ზეთიშხილი (Olea) — ჩანარიშ გვარი ზეთიშხილიშობურეფიშ ფანიაშე. ჩინებული რე 60-შახ გვარობა. ომეურნე შანულობა უღუ ხვალე ზეთიშხილს (Olea europea). იროწვანე, სუბტროპიკულ ხილამი ჩანარი რე, 4-12 მ სიმაღალაშახ. ფურცელეფი ჭიფე, ლანცეტიშობური უღუ, ჟიშერუმე წვანე, თუდოშე - მოვარჩხილიშფერ-ტუტაშფერი. გუმნაღელი წკამი რე, მოგჷრძე-ოვალური ვარდა მოკვარკვალე ფორმაშ რე, იწონუ 15 გ. თასიშე ეშნაველი ჩანარი გუმოღალას იჭყანს 10-12 წანაშე, დოჸაშილშე ეშნაველი - 4-5 წანაშ უკული. თელარენს 300-400 წანაშე უმოსის. ართი ჯაშე 20-40 კგ მოსალი მოურს. გუმნაღელს გიმირინუანა ოკეთებელო, ოკონსერვებელო, ზეთიშ გითოღალაშო (გუმნაღელიშ ლადირი ატატა იკათუანს 25-შე 80%-შახ ზეთის, თ. ჯ. ზეითუნიშ ზეთის), მედიცინას, კოპტონს - ჩხოლარეფიშ ოცამალო, მარქვას - ოხურიე დო ოხარატე საქვარუას. საქორთუოს ზეთიშხილი გოფაჩილი რე აფხაზეთის, თაშნეშე კახეთიშ სქირე სუბტროპიკულ ზონას.
