დინორეშა გინულა

კოლეტი

ვიკიპედიაშე
კოლეტი

კოლეტი 1910-იან წანეფს
ფსევდონიმი:

Colette, Colette Willy

დაბადებაშ თარიღი:

28 ღურთუთა, 1873

დაბადებაშ აბანი:

სენ-სოვერ-ან-პიუიზე, იონი, საფრანგეთი

ღურაშ თარიღი:

მარაშინათუთა 3, 1954 (81 წანერი)

ღურაშ აბანი:

პარიზი, საფრანგეთი

ერუანობა:

ფრანგი

საქვარუა:

ჭარუ, ნოველისტი, დრამატურგი, ჟურნალისტი, არტისტი

Magnum opus:

ჟიჟი (1944)
ბინეხიშ ოშმეშეფი (1908)

ნინა:

ფრანგული ნინა

ჯილდოეფი:

საპატიო ლეგიონიშ ორდენიშ კავალერი (1920)
საპატიო ლეგიონიშ ორდენიშ ოფიცერი (1928)
საპატიო ლეგიონიშ ორდენიშ კომანდორი (1936)
საპატიო ლეგიონიშ ორდენიშ დიდი ოფიცერი (1953)

ხეშმოჭარუა

კოლეტი, თახმი ჯოხო სიდონი-გაბრიელ კოლეტი (ფრანგ. Sidonie-Gabrielle Colette; დ. 28 ღურთუთა, 1873, სენ-სოვერ-ან-პიუიზე, იონი, საფრანგეთი — ღ. 3 მარაშინათუთა, 1954, პარიზი, საფრანგეთი) — ფრანგი ჭარუ, ნოველისტი, დრამატურგი, ჟურნალისტი დო არტისტი. კოლეტი შინელი რე რომანით "ჟიჟი", ნამუქჷთ 1944 წანას გიშართჷ დო ნამუსჷთ რე გერსხილი ამერიკული კომედიური ჟანრიშ მუსიკალური ფილმი დო ამერიკული მიუზიკლი ჟიჟი. კოლეტი თაშნეშე შინელი რე თხობელუეფიშ კათელით "ბინეხიშ ოშმეშეფი", ნამუთ საფრანგეთის ასე ხოლო პოპულარული რე.

ბიოგრაფია[რედაქტირაფა | წყუშ რედაქტირაფა]

სიდონი-გაბრიელ კოლეტიქ დებად 1873 წანაშ 28 ღურთუთას, იონიშ დეპარტამენტის, ბურგუნდიას. კოლეტიქ ჭარალუათ ორდოიანი წანეფიშე დეინტერესჷ. მაართა ნაჭარეფი 1900-იან წანეფს გჷმაბჟინუ. 1902 წანაშ გიშართჷ რომანქ "კლოდინი სკოლას". უკულიან წანეფს ჸათე რომანს მაჸუნჷ კლოდინიშ წინგეფიშ კათელიშ შხვა ნაწარმებეფქ: "კლოდინი პარიზის", "კლოდინი ითხუაფჷ" დო "კლოდინი დო ენი". ჸათე რომანეფი გვერდო ავტობიოგრაფიული ხასიათიში რე.

1893-1906 წანეფს კოლეტიშ ქომონჯი რდჷ ანრი გოტიე-ვილარი. გოტიე-ვილარიქ კოლეტის გაჩინებაფუ პარიზიშ შინელი დო გოლინიანი ინტელექტუალეფი დო არისტოკრატეფი. 1910-იან წანეფშე კოლეტიქ დიო არტისტიშ დო უკულ ჟურნალისტიშ კარიერა ქიდიჭყჷ. ჸათე პერიოდიშ რინაშ ისტორია კოლეტის ეჭარილი აფჷ რომანს "ვაგაბონდი". რომანი ორხველჷ ოსურიშ ზოხორინელობაშ პრობლემეფს ქომოლკოჩეფიშ ჯარალუას. ჸათე წანეფიშ ბორჯის კოლეტის, მუჭოთ ლესბოსელს, რომანტიკული ურთიართობა უღუდჷ ამერიკალ პოეტი ნატალი კლიფორდ ბარნი დო ფრანგი არისტოკრატი მატილდ დე მორნიწკჷმა. 1912 წანას ოსურო მიდაჸუნჷ ფრანგი ჟურნალისტის, გაზეთ Le Matin-იშ რედაქტორს ანრი დე ჟუვენელის დო თიწკჷმა 1924 წანაშახ რდჷ. კოლეტიშ მასუმა ქომონჯი რდჷ მორის გუდეკი, ნამუწკჷმა ღურაშახ ცხოვრენდჷ. 1920 წანას გიშართჷ კოლეტიშ რომანქ "შერი", ნამუსჷთ უკულ მაჸუნ გაგრძელებაქ "შერიშ დათებუ".

1920-1930-იანი წანეფი რდჷ კოლეტიშ ლიტერატურული კარიერაშო არძაშე უმოსო ინოვაციური დო პროდუქტიული. ჸათე პერიოდის კოლეტი მერჩქინელი რდჷ საფრანგეთიშ ართ-ართ უდიდაშ ნოველისტო. 1940-იან წანეფს გჷმაბჟინუ მემუარული ნაჭარეფი. 1944 წანას გიშართჷ რომანქ "ჟიჟი", ნამუქჷთ ავტორს დიდი პოპულარობა მოუღჷ. რომანი კურტიზანი ჯილბერტ (ჟიჟი) ალვარიშ რინაშ ისტორია რე. ჸათე წინგიშ სიუჟეტის უკულ გიარსხუ შხვადოშხვა ამერიკულ დო ფრანგულ კინო-ფილმეფქ. 1948 წანას კოლეტი ნომინირაფილი რდჷ ნობელიშ პრემიაშა ლიტერატურაშ დარგის.

კოლეტიქ ღურუ 1954 წანაშ 3 მარაშინათუთას, 81 წანერქ. ნთხორილი რე პერ-ლაშეზის სასაფლას.

რესურსეფი ინტერნეტის[რედაქტირაფა | წყუშ რედაქტირაფა]

ვიკიოწკარუეს? რე ხასჷლა თემაშენ:
Wikiquote
Wikiquote