ბექა ადამაშვილი

ბექა ადამაშვილი
დაბადებაშ თარიღი:	1990 (33–34 წანერი)
დაბადებაშ აბანი:	ქართი
ერუანობა:	ქორთუ
საქვარუა:	ჭარუ, ჟურნალისტი, იუმორისტი, ბლოგერი
პერიოდი :	2009 - ასეშა
Magnum opus:	ბესტსელერი
ჟანრი:	სატირა დო ფენტეზი

ბექა ადამაშვილი (დ. ?/?, 1990, ქართი) — თეხანური ქორთუ ჭარუ, ჟურნალისტი, იუმორისტი დო ბლოგერი. ჩინებულო გჷნირთჷ მაართა სატირული რომანით – „ბესტსელერი“ (2014).

ბიოგრაფია

ბექა ადამაშვილქ დებადჷ ქართის, 1990 წანას. 2007 წანას, სკოლაშ თებაშ უკული გურაფა დიჭყჷ კავკაციაშ უნივერსიტეტიშ მედია სკოლაშ ჟურნალისტიკაშ დო სოციალური მენცარობეფიშ ფაკულტეტის. ბექაშ ორდოიანი თხობელუეფი იბეშტუდჷ შხვადოშხვა პერიოდულ გიშაშქუმალეფს დო გაზეთეფს. თიში ართ–ართქ თხობელუაქ, ჯოხოდვალა "ჭვემაშ ჭვათი" გემშართჷ ქიმიაშ ოსკოლე ოხემანჯღვერუეშა.

2009 წანაშე 2013 წანაშახ, ბექა ირო ობჟინუანდჷ სატირულ–იუმორისტულ სტატიედს დორხველჷ ბლოგის (www.doin.ge), რინაშულ დო სოციალურ თემეფიშ გეშა. თიში ბლოგეფი გიშაკერზაფილო პოპულარული რდჷ ახალნორდეფს. მუჭოთ ბლოგერქ, თიქ ანდა კონკურსის გიმორძგჷ.

2013 წანას, ბექა ადამაშვილი ოკათუდჷ „შემოდგომის ლეგენდაშ“ ლიტერატურულ კონკურსის, სოდე ჭარილჷ თხობელუაქ „XXVIII: წერტილი“, მაართა ჯილდო მოუღჷ. თიშ შხვადოშხვა თხობელუეფქ გიბჟინჷ ლიტერატურულ ჟურნალეფს, თინეფს შქას „ცისკარს“ დო „ანეულს“.

2014 წანას, ბექაქ ჭარჷ მაართა რომანი – „ბესტსელერი“, ნამუთ კჷნ მუში რაგადით რე „სატირულ-პაროდიულ-დეტექტიურ-დუდოტახ-ფენტეზ-ფანტაზ-დოხოლომუდგაქდუმასქიდჷნ“ ჟანრიშ რომანი ლიტერატურაშ გეშა, ლიტერატურულ კლიშეეფშენ, ჩინებულ ჭარუეფშენ, ჩინებულ პერსონაჟეფშე, დო თი ირფელშენ, ნამუთ წინგეფს სასიამნე ემოციეფს მოიღანა, ვარ-და უბრალოთ - ნერვეფს მოიფაჩჷნან.

ბესტსელერი, ნამუთ რე სატირა ლიტერატურულ კლიშეეფშენ, მალას გჷნირთჷ პოპულარულო ქორთულ ჯარალუას დო თიჯგურა ლიტერატურული პრემიეფიშ ერკებულს მოხვადჷ, მუჭოთ რე: „საბა“ დო „წინანდლის პრემია“. ბექა ადამაშვილი ასეშო სცენარისტო მუშენს ჩინებულ პოლიტიკურ–სატირულ შოუს ჯოხოთ „ვასიკო ოდიშვილის ყოველდღიური ამბები“.

2021 წანაშ 7 მესის, ბექა ადამაშვილქ გინოჩამა „მთავარ ჭკვიანს“ 50 000 ლარი მიგჷ.

ბიბლიოგრაფია

• „ბესტსელერი“ — ბაკურ სულაკაურიშ გაშაშქუმალა (2014) ISBN 978-9941-23-244-2
• „ამ რომანში ყველა კვდება“ — ბაკურ სულაკაურიშ გიშაშქუმალა (2018) ISBN 9789941301995

ჯილდოეფი

• 2013 — ლიტერატურული პრემია „შემოდგომის ლეგენდა“ თარი პრიზი ოდებიუტე თხობელუაშო „XXVIII: წერტილი“.

რესურსეფი ინტერნეტის

• „შემოდგომის ლეგენდა 2013“
• ბექა ადამაშვილი – Goodreads.com
• Book.Gov.Ge - Beka Adamashvili
• ბექა ადამაშვილი – ბაკურ სულაკაურიშ გიშაშქუმალა