დუდიშ ჸვილუა
დუდიშ ჸვილუა ვარ-და სუიციდი — დორხველი თელარაშა კუჩხიშ გედგუმა. დუდიშ ჸვილუა შილებე გჷმოჭანაფილი ორდას ანდა ბაძაძით, თინეფს შქას უმოსო შხირი რე დეპრესია, ონჯღორე, დუნაშებუშ ჭუალა, უგურძებუ ფიზიკური ჭუა, ემოციური გინოხარგუა, თომაშ მიკოკვარჩხუა, ფინანსური პრობლემეფი დო თ.უ.[1][2][3] ჭყანთხილუაშ მოსოფელიშ ორგანიზაციაშ ჩინებათ, ირწანას ართ მილიონშე უმოსი ადამიერი იჸვილუნს დუდს, დო ღურალაშ არძაშე უკაბეტაში თია ომორდუალეფიშ დო 35 წანაშ გიმეიან ახალნორდეფიშ, დუდიშ ჸვილუაშა მოურს.[4] დოხოლაფირო 10-20 მილიონი შვანი — ვაოღურალე შედეგით ითებუ.[5]
ფსიქიკური ჭყანთხილუაშ ააშ-იშ ერუანული ინსტიტუტიშ მუნაჩემეფიშ მეჯინათ, ტომბა დეპრესიას მარენჯი ახალნორდეფიშ 7% თელარას დუდიშ ჸვილუათ ანჭუაფუ. თე ცირფჷთ ვეგნჷმოჩანს პრობლემაშ ედომუშამ ორთას, თიშ გეშა, ნამჷ-და ახალნორდეფიშ დუდიშ ჸვილუაშ შვანეფიშ მოხ, ანდა დუდიშ ჸვილუაშ ცადებაშ შვანქ დეფიქსირჷ. ათეშენ ომორდუალეფიშ გოვითარაფაშ ოკითხირეეფშა მამუშებე კარნეგიშ სხუნუშ ანგარიშის, გითოჸუნელო რდჷ ეშანილი: „ამდღა ომორდუალეფიშ პრობლემეფიშოთ უგურიე მერინა ეჭყვადუაშ ძალით დუდს გეტახუაშ ოსხირი რე. თეჯგურა კუჩხიშ გებიჯგაფა ნანდულო რისკიშ წჷმი გეთმიორინუანს მუმალ გამნარყის“.
ფრანგ სოციოლოგ ემილ დიურკემიშ მოარზაფათ, სუიციდიშ გეჸვენჯი ტიპეფი რე:
- ეგოისტური დუდიშ ჸვილუეფი - ორხველჷ დეპრესიაშ, ადამიერული ურთიართობეფიშ დო სოციალური ფაქტორეფიშ გეშა ნაქიმინა სუიციდიშ ფაქტეფი;
- ანომიური დუდიშ ჸვილუა - ახასიათენს ეკონომიკური ბაძაძით გიმოჭანაფილჷ სუიციდურ ფაქტეფს;
- ალტრუისტული დუდიშ ჸვილუა - თე~ შვანს ადამიერი დორხველ თელარას კუჩხის გეთმიობიჯგუანს შხვაშა ორიენტირაფალაშ გეშა. თენა თინწკჷმა ხვადუ, მუჟანსჷთ პიჯი თიშბნერო უამნგენს მუშ დუდს მიდგაინს, ნამჷ-და თიშ უმუშო რინა მუთუნო ვემიოჩქჷ. თარო, ალტრუისტულ დუდიშ ჸვილუას ჸოროფათ იმენდიშე ხებონილეფი მიანჭაფჷნა.
- ფატალისტური დუდიშ ჸვილუა - ადამიერი რინას ათენს ჯარალობური დოგმეფიშ დო სტერეოტიპეფიშ გაპროტესტაფალო.
- რე ფულირი დუდიშ ჸვილუათ, ნამუთ იხორციელებუ ნარკოტიკეფიშ დო ალკოჰოლიშ მეღებათ. თინეფიშ მეღება მუშითდესტრუქციული რჯება რე, ნამუთ ბონას მეწურაფილი რე რინას დაკუნტარაფაშა. ნარკოტიკიშდო ალკოჰოლიშ მოხვარება იძინანს სოციალური პრობლემეფიშ ომანგეთ, მუჟანსჷთ ადამიერი თინეფიშ მეშქაშობათ ოცადჷ რეალობაშე რტებას, მარა, სინანდულეს, თიშო საუბადოთ, რინას ეთმერტებუ. დუდიშ ჸვილუა შხირას რე მერსხილი მონკა სოციალურ ფონწკჷმა, მარა რე შხვა სამანჯელეფჷთ, ნამუშ გეშა ადამიერეფი დორხველ რინას კუჩხის გეთმიობიჯგაუნან, თენეფი რე:
- სიხანგე, მუჟანსჷთ ადამიერი დალახებური, აკობანძღილი რე დო თენა ორგანული დოღამაკაფაშე მოურს.
- სტრესი - შილებე, პირიქ აფექტიშ შედეგო მიღას მოგვენი გინოჭყვიდირი.
- დეპრესიული დგომარობა, მუჟანსჷთ პიჯი მუშ რინაშ არზის ვარწყენ, ნამუქჷთ, შილებე, მუში რინაშ დინაფაშ გინოჭყვიდუაშა ქიმიონასჷნ - თეთ გჷმოხანტუნს აგრესიას მუშ დუდიშოთ.
გიმე მოჩამილი გურგაჩამალი შანეფი თი ომორდუალეფს მიოხე, ნამუეფჷთ შილებე დუდიშ ჸვილუაშოთ ფირქენან:
- ფანიაშ მაკათურეფწკჷმა დო მაჸალეეფწკჷმა ურთიართობაშ კორინიშ დინაფა;
- ჭკომუაშ დო დორულაფაშ რეჟიმიშ აკორცუაფა;
- კინოხ სიამნებაშ მუმაღელი საქვარიშოთ ინტერესიშ დინაფა;
- ხასიათიშ შანულამო თირუა;
- ნარკოტიკეფიშ დო ალკოჰოლიშ უბადოთ გჷმორინაფა;
- საჸოროფო მეკონეფიშ გაჩუქება;
- უგუთებუ რაგადი ღურაშენ დო ღურაწკჷმა მერსხილ თემეფშენ.
დოქტორ ქეთლინ მაკ-კოიქ ეშანჷ, ნამჷ-და მასქერეფიშ არძაშე უკაბეტაში ჩილათა ათე გურიშ გაჩამალი შანეფიშ კუჩხიშ გედგუმა რე. თინა რაგადანს:
|
„აკა მასქერს ვაკო თიშ დაჯერება, ნამჷ-და თიშ სქუას მუდგაინ ოჭენ. ათეშენ პრობლემას ვაკვირუნა. „ხანიშ ბრალი რე“, „ქეკნუოთანს“ ვარ-და „თინა ირო ირფელს გუთმუძინანს“, — თაშ მითმიქექუანა გურს მასქერეფი. თენა ოშქურანჯი რე. ოშქურანჯობაშ საუბადო ირნერ შანს მასქერქ სერიოზულო ოკო მიკართას.“
|
რესურსეფი ინტერნეტის[რედაქტირაფა | წყუშ რედაქტირაფა]
- Самоубийство с точек зрения различных теорий.. დოარქივაფილი რე ორიგინალშე 2011-07-27-ს. კითხირიშ თარიღი: 2017-08-19.
სქოლიო[რედაქტირაფა | წყუშ რედაქტირაფა]
- ↑ (April 2009) „Suicide“. Lancet 373 (9672): ხს. 1372–81. DOI:10.1016/S0140-6736(09)60372-X. PMID 19376453.
- ↑ (2014) „Suicide in autism spectrum disorders“. Archives of Suicide Research 18 (4): ხს. 327–39. DOI:10.1080/13811118.2013.824834. PMID 24713024.
- ↑ (March 2017) „Prescribed Benzodiazepines and Suicide Risk: A Review of the Literature“. The Primary Care Companion for CNS Disorders 19 (2). DOI:10.4088/PCC.16r02037. PMID 28257172.
- ↑ CIS: UN Body Takes On Rising Suicide Rates
- ↑ Suicide and psychiatric diagnosis: a worldwide perspective. World Psychiatry (2002-10-01).
|
ათე სტატია მერკე რე. თქვა შეგილებუნა ქიმეხვარათ ვიკიპედიას დო გაგშათინათ დო გახვეიანათინ. |