დრავიდეფი
დრავიდეფი — თარო ობჟათე ინდოეთის მახორუ, დრავიდულ ნინეფშა მორაგადე კათეფი. დრავიდეფს ორხველჷნა ტელუგუ, ტამილეფი, მალაიალი, კანნადა, ტულუ, თაშნეშე მორჩილ მუდანობაშ კათეფი, ნამუეფსჷთ დიო ხოლო ასქილადირი აფჷნა გვარობურ-ტომობური ნწყუალა დო უმენტაშო გვალათ დო ტყათ ფორილ ტერიტორიეფს ოხორანა. ცენტრალური ინდოეთიშ დრავიდეფს წჷმარინუანა ორაონეფი ანუ კურუქეფი, კანდჰეფი დო გონდეფი. დრავიდულ ნინაშა თაშნეშე რაგადანს პაკისტანიშ ელახიან რაიონეფს მახორუ კათა — ბრაჰუი. დრავიდეფიშ უმენტაშობა ინდუიზმიშ გემავენჯი რე, ნორთი — ქირსიანი ვარ-და მუსლიმი რე. ვარაუდენა, ნამ-და დრავიდეფი მიშმეშეს ინდოეთიშ უჯვეშაში მახორობაშ, წჷმიარიალეფიშ, აკოდგინალუაშა. მენცარეფიშ უმენტაშობაშ მოარზაფათ, ჰარაპიშ ცივილიზაცია გოჭყაფილი რე დრავიდეფიშ წიმოხონეფიშით ჯვ. წ. III-II ვითოშწანურეფს. ჯვ. წ. I ვითოშწანურას დრავიდეფს ობჟათე ინდოეთის უკვე უღჷდეს დორხველი სახენწჷფოეფი (ანდჰრა, ჰანდია, ჩოლა, ჩერა). გოვითარაფაშ პროცესის თინეფქ გაჭყეს მაღალი კულტურა. XVII-XVIII ოშწანურეფს, ინგლისარ კოლონიზატორეფქ ხეშა ქეშიოთეს დრავიდეფით დოხორელი რაიონეფი, ქიდიჭყეს თინეფიშ დიხეფიშ დორთუალა დო დრავიდული კათეფიშ ეთნიკური ტერიტორიეფიშ აკოწიწონუა. ინდოეთიშ შხვა კაბეტი კათეფიშობურო ერუანული დუდგიმორკვიაფაშ ბურჯაფიშ ბორჯის დრავიდეფი თხულენდეს მუნეფიშ ეთნოგრაფიული ტერიტორიეფიშ ზოხო შტატეფო გიშართუალას. შტატეფიშ ხურგეფქ საბოლათ 1956 წანას დედგინჷ.
ლიტერატურა[რედაქტირაფა | წყუშ რედაქტირაფა]
- ქორთული სხუნუეფიშ ენციკლოპედია, ტ. 3, ხს. 631, ქართი, 1978 წანა.
- Erdosy, George (1995). The Indo-Aryans of Ancient South Asia: Language, Material Culture and Ethnicity. Berlin: de Gruyter. ISBN 978-3-11-014447-5.
