გინეკოლოგია
გინეკოლოგია — მედიცინაშ დარგი, ნამუთ გურაფულენს ოსურიშ რეპროდუქციულ სისტემას. გინეკოლოგია მერსხილი რე მეანობას, მუშენ და ჟირხოლო სპეციალობა ხოლოს რე ართიანწკჷმა. გინეკოლოგია ბერძნული ტერმინი რე: γυναίκα — „ოსური“ + λόγος — „რკვიაფა“.
ისტორია[რედაქტირაფა | წყუშ რედაქტირაფა]
უჯვევაშ ეგვიპტური მედიცინაშ ტექსტეფი, ნამუთ ითარიღებუ ჯვ.წ. 1800 წანათ, ეთმოჭარუნს შხვადოშხვა გინეკოლოგიურ პრობლემეფს, ლახარეფს, მოკათუობას, კონტრაცეპტივეფს. ჸათე ტექსტეფს კაჰუნიშ გინეკოლოგიურ პაპირუსის უძახუნა. ტექსტი 34 სექციათ ირთუ. შხვადოშხვა სექცია შხვადოშხვა გინეკოლოგიურ პრობლემას ეთმოჭარუნს. ტექსტეფს მოჩამილი რე ლახარეფიშ დიაგნოზეფი დო კურნალობაშ მეთოდეფი. კურნალობა ტექსტეფიშ მეჯინათ, ქირურგიული ვარე დო ხვალე წამალეფიშ გიმორინაფაშ ეფექტეფი რე ეჭარილი.
აიურვედაშ ტექსტეფი რე საინტერესო ჯვეში პერიოდიშ გინეკოლოგიაშ დაგურაფალო. ჸათაქ ეჭარილი რე დეტალური ტექნიკეფი დო კონცეფციეფი, ნამუეფი ორხველჷ გინეკოლოგიურ პრობლემეფს.
უმოს უკულიან პერიოდეფიშ ტექსტეფი რე ჰიპოკრატეშ კორპუსი (ჯვ.წ. 5-4 ოშწანურეფი). ჰიპოკრატეშ კორპუსი იკათუანს დოხოლაფირო 60 ტექსტის. ცალკე ტექსტეფი ორხველჷ ოსურეფიშ ლახარეფს. საინტერესო რე არისტოტელეშ, სორან ეფესარიშ დო შხვეფიშ გინეკოლოგიური ნაჭარეფი ხოლო.
გინეკოლოგიაშ პიონერო იკოროცხუ ამერიკალი ქირურგი ჯეიმს მარიონ სიმსი, ნამუსჷთ გინეკოლოგიაშ მუმას უძახჷნა. ექსპერიმენტეფიშ გიმორინაფათ ჯეიმს სიმსიქ გიმიგონჷ გინეკოლოგიური პრობლემეფიშ შხვადოშხვა ოპერაციული მეთოდი. 1855 წანას სიმსიქ ნიუ-იორკის დარსხუ მაართა გინეკოლოგიური ჰოსპიტალი.