ჰეროსტრატე
ჰეროსტრატე (ჯვეში ბერძნულო Ἡρόστρατος, Hēróstratos; ღ. 356 ჯვ. წ.) ეფესიში ნოღაიდელი [1] კოჩი დო დაჩხერიშ ათმანტებელი. ჩინებულობაშ დო ირიათონი ჯოხოში მაშიბაფალო დოჭუ არტემიდაშ ოხვამე ჯვეშ საბერძნეთის[2].
დინორე |
[რედაქტირაფა] არტემიდაშ ოხვამეშ ჭუალა
ჯვ.წ. 356 წანაშ 21 კვირკვეს ჰეროსტრატექ დაჩხირი ათუნტუ ეფესის (ასე თურქეთიშ ტერიტორიას) არტემიდაშ ოხვამეს. ოხვამე ეიოგჷ ლიდიაშ მაფა კროესუსიქ მარმარილოშე, უმოსი ორდო კინი თი აკანს ეგაფილი შხვა დგჷმილიშ მანგიორო, ნამუთ აკოფუჩხოლერქ იჸუ წყარალაშ ბორჯის. ოხვამექ ეკჷდილქ იჸუ აკანური ოსურღორონთიშ პატიშოცემელო, ნამუშ ჯოხოქ უკული გინირთჷ ბერძენეფშო არტემიდაქ, ჯინუაშ [3], ნონტყერეფიშ დო ხალაშ ოსურღორონთო. სიგირძას 130 მეტრა დო 18 მეტრიან ეთოდბიჯილი სჷმეტეფით, არტემიდაშ ოხვამე რდჷ ჯვეშ ქიანაშ შქვით თოისერშე ართ-ართი.
[რედაქტირაფა] უკულიანი ამბეეფი
ჰეროსტრატეს შურო ვა უფირქებუ მუშ ჸურე დაჩხირიშ ათონტებაშ ვარაფა, ვარა ტყობინი. ჰეროსტრატექ მიკართჷ კათას დო არძოშ გაგონებელო იცქვანდჷ მუში ნასაქვარით თიშ ცადებათ, ნამდა მუში ჯოხო უღურალო გინურთინუაფუდუკონი.
თეშნერი არზეფიშ კათაშ ოშქურინაფალო, ეფესიშ თარობაქ ჰეროსტრატეს ღურა მეუსაჯჷ დო თეშ გალე ხოლო გეგნოჭყვიდჷ, ნამდა ოირიათოთ გეშულასუდესკო თიშ ჯოხო არძოშ შინაშე დო ომიშურო ისტორიაშე. თე ღანკით, ღურათ დასაჯებაქ იჸუ დოდგინელქ ეფესის ჰეროსტრატეშ ჯოხოშ შინაფაშენი. მარა, თარობაშ თე კონწარი ქიმინჯალას ვა გუცუდებუ ჰეროსტრატეშ ღანკი, თიშენ ნამდა ჯვეში ისტორიკოსი თეოპომპუსიქ ქენიჭარჷ თე ამბეეფი მუში წინგის — ელენიკას.
[რედაქტირაფა] შინაფა კულტურას
ჰეროსტრატეშ ჯოხო იშინუაფუდ თელ კლასიკური ლიტერატურას. ამდღანერ ნინეფს ’ჰეროსტრატე’-თ იშინუანა მიდგაინს, მიდგა მუთუნ გლახა, ვარა გვალო კრიმინალური საქვარს ღოლანს ჯოხოშ მოპალაფაშ ღანკით.
[რედაქტირაფა] ნინეფი
გერმანული ნინას ჰეროსტრატე რე ჯოხოშ ჸუმენათ კრიმინალო გინორთელი კოჩი. ინგლისურო ხოლო ტერმინი ჰეროსტრატეშ ჩინებულობა (’გიშარჩქინელობა’, ’ჯოხო’,) ორცხუ ჰეროსტრატეს დო შანენს: "ჯოხო მუდგა ვარდასჷნ თიშ საშუალებათ". მაგალითო, მარკ დავიდ ჩეპმენქ, ნამუქუთ ჸვილჷ ჯონ ლენონინ, თქუ: "ჩქიმ ნაქიმინაშ მოღალუ თინა იჸი, ნამდა მა იპიქ ჩინებული კოჩი; მოღალუ თინა იჸი, ნამდა ჩქიმი რინა დითირუ დო მა მიბღენქჷ ქიანაშმადიდა თოჸუჯობას კათაშე." მარკ დავიდ ჩეპმენიშ ჩინებულობა შილებე იკოროცხას მუჭოთ ’ჰეროსტრატეშ ჩინებულობა’.
[რედაქტირაფა] კინოეფი დო ნაჭარეფი
ჟან პოლ სარტრიქ ჭარჷ კუნტა ამბე "ჰეროსტრატე" მუჭოთ თიშ გიშარჩქინელი ნაჭარაშ 1939 წანას გიშაშქუმალირი Le mur-იშ (მარგალურო "კიდალა") ნორთი. ათე ისტორიას ართი კოჩი მილამუანს რენდომულო [4] ჭყანიერობაშ დანაშურიშ ქიმინუას თი ღანკით, ნამდა გიშარჩქინელობა მიპალუკონ.
ეშ გალე, ’ჰეროსტრატე’ რე ავსტრალიარი რეჟისორიშ, დონ ლევიშ 1967 წანას გინნაღელი ბრიტანული კინო, ნამუსჷთ ულამუ დუდიშ ჸვილუა კათაშ წოხოლე.
ხოლო, "ჰეროსტრატუს" რე ართ-ართი ამერიკული კინო, გინოღალირი 2001 წანას, ნამუშ სცენარიშ წოროავტორი (არმენ ვატიანწკჷმა ართო) დო რეჟისორი რე რუბენ კოჩარი. კინოშ სიუჟეტი ენწყილი რე ჰეროსტრატეშ რინაშ მოდელშა.
ჰეროსტრატე შინელი რე ანდრეი ტარკოვსკიშ 1979 წანას გინოღალირი სხუნუეფიშ მენცარულ ფანტასტიკურ კინოს "სტალკერს"
1972 წანაშ ტრაგი-კომედია "დიჭყოლიდე ჰეროსტრატე!" გინოღალირი გრიგორი გორინიშ მიერ ეთმოხანტჷნს ეფესის მოხვამილაფირ გუმოგონებულ ამბეეფს.
[რედაქტირაფა] მუსიკა
როკ ბუნა "ინდიშ" ბირა "ჰეროსტრატე ბორჯიშ წინაღმდეგი" (ინგლისურო Herostratus vs. Time) ოწაწჷ ჰეროსტრატეს დო თიშ ქიმინჯალეფს.
[რედაქტირაფა] სქოლიო
- ↑ სამოქალაქო
- ↑ სმითი, უილიამ (editor). ბერძული დო რომაული ანტიკური ხანაში ლექსიკონი. A: Edward Elder. „Herostratus (2)“ (ინგლ.), 1870, დუდი 2, ხასჷლა 439a.
- ↑ ნადირუაშ
- ↑ ალალბედშა
[რედაქტირაფა] წყუეფი
- Borowitz, Albert. Terrorism for Self-glorification: The Herostratos Syndrome. ოჰაიო: კენტიშ სახენწჷფო უნივერსიტეტიშ გიშმაშქუმალობა, 2005.
- სმითი, უილიამ (editor). ბერძული დო რომაული ანტიკური ხანაში ლექსიკონი. A: Edward Elder. „Herostratus (2)“ (ინგლ.), 1870, დუდი 2, ხასჷლა 439a. დასკანერებული სურათეფი.
