა თქნაქ თიმ დღას თიშე უმოსი ეჩჲუ კომპოზიტორს, ვინდარო ალბეთ არძო მინისტრის ჟირი ანაშ აშაბანც. თიქ ვივალდის ქიმეჩჷ რაინდიშ ჯოხოდვალა, ორქოშ მედალი დო ვენაშა ქიმიჭანუ.მუშ ჸურე კომპოზიტორქ იმპერატორს გეგნოჩჷ La Cetra-შ ხეშნაჭარაშ ანგი.

1730 წანას მუმაშ ალმარენჯობათ ვივალდი შარალენც ვენას დ პრაღას, სოდეთ დოდგჷ მუში ოპერა Farnace. თე პერიოდიშ შხვა კომპოზიტორეფიშ ნერომ ვივალდიქჷთ თეალარაშ ეკონია წანეფს წისაფულენდ ფინანსურ გაჭირებას. თიშ ნაწარმონებეფი უკვე ავა რგებაფულენდეს პოპულარობათ, მუსიკალური გემოვნებაშ თირაფალაქ თინეფი მალას მოდაშე გჷნოლაფირო გჷნაშკჷ. მუდგაშ გეშათ ვივალდიქ აძულებურქ იჸუ მუში ხეშნაჭარეფიშ უმენტაშობა ძალამი დაბალ ფასშა გეგმუჩამუდუკო, ვენას მუში რინა უნარღელი ჸოფედუკონი. ამდღარშახ უჩინებუე ვივალდიშ ვენეციაშე ულაშ ბაძაძი. მორო კჷლმაგორალეფიშ ორთიშ ვარაუდენა, ნამდა თინაქ ვენაშა იმპერატორწკჷმა აკახვამილაფალო იშარჷ, მარა თიში ვენაშა დინულაშე ჭიჭე ხანც იმპერატორქ დოღურჷ. უიღბლობაშ თე მონკა გეშკუმალაქ კომპოზიტორი ვენას აორთიშ წყუშ დო იმპერატორიშ თხილუაშ უმშო ქიდიტუ. ვივალდიქ ღურუ 1741 წანაშ 27 ვარა 28 კვირკვეს დინახალენი ორგანოეფიშ ინფექციათ, ნაქირებუ ჸუდეს. 28 კვირკვეს დასაფულეს ღარიბეფიშ ოლეხეშ ოზეს, ნამუთ იდვალუაფუდ წიმინდე კარლიშ ჯოხონობაშ ოხვამეწკჷმა. თე სასაფლას ასაფლენდეს ღურამესარჯაფილი დამნაშავეეფსთ. თიშ გეშა ნამდა თე სასაფლაქ 1783 წანას დიკილუნ, შელებუანი ვა რე თიში დოდგინა, სო რე დასაფლებური ა. ვივალდინ. 1815 დო 1818 წანეფც თი ტერიტორიას, სოდეთ სასაფლა რდჷნ, ეიკიდჷ ვენაშ ტექნიკური უნივერსიტეტიქ. 1978 წანას, ანტონიო ვივალდიშ დაბადებაშე 300 წანაშ დუდწკჷმა მერსხუაფათ, უნივერსიტეტიშ წოხოლე დიდგინ მემორიალური დაფაქ, ბაროკოშ ეპოქაშ დიდი კომპოზიტორიშ ჯოხოშ უღურალჸოფაშო.