ეიფელიშ ჸორში
ეიფელიშ ჸორში (ფრანგ. Tour Eiffel) — ლითონიშ კონსტრუქცია რე შამ-დე-მარსის, სენაწკჷმა, პარიზის. თენა პარიზიშ არძაშე უმაღალაშ სტრუქტურა დო საფრანგეთიშ არძაშე ჩინებული სიმბოლო რე. ჯოხოქ გიადუ პროექტიშ ავტორიშ ინჟინერი გუსტავ ეიფელიშ პატიჩამაშე დო თინა ნოღაშ არძაშე უმოს პოპულარული ტურისტული კულტურული ქილინჯი რე, ნამუსჷთ წანმოწანას 5,5 მილიონიშ უმოსი დჷმათოლიარაფალი ჸუნსჷ.
დინორე |
[რედაქტირაფა] სტატისტიკა
ჸორშიშ სიმაღალა 300 მეტრა რე, მუთ მეხოლაფირო 75 სართულზმა რე. თიშ დუს 24 მეტრაშ სიმაღალაშ ანტენა რე, მუთ სტრუქტურაშ ედომიშ სიმაღალას 324 მ ნიშნულშა უკინანს. კიდუაშ ჟამს, 1889 წანას, ეიფელიშ ჸორში არძაშე უმაღალაშ სტრუქტურა რდჷ საგებიოს, ტიტული, ნამუთით თიქ 1930 წანაშე შინარჩუნუ, მუჟამსით ნიუ-იორკიშ კრაისლერ ბილდინგიშ (319 მ) კიდუაქ გეთუ, მარა ეიფელი იშენით უწულუანდუ თის სიმაღალაშა თუ თე სტრუქტურეფიშ ანძეფი ენიკოროცხუდუ სიმაღალას. თეჟამშო ეიფელიშ ჸორში საფრანგეთის სიმაღალათ მაჟირა სტრუქტურა რე, 350 მ სიმაღალაშ ალუიშ გინძე პოპორეფიშ გინმაჩამალ ანძაშ (1939) ეგაფაშ უკული. გეჸვენჯო მოურს ლა ტურ მონპარნასი, პარიზიშ მონპარნასიშ უბანს (209 მ). ჸორშიშ ლითონიშ სტრუქტურა 7.300 ტონას იწონენს, თიში ედომიშ წონა 10.100 ტონა რე. ჟიდონ პლატფორმას ეშაულარი ოკუჩხურიშ მუდანობა ითირუაფუდუ ჸორშიშ ისტორიაშ მიმალუას, მუზმარენ რენოვაციაშ შედეგო: კიდუაშ მომენტის 1889 წანას 1710 ოკუჩხური გეშეშუ სამიტიშ პლატფორმას 300.65 მ ღანკილს; 1980 წანაშ რენოვაციაშ უკული ოკუჩხურეფიშ მუდანობაქ 1920-შახ მირდუ; თეჟამიშო 1665 ოკუჩხურიე, მარა ჟიდონ პლატფორმას ოკუჩხურეფით ეშულა უშულებუ რე დო გუმაჯინეეფს ხვალე ლიფტეფიშ გჷმორინაფა შეულებუნა.
ჰავაშ ტემპერატურაშ მიკოჯინათ ეიფელიშ ჸორშიშ დუდი შილებე ბჟაშე გინოფურაფაშ გურშენ 8 სმ-შახ გინიკინას, ჩხანაშა მეფიცხინაფილ ჸურეშე ლითონიშ გოფართანაფაშენ.
ჸორშიშ რემონტი ეკიდგინანს ირ 7 წარმოწანას 50 ტონა 3 ფა ოღაფუშ სუმალას კონსტრუქციაშ ლითონიშ ჟიპიჯიშ ღანჯიშე ოთხილარო. ხანმორკებათ ოღაფუშ ფერი ითირუ. თეჟამიშო ჸორში მოყავაშფერო რე ღაფილი. მაართა სართულს ინტერაქტიული კონსოლეფიე მონტაჟელი, ნამუსით მაკორნეეფს შეულებუნა გეგშაგორანი ჸორშიშ მუმალი ფერი.
[რედაქტირაფა] ისტორია
სტრუქტურა იკიდუაფუდუ 1887 - 1989 წანეფს მუჭოთ ექსპო-იუნივერსელიშ მიშაულარი (1889), საგებიო გჷმობჟინაფა, ნამუთ საფრანგეთიშ რევოლუციაშ 100 წანაშდუდიშ ეკაღანკალო იგეგმებუდუ. თიში გეოგრაფიული კოორდინატეფი რე 48°51′29″N, 2°17′40″E. ჸორშიშ ინაუგურაციაქ იჸუ 1889 წანაშ 31 მელახის, დო ჯარალუაშო თიქ 6 მესიშო გინწყჷ. 300 მუშაქ ეიონწყუ 18.038 ლითონიშ (სუფთა სტრუქტურული ფულანდიშ ფორმა) რხვილებამი კონსოლი, გიმირინეს 2.5 მილიონი ჭანჭიკი, მორიშ კოხლინიშ სტრუქტურაშ პროექტით.
ჩილათაშ რისკი ძალამ დიდი რდჷ, თიშენ ნამუდა თეხანური ცაშმედგუეფშე გოშხვანერაფილო ჸორშის ნჯაფილ ჩონჩხი უღუ ოშკარი სართულეფიშ უმშო, ჟირი პლატფორმაშ მეტი. მარა, თიშენ ნამუდა ეიფელქ ოწმოხი ზიმეფი ქიმიღუ მუშეფიშ უშქურანჯობაშო, კიდუაშ ჟამს ხვალე ართიქ დოღურუ თინეფიშე, ოტისიშ ლიფტეფიშ მონტაჟაფაჟამს.
დუდმაართათ ჯარალუა ჸორშიშ კონწარ მოვარიე რდჷ, თიშენ ნამუდა უმენტაშობას თინა თოლს ძიგირო ხვადუდუ. მარა თეხანიშო თინა საგებიოს ართ-ართ არძაშე წარმტაც სტრუქტურულ ხელობუაშ მინუშო მიირჩქინუაფუ.
ჰოლივუდიშ ართი არძაშე დიდი კლიშე რე - პარიზული ოსინთურიშე ვანათურო ოკო ჩქუდას ეიფელიშ ჸორში. რეალურო, ზონური აკობორკუაშ გურშენი პარიზის ნოდგუმეფიშ სიმაღალეშა თანჯა მუზმარენ სართულით გიხოლუ დო თეშენ ხვალე მუზმარენი ალაზიმაფილო მაღალ ნოდგუმს უღუ ჸორშიშა წკონდა ხედი.
დუდმაართათ ეიფელს ალობა უღუდუ ნადგველი ჸორში 20 წანათ გედგუკონი, დორხველი ხარჯეფიშ ეშაღალარო, მარა მოგვიანაფათი ჸორშიქ საკომუნიკაციო დანიშნულებათ ქიმიღუ დო ვადაშ გულაშ უკულით გინოჭყორდუ თიში დოტებაქ.
