მერილინ მონრო

მერილინ მონრო
	მერილინ მონრო
	Marilyn Monroe
	; მონრო 1953 წანას
ჯოხო დაბადება შვანს	ნორმა ჯინ მორტენსონი
მოღალობა	1945–1962
	ბიოგრაფიული ჩინებეფი
დაბადებაშ თარიღი	1 მანგი, 1926
დაბადებაშ აბანი	ლოს-ანჯელესი, კალიფორნია, ააშ
ღურაშ თარიღი	მარაშინათუთა 4,, 1962 (36 წანერი)
ღურაშ აბანი	ლოს-ანჯელესი, კალიფორნია, ააშ
ნთხორუაშ აბანი	უესტვუდიშ მემორიალურ პარკიშ სასაფლა
საქვარუა:	არტისტი, მოდელი
მენოღალობა	ააშ
ერუანობა	ამერიკალი
ნანა	გლედის პერლ ბეიკერი
ალმასქუ	ჯეიმზ დოჰერტი (გ. 1942; ჩეთხ. 1946); ჯო დიმაჯიო (გ. 1954; ჩეთხ. 1955); ართურ მილერი (გ. 1956; ჩეთხ. 1961);
ჯილდოეფი:	ორქოშ გლობუსი (1959);
	; [marilynmonroe.com ოფიციალური ვებ-ხასჷლა]

მერილინ მონრო (ინგლ. Marilyn Monroe; ბადებაშ ჯოხო დო გვარი ნორმა ჯინ მორტენსონი;^[1] დ. 1 მანგი, 1926 — ღ. 4 მარაშინათუთა, 1962) — ამერიკალ არტისტ დო მოდელი. ჩინებულ რდჷ კომედიურ „კაშინათომამ ბომბი“ (blonde bombshell) პერსონაჟეფიშ ლაჸაფით; თიქ 1950-იან დო 1960-იან წანეფიშ დაჭყაფუშ ართ-ართ არძაშე პოპულარულ სექს-სიმბოლოთ გინირთჷ, თაშნეშე თი ეპოქაშ სექსუალურ რევოლუციაშ ემბლემათ. თინა ვით წანაშ განწეხანს „პირველ პლანიშ“ (top-billed) არტისტ რდჷ, დო თიშ ფილმეფქ 1962 წანას მუშ ღურაშა 200 მილიონ დოლარიშ (ნამუთ ამდღანერ კურსით მილიარდობათ დოლარ რე) მიშნაველ მოუღეს.^[2]

ლოს-ანჯელესის დუნაბად მონროქ ბაღანობაშ უმენტაშ ნორთ მენდებულ რდუალაშ ფანიეფს დო ბაღანეფიშ ჸუდეს მუკორთჷ, სოიშა 16 წანაშ ხანს ჯეიმზ დოჰერტშა ვეგეთხჷნ. თინა ქარხანას მუშენდჷ მაჟირა მოსოფელიშ ლჷმაშ ბორჯის, სოდე გიჩინებაფუ „მაართა კინომატოგრაფიულ გჷნართიშ“ ფოტოგრაფ დო დიჭყჷ წჷმოძინელ პინ-აპ მოდელიშ კარიერა, ნამუქჷთ წჷმოძინა მოუღეს 20th Century Fox-იშ დო Columbia Pictures-იშ კუნტახანიან კინოპროექტეფს. ფრილანსერიშ (ზოხორინელ არტისტიშ) როლეფიშ უკული, 1951 წანას თიქ Fox-წკჷმა უმოს გჷნძეხანურ კონტრაქტ ქჷდოდუ დო პოპულარულ არტისტო გინირთჷ როლეფით მუსხირენ კომედიას, თინეფ შქას: „As Young as You Feel“ დო „Monkey Business“, თაშნეშე დრამეფს: „Clash by Night“ დო „Don't Bother to Knock“. მონრო სკანდალქ აშუ, მუჟანსჷთ გირკჷ, ნამჷ-და ვარადებაშ მოპალიუაშახ შუშელ ფოტოეფ აფუდჷ გინოღალირინ, მარა თე ამბექ თიშ ფილმეფიშოთ ინტერეს ხოლო უმოსო ქჷმიძინჷ.

1953 წანას მონროქ ჰოლივუდიშ ართ-ართ არძაშე გიმოჩამურ მურიცხო გინირთჷ. თის თარ როლეფ უღუდჷ: ფილმ-ნუარს „ნიაგარა“, ნამუთ ღილეთ გეპონუდჷ მუშ სექსუალურ მეკონჭაფობას დო კომედიეფს „ჯენტლმენეფ კაშინათომამ ოსურეფს ისხუნუანა“ დო „მუჭო მივეთხუათ მილიონერს“, ნამუქჷთ საბოლათ გაშქჷ თიშ მურიცხულ იმიჯი, მუჭოთ „პონტორია კაშინათომამი“. კჷნე თიმ წანას თიშ შუშელ ფოტოეფქ გჷმორინაფილქ იჸუ ჟურნალ „ფლეიბოიშ“ პირველ ნომერიშ კაბრაშო დო ცენტრალურ ხასჷლაშო. მონრო შანულამ როლს არსულენდჷ მუშ ჯარალობურ იმიჯიშ აკოქიმინუა დო გამაგალაშო, მარა ძალამ გურგოტახილ რდჷ, მუჟანსჷთ სტუდია ართნერ ტიპაჟიშ როლეფს არზენდჷ დო შხვეფწკჷმა ელაზჷმაფათ დაბალ ხელფასს გინმუგანდესჷნ. 1954 წანაშ დაჭყაფუს თინა კუნტა ხანით საქვარუაშე გეგშეჸონეს, ანდანე ართ-ართ ფილმიშ პროექტშე ვარია თქუნ, მარა ეკრანეფს დირთჷ ფილმით „შკვით წანაშ დუდს“ (1955). თე ნახანდიქ თიშ კარიერაშ ართ-ართ უკაბეტაშ ხაზჷნაშ წჷმოძინათ გინირთჷ.

მუჟანსჷთ სტუდია კჷნ აწურედჷ მონროშ კონტრაქტიშ თირუასჷნ, 1954 წანას თიქ მუშ მაჸალე მილტონ გრინწკჷმა ართო მუშ კინოწარმებაშ (პროდიუსერული) კომპანია ქჷდარსხუ. 1955 წანა თიქ ედომუშამო კომპანიაშ აკოგაფას მეუძღვინჷ დო ლი სტრასბერგწკჷმა „მეთოდური ლაჸაფიშ“ გურაფა ქჷდიჭყუ ნიუ-იორკიშ არტისტეფიშ სტუდიას. თიმ წანაშ დალიას, Fox-იქ თის ახალ კონტრაქტ გაფორმუ, ნამუქჷთ მერილინს უმოს კრეატიულ კონტროლ დო ბრელით უმოს ხეშქირა მოუღჷ.

თე სტატია პიჯიშ გეშა დიოდღარო მერკე რე. თქვა შეგილებუნა ქუმმეხვარათ დო აკაფშათ თინა.

რესურსეფ ინტერნეტის

ოფიციალურ ვებ-საიტი
What Really Killed Marilyn", article by Clare Boothe Luce for Life, 7 August 1964.
"Marilyn!" Archived 2013-09-21 ვებ-ხასჷლას Wayback Machine. , essay by Dan Callahan for Alt Screen on the occasion of a retrospective Archived 2012-07-12 ვებ-ხასჷლას Wayback Machine. at BAMcinématek

სქოლიო

↑ Birth of Marilyn Monroe Shown to Be Legitimate (February 13, 1981). კითხირიშ თარიღი: November 4, 2025.
↑ “Marilyn Monroe Dies; Pills Blamed“, Los Angeles Times, August 6, 1962. კითხირიშ თარიღი: September 23, 2015.

[p368-1] Birth of Marilyn Monroe Shown to Be Legitimate (February 13, 1981). კითხირიშ თარიღი: November 4, 2025.

[2] “Marilyn Monroe Dies; Pills Blamed“, Los Angeles Times, August 6, 1962. კითხირიშ თარიღი: September 23, 2015.

[1]

[2]