მილან კუნდერა

მილან კუნდერა
	მილან კუნდერა
	; კუნდერა 1980 წანას
დაბადებაშ თარიღი:	1 პირელი, 1929
დაბადებაშ აბანი:	ბრნო, ჩეხოსლოვაკია
ღურაშ თარიღი:	კვირკვე 11, 2023 (94 წანერი)
ღურაშ აბანი:	პარიზი, საფრანგეთი
ერუანობა:	ფრანგი
საქვარუა:	ჭარუ, ნოველისტი
Magnum opus:	ციგანობა (1967); ძიცაშ დო გოჭყოლადაშ წინგი (1979); ჸოფაშ უბადო სილექინე (1984)
ნინა:	ფრანგული ნინა; ჩეხური ნინა
ჯილდოეფი:	მედიჩიშ პრემია (1973); მონდელოშ პრემია (1978); იერუსალიმიშ პრემია (1985); ავსტრიაშ სახენწჷფო პრემია ევროპული ლიტერატურაშო (1987); საპატიო ლეგიონიშ ორდენიშ კავალერი (1990); ვილენიცაშ პრემია (1992); ჰერდერიშ პრემია (2000); ჩეხეთიშ სახენწჷფო ლიტერატურული პრემია (2007); ჩინო დელ დუკაშ პრემია (2009); ოვიდიუსიშ პრემია (2011); ფრანც კაფკაშ პრემია (2020)

მილან კუნდერა (ჩეხ. Milan Kundera; დ. 1 პირელი, 1929, ბრნო, ჩეხოსლოვაკია — ღ. 11 კვირკვე, 2023, პარიზი, საფრანგეთი) — ჩეხი დო ფრანგი ჭარუ, ნოველისტი. მოსოფელიშ მასშტაბით შინელი რე რომანით ჸოფაშ უბადო სილექინე.

დებადჷ ჩეხოსლოვაკიაშ ნოღა ბრნოს, შინელი ჩეხი მუსიკოსიშ დო პიანისტიშ ლუდვიგ კუნდერაშ ფანიას. სკოლაშ თებაშ უკულ გურაფულენდჷ ლიტერატურას დო ესთეტიკას კარლიშ უნივერსიტეტის. ჟირი წანაშ უკულ გურაფა გაგინძორჷ პრაღაშ ხელუანობეფიშ აკადემიას, ნამუთ გათუ 1952 წანას. 18 წანერი რდუნ თეშ ქაკათჷ ჩეხოსლოვაკიაშ კომუნისტურ პარტიას, ნამუშეთ 1950 წანას გეგშჸათეს.

კუნდერაქ პრაღაშ აფუნიშ დო ჩეხოსლოვაკიაშ ოკუპაციაშ უკულ, 1975 წანას ქიანა ქიდიტუ დო ოცხოვრებშა საფრანგეთიშა მიდართჷ. 1979 წანას გეგლანწყეს ჩეხოსლოვაკიაშ მენოღალობა. კუნდერაქ საფრანგეთიშ მენოღალობა მიპალუ 1981 წანას.

მილან კუნდერაქ ლიტერატურული კარიერა 1940-იან წანეფიშე დიჭყჷ. მაართა ლერსეფი 1947 წანას გჷმაბჟინუ. კუნდერაშ მაართა რომანი რე "ციგანობა", ნამუქჷთ 1967 წანას გიშართჷ. რომანი სატირული ხასიათიში რე დო გაციგანჷ კომუნისტური ეპოქაშ ტოტალიტარიზმის. ჩეხოსლოვაკიაშ ოკუპაციაშ უკულ, რომანი აკრძალეს.

1984 წანას გიშართჷ რომანქ ჸოფაშ უბადო სილექინე, ნამუქჷთ ავტორს კაბეტი პოპულარობა მოუღჷ. წინგის ეჭარილი რე ჟირი ოსურიშ, ჟირი კოჩიშ დო ართი ჯოღორიშ რინა პრაღაშ აფუნიშ ბორჯის. წინგიქ 1982 წანას იჭარჷ. რომანიშ სიუჯეტის რე გერსხილი ამერიკალი კინორეჟისორიშ ფილიპ კაუფმანიშ ფილმი, სოდეთ თარი როლეფს არსულენა დენიელ დეი-ლუისი, ლენა ოლინი დო ჟულიეტ ბინოში.

კუნდერა ჭარუნდჷ ჩეხურ დო ფრანგულ ნინეფშა. მაართა ფრანგულნინამი ნაწარმები რდჷ რომანი "სილენგერე" (1995). კუნდერას მუში დუდი ფრანგი ჭარუთ მიოჩქუდჷ დო ფირქენდჷ ნამდა თიში ნაწარმებეფი ოკო იგურუაფუდკო მუჭოთ ფრანგული ლიტერატურა.

მუში ლიტერატურული კარიერაშ გოძვენას კუნდერა რდჷ ბრელი პრესტიჟული ჯილდოშ დო პრემიაშ ლაურეატი. ითვალუდჷ ნობელიშ პრემიაშ შანულამ პრეტენდენტო, მარა პრემია დღას ვემუღებჷ.