გაიუს მარიუსი
| გაიუს მარიუსი | |
| ლათ. Gaius Marius | |
 ჯვ. წ. 101 წანაშ მუნაჭკირა დენარიშ რევერსი - გაიუს მარიუსი გეხე ფაეტონს მუჭოთ ტრიუმფატორი | |
| მოღალობა |
პოლიტიკოსი, ოურდუმე მოღალე, კონსული (ჯვ.წ. 107, 104-100, 86) |
|---|---|
|
ბიოგრაფიული ჩინებეფი
| |
| დაბადებაშ თარიღი | |
| დაბადებაშ აბანი | |
| ღურაშ თარიღი |
13 ღურთუთა, ჯვ. წ. 86 (70-71 წანერი) |
| ღურაშ აბანი | |
| მენოღალობა | |
| მუმა |
გაიუს მარიუსი |
| ნანა |
ფულცინია |
| ალმასქუ | |
| სქუალეფი | |
| ჯილდოეფი: |
2 ტრიუმფი |
გაიუს მარიუსი (ლათ. Gaius Marius; დ. ჯვ. წ. 157 — ღ. 13 ღურთუთა, ჯვ. წ. 86) — რომიშ პოლიტიკური დო ოურდუმე მოღალე, შკვითშა კონსული.
დებადჷ ნოღა არპინოშ გოხოლუას, ჯვ. წ. 157 წანას. პლუტარქე ჭარუნს, ნამდა მარიუსიშ მასქერეფი უბრალო მუშეფი რდეს. მარა ჸათე ინფორმაცია დიდი ალბათობათ ტყურა რე, მუშენდა მარიუსის ახალნორდობაშე ნოღვე ხოლოშიანი ურთიართალა ქოთ არპინოშ, თაშნეშე რომიშ გოლინიანი კათაწკჷმა. მარიუსი ღარიბი დღას ვაჸოფე. ჯვ. წ. 134 წანას თიქ სციპიონ აფრიკალიშ ლეგიონეფს ქაკათჷ დო ჸათაშ ქიდიჭყჷ ოურდუმე კარიერა. მარიუსი ნინალენდჷ ნუმანციას, სოდეთ თიქ კაბეტი პოპულარობა მიპალუ. თიშ ნიჭის დო ტალანტის სციპიონი ხოლო აფასენდჷ. პლუტარქე ჭარუნს ნამდა, მუჟამსჷთ სციპიონიშა შეუკითხირუნა მიქ შილებე იჸუკო თიში მონძექ, სციპიონს მარიუსი დუსახელებუ.
მარიუსის ოურდუმე კარიერაწკჷმა ართო, პოლიტიკური ამბიციეფი ხოლო უღუდჷ. ოურდუმე წჷმოძინეფიშ შედეგო, თიქ გიშაგორილქ იჸუ ოურდუმე ტრიბუნო. უკულ ნინალენდჷ ბალეარიშ კოკეფს. ჯვ. წ. 121 წანას მარიუსი მონაწილენდჷ წყარმალუ იზერიშ ლჷმას, სოდეთ რომალეფქ გემორძგვეს დო ქიდეკინეს ობჟათე გალია.
ჯვ. წ. 120 წანას მარიუსიქ გიშაგორილქ იჸუ ოკათე ტრიბუნო. გიშაგორუეფს თის ალურდჷ მეტელუსეფიშ გოლინიანი ფანია, გიშაკერზაფილო შინელი პოლიტიკოსი დო მანჯღვერთარი ლუციუს ცეცილიუს მეტელუს დელმატიკუსი. ტრიბუნობაშ ბორჯის, მარიუსიშ ინიციატივათ მიშეღეს კანონი, ნამუთ დინდარეფს გიშაგორუეფიშ პროცესიშა ჩარიებაშ ნებას ვარძენდჷ. ჯვ. წ. 117 წანას მარიუსი ედილეფიშ გიშაგორუეფს მონაწილენდჷ, მარა წაგუ. ჯვ. წ. 116 წანას მონაწილენდჷ პრეტორიშ გიშაგორუეფს, სოდეთ თის "ამბიტუსი" - პოლიტიკური კორუფცია, ფარათ გიშმაგორალეფიშ ჸიდირი ქეკადვეს დო გასამართეს, მარა მარიუსიქ დუდიშ გამართება შელებუ. ჯვ. წ. 114 წანას თინა ქუდარინეს შორიშ ესპანეთიშ პროკონსულო.
ჯვ. წ. 113 წანას თიქ რომიშა დირთჷ. დოხოლაფირო ჯვ. წ. 110 წანას თიქ ოსურო ქიმიჸონჷ იულია, ნამუთ იულიუს კეისარიშ მამი რდჷ. მარიუსიქ კონსულობას, მაართაშა მიოჭირინუ ჯვ. წ. 107 წანას. უკულ თიქ გინირთჷ რომიშ ჯარეფიშ მანჯღვერთარო ნუმიდიას, სოდეთ იუგურტინული ლჷმას რომქ გემორძგვჷ. ჯვ. წ. 105 წანას რომიშ ტერიტორიეფიშა გემშეჭკირეს კიმბრეფქ დო ტევტონეფქ. ცენტურიატული კომისიაქ კონსულო გეგშაგორჷ მარიუსი, მაჟირაშა. მარიუსიქ დამარცხჷ ტევტონეფი ჯვ. წ. 102 წანას დო კიმბრეფი ჯვ. წ. 101 წანას. ჯვ. წ. 104 წანაშე ჯვ. წ. 100 წანაშახ მარიუსი ოთხიშა გეწჷ-გეწჷ რდჷ კონსული. მაამშვა კონსულობაშ ბორჯის, თის პოლიტიკური პრობლემეფქ ხოლო ქაშუ დო გვარიანი ხანს ოჯარალე აქტივიზმი ხოლო მიოტუ.
ჯვ. წ. 91 წანას ქიდიჭყჷ მორსხუეეფიშ ლჷმაქ, სოდეთ ართ-ართი მანჯღვერთარო მონაწილენდჷ მარიუსი ხოლო. ჸათე პერიოდიშე იჭყაფჷ მარიუსიშ კონფლიქტი სულაწკჷმა. ჸათე პოლიტიკური კონფლიქტიშ შედეგო, მარიუსი აფრიკაშა გეგნახორეს, ჯვ. წ. 88 წანას. ოქტავიუსიშ ლჷმაშ ბორჯის, მარიუსიქ კართაგენიშე იტალიაშა დირთჷ, ქიდეკინჷ რომი დო ქიდიჭყჷ ზისხირამი დო უბადო მართუალა. ჸათე ბორჯიშო, ჯვ. წ. 86 წანას, თიქ გიშაგორილქ იჸუ კონსულო მაშკვითაშა. მარა მალას, მაშკვითა კონსულობაშ დაჭყაფუს, დოღურჷ.