ჯასთინ ბიბერი
| ჯასთინ ბიბერი | ||
|---|---|---|
 ჯასთინ ბიბერი 2012 წანას
|
||
| ბიოგრაფია | ||
| თახმი ჯოხო | ჯასთინ დრიუ ბიბერი | |
| დებადჷ | 1 მელახი, 1994 | |
| ბადებაშ აბანი | სტრეტფორდი, ონტარიო, კანადა | |
| ჟანრ(ეფ)ი | პოპ მუსიკა, ალმახანური რ’ნ’ბ | |
| საქვარუა | მობირე, ბირეფიშ ავტორი, მუსიკოსი | |
| ინსტრუმენტ(ეფ)ი | ვოკალი, გიტარა, ფორტეპიანო, პერკუსია | |
| აქტიური | 2009–ამუდღარშახ | |
| ლეიბლ(ეფ)ი | Island, RBMG | |
| ასოციაციეფი | აშერი | |
| ვებ-ხასჷლა | justinbiebermusic.com | |
ჯასთინ დრიუ ბიბერი (ინგლ. Justin Drew Bieber) (IPA: [ˈbiːbər])- (დ. 1 მელახი, 1994) რე კანადარი პოპ/რ’ნ’ბ მობირე. თიში კარიერაქ დიჭყჷ Youtube–ით, მუჟამსჷთ 2007 წანაშე თიქ დიჭყჷ დორხველი ვიდეოეფიშ Youtube-ის გჷმობჟინაფან. თინას მოგვიანაფილო მიოგორუ სკუტერ ბრაუნქ, ნამუქუთ ალაჩამა თხუ აშერს, სოიშახ ბიბერქ ხე მაჭარჷ „Island Records“-წკჷმან. ოგურიშხონარუ რე, ნამუდა ბიბერქ მუშით დიგურუ პიანინოშ, დოლიშ, გიტარაშ დო ოჸეშ მეგამა.
დინორე |
ბიოგრაფია [რედაქტირაფა]
ჯასთინ ბიბერქ 1994 წანაშ 1 მელახის სტრეტფორდის, კანადაშ პროვინცია ონტარიოს დებადჷ. მუსიკალური მუნაჩემეფქ ჯასთინს მასქერეფშე გჷმაჸუნჷ: მუმა, ჯერემი ბიბერი, გიტარაშ მეგამას აფუდჷ ხვამილაფირი, დო ნანა, პეტი მალეტე, ნამუსჷთ თეშ წოხოლე ჟურნალი „ფლეიბოიქ“ ტარკალე ფოტოსესიაშ მონწყუალაშენ ობაღინაფალო საინტერესო ჰონორარი მიარზუ, ართ ჟამს მენდიშმუმაჩამალ ვოკალისტო იკოროცხუდჷ. რთული დაჯერებელი რე, ნამუდა ბირათ ჯასთინქ გვალო მუზმარენ წანა რე დეინტერესჷნ, თით უმოსო, ნამუდა 2 წანაშე თინა ინტერესის გიმირჩქინუანდჷ შხვადოშხვა მუსიკალურ ინსტრუმენტიშ, გჷშაკერძაფილო – გიოშქუმალარი ინსტრუმენტეფიშ გეზათ. ბაღანობას ჯასთინი მუსიკაშ გოკვათილეფშა გილეშჷ დო თეჟამს თის პროფესიონალურ დონეშა შეულებჷ მეგამა გიოშქუმალარი, სიმეფამ დო კლავიშეფამ ინსტრუმენტეფს. 12 წანერი ჯასთინქ აკათჷ აბანობურ ვოკალური კონკურსის „სტრეტფორდ აიდოლი“ დო, თიშ უმკუჯინუო, ნამუდა თიში კონკურენტეფი კონკურსიშახ სერიოზულო რდეს დაკებული მუსიკათ, დო ჯასთინი ხვალე დიდაშ თოჸუჯიშ თუდო, ჸუდეს იბირდუნ, თიქ მაჟირა აბანიშ დაკება ქუმიხუჯუ. თი ჟამს ახალი გონწყუმილი რდჷ მუსიკალური პორტალი „Youtube“, სოდგათ შხვადოშხვა კატეგორიაშ ვიდეოფაილეფიშ დოდვალა შილებედჷ. წორას თე საიტის ქიგედჷ ჯასთინიშ დიდაქ ჸუდეს გინოღალირი მუსხირენი ომოჸოროფული მუსიკალური რულე. თე რულეეფს ძალამი მალას გურჩქინდჷ პატიშმემაჩამალეფიშ ედომუშამ არმიაქ, ნამუეფჷთ დიო ხოლო 2007 წანას ანტკიცენდეს, ნამუდა ჯასთინ ბიბერი მოსოფელიშ დონეშ მურიცხო გინირთუდჷნ.
კარიერა [რედაქტირაფა]
წორას „Youtube-შე“ დეინტერსჷ მენეჯერი სკუტერ ბრაუნქ ჯასთინით დო ინტერნეტიშ მეშქაშალათ ბიბერეფიშ ფანიას ქჷმიარსხუ დო წორომოხანდობა მიარზუ. თიმ წანას ჯასთინქ ბრაუნწკჷმა ართო ატლანტაშა მიდართჷ, სოდგათ ჩინებულ რეპერი დო პროდიუსერი აშერი გეჩინებაფუ. თიშ უმკუჯინუო, ნამუდა ჯასთინი აშერწკჷმა აკოხვალამაშ ჟამს 13 წანერი რდჷნ, მურიცხიქ ქიდეჯერჷ თიში ნიჭი დო ფსუაჩანაფილქ ქუდოსქიდჷ თიში ვოკალური შუულობათ. აშერწკჷმა ართო ჯასთინქ „Island Records-შა“ ქიმერთჷ, სოდგათ თის მურჩქილუეს დო 2008 წანას მაართა ოფიციალური კონტრაქტი გუფორმეს. ინტერესუანი რე, ნამუდა კონტრაქტიშ მეჯინათ, ჯასთინს მუშით ოკო გინუჭყვადუდუკო, მიწკჷმა უსხუნუდჷ წოროხანდუან, – აშერწკჷმა დო ვარი ჯასთინ თიმბერლეიქწკჷმან. ოეკონიეთ ჯასთინქ აშერწკჷმა წოროხანდუა ისხუნუ დო მუჭოთ მუსიკალური ექსპერტეფი ჭარუნან, თიქ თინი გიშაგორუა ქიმინჷ. თიმ წანას ჯასთინ ბიბერი ააშ–იშ არძაშე უმოსო მენდიშმუმაჩამალ პოპ-მარსულებერო მირჩქინეს, დო მოსოფლეს თის „Teen Singing Sensation“-ს ვარა „თინეიჯერი მობირე სენსაციას“ უძახჷნა.
2009 წანას ჯასთინ ბიბერქ მაართა სინგლი – „One Time“ გიშაშქჷ, მუქუთ უნელო გინირთჷ მოსოფელიშ დონეშ ჰიტო. თიში ვანორმალური ფანი-ცირეფი ქოთ ჩხუპენდეს მუსიკალური მაღაზიეფს, თიშენ ნამუდა ქუჭიშუაფუდესკონ ართიანშა სინგლიშ ჸიდირი, მუქუთ გჷშაშქუმალაშე დეფიციტურო გინირთუნ. გჷშაშქუმალაშე 2 მარაშა სინგლიქ მა-12 აბანი დეკინჷ „კანადაშ ჩხე პოპ-ოშარს“, დო მაართა ალბომი, ჯოხოდვალათ „My World“, ჯასთინ ბიბერქ 2009 წანაშ დამორჩილს გიშაშქჷ. ალბომქ მალას ქჷმიპალუ პოპულარობა თინეიჯერეფ შქას, დო კლიპეფქ ბირეფშე „One Time“ დო „One Less Lonelygirl“, „ემტივიშ“ ჰიტ-აღლუმეფი ქჷდეკინეს.
2010 წანაშ მელახის გიშართჷ ჯასთინ ბიბერიშ მაართა ალბომიშ ედოუშამი ვერსიაქ – „My World 2.0“. ალბომიშ გიშულას წოხოლე ოჯღონდჷ სინგლიშ დო კლიპიშ – „Baby-შ“ გიშულა, ნამუეფქუთ, შილებე ირაგადინასინ, აფეთქჷ მუსიკალური ჰიტ-აღლუმეფი. კლიპიქ თიზჷმაშა პოპულარულო გინირთჷ, ნამუდა ხვალე „Youtube-ის“ თინა 250 მილიონი ადამიერქ ქოძირჷ, მუდგათ საიტიშ რეკორდი ქუდარსხუ დო წოხოლენ რეკორდიშ მაღვენჯი – ლეიდი გაგა გურგაჩამალო ქიკნიტუ უკოხოლე. ოშინალი რე, ნამუდა ჯასთინ ბიბერქ გინირთჷ მაართა პოპ-მარსულებერო, ნამუშ ართჟამო შქვითხოლო ბირაქ ამერიკაშ არძაშე პრესტიჟულ ჩარტის – „ბილბორდ ტოპ 100-ის“ მოხვადჷნ.
ჯასთინი რე არძაშე ჭიჭე მურიცხი, ნამუშ გეშათ ხანტილურ ფილმის გინიღანან. ფილმიშ რეჟისორი, ჯონ ჩუა რე, ნამუთ ავტორი რე პოპულარული ფილმეფიშ „ბიჯგი წოხოლე 2: შოშეეფი“ დო „ბიჯგი წოხოლე 3D“-შ. ფილმიშ გინოღალეფი ჯასთინიშ კონცერტეფიშ ჟამს, კულისეფს დო სცენას მეურსჷ. უზურენა, ნამუდა ფილმი, ჯასთინიშ ალბომეფიშნერო, წჷმოძინელი იჸუაფუ. შხვეფ შქას, ჯასთინიშ ჰობი ფილმეფიშ ჯინა რე დო თიში არძაშე უმოსი მოწონაფილ ფილმეფი რე: „მაბრუო მილი“ დო „მაზაკვალიშ გჷშარაჸუა ემილი როუზიშე“. თეშ მოხ, დუდიშული ჟამს ჯასთინს უჸორს ბურთუაშ, გოლფიშ, ჰოკეიშ ლაჸაფი, სკეიტბორდით სიონტი დო ფანეფწკჷმა კომუნიკაცია „Facebook-იშ“ დო „Twitter-იშ“ მოხვარათ.
მუსიკაშ მოხ, ჯასთინ ბიბერიშ ჯოხო კოსმეტიკური მეშქაშალეფს დო შურამიეფსჷთ ორსხუ. კერძოთ, 2011 წანაშ მელახის გიმაჩამალო გიშმურს ოსურეფიშო მერჩქინელი შურამია მუდგაშ აკოქიმინუას ჯასთინით ოკათუდჷ, ოდო თიმ წანაშ ზარხულსჷნე გიმაჩამალო გიშურს ბირცხეფიშ ლაკი, მუდგასჷთ ჯასთინიშ კომპოზიციეფიშ ჯოხოეფი გიოძჷ.
2011 წანაშ 14 ფურთუთას გიშურს ფილმი ჯასთინიშ კათაფათ ჯასთინ ბიბერი: დღას ვა თქუა დღას. თინა ეთმოხანტჷნს მობირეფიშ რინას, მოღალობას, ჰობის. თაშნეშე ფილმის მაჯინე ძირუნს თიში კონცერტეფიშ ნოჭყვედეფს.
დისკოგრაფია [რედაქტირაფა]
თარი სტატია : ჯასთინ ბიბერიშ დისკოგრაფია.- My World 2.0 (2010)
- Under the Mistletoe (2011)
- Believe (2012)
რესურსეფი ინტერნეტის [რედაქტირაფა]
- ოფიციალური ვებ-ხასჷლა
- ჯასთინიშ არხი საიტის YouTube
- ჯასთინიშ დღარი საიტის Twitter
- (ინგლისური) ჯასთინ ბიბერი — კინოფილმეფიშ ინტერნეტ მუნაჩემეფიშ ბაზას
