აეროპორტი

ვიკიპედია-შე
გეგნორთი: ნავიგაცია, გორუა

აეროპორტი, საწარმო, ნამუთ ახორციელესს საირქიანო ოჰეერე გინოჸონაფა-გინოღალაშ ნინალას დო უნარღელჸოფილი რე საბაჟო, ოხურგე დო სანიტარიულ-საკარანტინო კონტროლით.

თეხანური აეროპორტი ტექნიკური თოლოზირეთ წჷმარინუანს, საინჟინრო-ტექნიკური მონწყილობეფიშ რთულ კომპლექსის, ნამუთ იკათუანს აეროდრომს, ომაშარე ტერმინალს, ნამუთ გიშართილი რე ფურინუაშახ დო ფურინუაშ უკულიანი ნინალაშო, საორზოლო ტერმინალი, ონინალე ტექნიკური ტერიტორია, აეროდრომიშ წჷმიანი ტერიტორია დო შხვა. იურიდიული თოლოზირეთ, „აეროპორტი“ გითმითანჯუ, მუჭოთ ავიასაწარმო, ნამუთ ახორციელენს შარალუაშ, ხეორზოლიშ, ორზოლეფიშ მეღება-ჯღონაშ ნინალეფს დო ოჰეერე ხვამარდეფიშ ნინალას. შხვა სახენწჷფოეფიშ კანონდვალუას „აეროპორტიშ“ გოთანჯუა ვა რე მოჩამილი, მორო თის კინ თე ტერმინი კანკალეშა გიმორინაფილი რე. აეროპორტის საირქიანო რეისეფიშ მეშარეეფშო ერუანული წესეფი ითოლიშწორუანს საბაჟო-ადმინისტრაციული ფორმალობაშ თხილუას, ნამუსჷთ წჷმარინუანს საბაჟო მოწამუა; სანიტარული-საკარანტინო კონტროლი, საპასპორტო კონტროლი; სპეციალური კონტროლი.

საბაჟო კონტროლი აკმოდირთუ საბაჟო დეკლარაციაშ აკოფშაფაშე დო დორხველური ორზოლიშ წჷმორინაფაშე საბაჟო დეკლარაციას დო პასპორტიშ მოწამებას საბაჟო ინსპექტორიშით.

სანიტარული-საკარანტინო კონტროლი აკმოდირთუ პიჯული მოწამებაშე, მოფურინელი დო მაფურინალი მეშარეეფიშ მოწამებაშე (სამედიცინო სერტიფიკატი, ნამუთ უციო რე ქიანაშა ტრანზიტიშ მიშაღალარო). აცრეფიშ დჷმადასურაფალი სერტიფიკატიშ უმუშ მეშარე შილებე ვაგუტუან ფურინუაშოთინ.

საპასპორტო კონტროლი გურიშხონარენს, მუმაულარი დო მაულარი ვიზეფიშ სინანდულეშ მოწამუას დო თაშნეშე ტრანზიტული ვიზაშ არსებობას გიშაკერძაფილ შვანს.

სპეციალური კონტროლი გურიშხონარენს თის, ნამჷ-და მეშარეეფი მუკმულა ფურინუაშ უშქურანჯობაშ მოწამუას, ნამუთ აკმოდირთუ მეშარეშ ნიბთეფიშ მოწამუეფით, რე თუ ვარი ფურინუაშო ნებამეჩამილი ნიბთეფი ოჰეერე ტრანსპორტის. თის იგორიშხონარებუ დაჩხიროჸოთამალი დო რგილი იარაღი, ოლჷმე დო ვაფეთქებაფონი ხეჭკუდეფი, ოწამალარი, შხამიანი, ფეთქებაფონი ოშქურანჯი დო თ.უ.

ლიტერატურა[რედაქტირაფა | წყუშ რედაქტირაფა]

  • დავით გეფერიძე, საერთაშორისო საჰაერო სამართალი, თბილისი, 2009, გამომცემლობა „მერიდიანი“, გვ. 173-187
Commons-logo.svg
ვიკიოწკარუეს? რე ხასჷლა თემაშენ: