ბასკური ნინა
ბასკური ნინა - ბასკეფიშ ნინა, ზოხორინელი ნინა რე. თიში გოფაჩუაში არეალი რე ესპანეთიშ დო საფრანგეთიშ პროვინციეფი, ნამუეფუთ უხურგანა ბისკაიაშ ჸუც. ფორუნს თაშნეშე პირენეიშ გვალეფიშ ბჟადალუ ნორთის.
ბასკური ხვალახე წჷმოსქილადირი ნინა რე, ნამუდგათ რაგადანდ ობჟათე-ბჟადალუ ევროპაშ მახორობა თე რეგიონიშ რომანიზაციაშახ. ფირქენა, ნამდა თე რეგიონს რომიშ ადმინისტრაციაშ შაურთია მართველუაქ გჷნასქილიდუ ბასკური დიალექტეფი ლათინურიშ მონძალუაშე. შქა ოშწანურეფს, ბასკური, მუჭოთ მეტწილო ჸაზახობაშ ნინა, ვა უწიენდ კონკურენციას ლათინურს დო მუშ მონძე ოჭარუ ნინეფს. მა-10 ოშწანურაშე ბასკურქ ჭიე-ჭიეთ მიოდინუ ღარჯილი კასტილიურ ესპანურწკჷმა რკინს. თეშ უმკუჯინუო, ოორუეს (თეჟამიშ საფრანგეთი) ბასკურო მორაგადე რეგიონი პრაქტიკულო თიშნერიე კინ, მუჭოთ მა-16 ოშწანურას რდჷნ. ეკონია ჟირი ოშწანურაშ აშაბანს, ბასკურ ნინას უხვად ლჷმა გინოსქილადაშო ხვალე ინდუსტრიულ ნოღეფს დო ბასკეთიშ ხურგეფწკჷმა ვარინ, მუშ შქაგურონასჷთ.
