ეიფელიშ ჸორში

ვიკიპედიაშე
ეიფელიშ ჸორში იალონშა
ხედი ჸორშიშე შამ-დე-მარსის
ეიფელიშ ჸორში

ეიფელიშ ჸორში (ფრანგ. Tour Eiffel) — ლითონიშ კონსტრუქცია რე შამ-დე-მარსის, სენაწკჷმა, პარიზის. თენა პარიზიშ არძაშე უმაღალაში სტრუქტურა დო საფრანგეთიშ არძაშე ჩინებული სიმბოლო რე. ჯოხოქ გიადუ პროექტიშ ავტორიშ, ინჟინერ გუსტავ ეიფელიშ პატიჩამაშე დო თინა ნოღაშ არძაშე უმოს პოპულარული ტურისტული კულტურული ძეგლი რე, ნამუსჷთ წანამოწანას 5,5 მილიონიშ უმოსი დჷმათოლიარაფალი ჸუნსჷ.

სტატისტიკა[რედაქტირაფა | წყუშ რედაქტირაფა]

ჸორშიშ სიმაღალა 300 მეტრა რე, მუთ მეხოლაფირო 75 სართულზმა რე. თიშ დუს 24 მეტრაშ სიმაღალაშ ანტენა რე, მუთ სტრუქტურაშ ედომუშამ სიმაღალას 324 მ შანულშა უკინანს. კიდუაშ ჟამს, 1889 წანას, ეიფელიშ ჸორში არძაშე უმაღალაშ სტრუქტურა რდჷ მოსოფელს, ტიტული, ნამუთით თიქ 1930 წანაშე მუკიტუ, მუჟამსით ნიუ-იორკიშ კრაისლერ ბილდინგიშ (319 მ) კიდუაქ გეთუ, მარა ეიფელი იშენით უწორუანდჷ თის სიმაღალაშე, თე სტრუქტურეფიშ ანძეფი ენიკოროცხუდ სიმაღალაშე-და. თეჟამშო ეიფელიშ ჸორში საფრანგეთის სიმაღალათ მაჟირა სტრუქტურა რე, 350 მ სიმაღალაშ ალუიშ გინძე პოპორეფიშ გინმაჩამალი ანძაშ (1939) ეგაფაშ უკული. გეჸვენჯო მოურს ლა ტურ მონპარნასი, პარიზიშ მონპარნასიშ განობას (209 მ). ჸორშიშ ლითონიშ სტრუქტურა 7 300 ტონა რე, თიში ედომიშ წონა 10.100 ტონა რე. ჟიდონ პლატფორმას ეშაულარი ოკუჩხურიშ მუდანობა ითირუდჷ ჸორშიშ ისტორიაშ მალობას, მუზმარენი რენოვაციაშ გეშა: კიდუაშ მომენტის 1889 წანას 1710 ოკუჩხე ეშეშჷ სამიტიშ პლატფორმაშა 300.65 მ ღანკილს; 1980 წანაშ რენოვაციაშ უკული ოკუჩხეეფიშ მუდანობაქ 1920-შახ მირდჷ; თეჟამიშო 1665 ოკუჩხე რე, მარა ჟიდონ პლატფორმაშა ოკუჩხეფით ეშულა უშულებუ რე დო გჷმაჯინუეფს ხვალე ლიფტეფიშ გჷმორინაფა შეულებუნა.

ჰავაშ ტემპერატურაშ მეჯინათ ეიფელიშ ჸორშიშ დუდიქ შილებე ბჟაშე გინოფურაფაშ გეშა 8 სმ-შახ გინიკინას, ჩხანაშა მეფიცხინაფილ ჸურეშე ლითონიშ გოფართაფაშენი.

ჸორშიშ რემონტი იკორინუანს ირ 7 წარმოწანას 50 ტონა 3 ფა ოღაფუშ სუმალას კონსტრუქციაშ ლითონიშ ჟიპიჯიშ ღანჯიშე ოთხილარო. ხანმორკებათ ოღაფუშ ფერი ითირუ. თეჟამშო ჸორში მოყავაშფერო რე ღაფილი. მაართა სართულს ინტერაქტიული კონსოლეფიე მონტაჟელი, ნამუსჷთ მაკორინეეფს შეულებუნა გეგშაგორანი ჸორშიშ მუმალი ფერი.

ისტორია[რედაქტირაფა | წყუშ რედაქტირაფა]

მაკიდური ჸორში 1888 წანაშ მანგის.

სტრუქტურა იკიდუაფუდუ 1887 - 1989 წანეფს მუჭოთ ექსპო-იუნივერსელიშ მიშაულარი (1889), მოსოფელი გჷმობჟინაფა, ნამუთ საფრანგეთიშ რევოლუციაშ 100 წანაშდუდიშ ეიშანალო იგეგმუდჷ. თიში გეოგრაფიული კოორდინატეფი რე 48°51′29″N, 2°17′40″E. ჸორშიშ ინაუგურაციაქ იჸუ 1889 წანაშ 31 მელახის, დო ჯარალუაშო თიქ 6 მესიშო გინწყჷ. 300 მუშაქ ეიონწყუ 18.038 ლითონიშ (სუფთა სტრუქტურული ფულანდიშ ფორმა) რხვილებამი კონსოლი, გიმირინეს 2.5 მილიონი ჭანჭიკი, მორიშ კოხლინიშ სტრუქტურაშ პროექტით.

ჩილათაშ რისკი ძალამი დიდი რდჷ, თიშენ ნამუდა თეხანური ცაშმანჭუეფშე გოშხვანერაფილო ჸორშის ნჯაფილ ჩონჩხი უღუ ოშქარი სართულეფიშ უმუშო, ჟირი პლატფორმაშ მეტი. მარა, თიშენ ნამუდა ეიფელქ ოწმოხი ზჷმეფი ქიმიღჷ მუშეფიშ უშქურანჯობაშო, კიდუაშ ჟამს ხვალე ართიქ დოღურუ თინეფიშე, ოტისიშ ლიფტეფიშ მონტაჟაფაჟამს.

დუდმაართათ ჯარალუა ჸორშიშ კონწარ მოვარიე რდჷ, თიშენ ნამუდა უმენტაშობას თინა თოლს ძიგირო ხვადუდჷ. მარა თეხანშო თინა მოსოფელს ართ-ართი არძაშე გოსოფური სტრუქტურული ხელობაშ მინუშო მიირჩქინუაფუ.

ჰოლივუდიშ ართი არძაშე დიდი კლიშე რე - პარიზული ოსინთურშე ვანათურო ოკო რჩქჷდას ეიფელიშ ჸორში. რეალურო, ზონური აკობორკუაშ გეშა პარიზის ნოდგჷმეფიშ სიმაღალაშა თანჯა მუზმარენ სართულით გიხოლუ დო თეშენ ხვალე მუზმარენი ალაზიმაფილო მაღალ ნოდგჷმს უღჷ ჸორშიშა წკონდა გინაჯინუ.

დუდმაართათ ეიფელს ნება უღუდჷ ჸორში 20 წანათ გედგჷკონი, დორხველი ხარჯეფიშ ეშაღალარო, მარა მოგვიანაფათ ჸორშიქ საკომუნიკაციო დაოშანულობა ხოლო ქიმიღჷ დო ვადაშ გულაშ უკულით გინოჭყორდჷ თიშ დოტებაქ.

ქოძირით თაშნეშე[რედაქტირაფა | წყუშ რედაქტირაფა]

რესურსეფი ინტერნეტის[რედაქტირაფა | წყუშ რედაქტირაფა]