კავკაციური ჸვანჩელა (ლათ. Lyrurus mlokosiewiczi, Tetrao mlokosiewiczi) — მაფურინჯე ჸვანჩელაშობურეფიშ ფანიაშე. მეგორაფილი რე ლაგოდეხიშ ტყაჩირიშ ტერიტორიას 1875 წანას პოლონარი ორთაშმორაგადე ლუდვიკ მლოკოსიევიჩიშით. ხე თარი კავკაციონიშ ქჷნდჷრს დო მორჩილ კავკაციონიშ ალპურ ველეფს ზუღაშ დონეშე 1500-3000 მ-შახ. ზოთონჯის ტყას მიკმაფორუანს დუდს. მუმული კავკაციური ჸვანჩელა უჩა რე, განთხიშ ანკირაშ ბურდღა გიმე უღჷ მოკეკილი. დადული ჭერჭე რე. ოგვაჯეს დიხას იკეთენს. დვანს 2-10 მარქვალს. ჭკომჷნა თასის, კანკარს, ხილს, ჭყინტუ გუნაფალეფით დო ფურცელეფით, ღვენწკეფით, ფერწოეფუთ. კავკაციური ჸუანჩელა ჩქინი ფაუნაშ ანდაღებული წჷმმარინაფალი რე დო თის ირდიხას თხილანა. მიშაღალირი რე საქორთუოშ „ჭითა წინგიშა“ დო ლაგოდეხის ჸუანჩელაშ 700-შახ ინდივიდი ხე.
