მიმარ სინანი

სინანი (კვარჩხანშე) სულეიმან I-შ საფულას, 1566

სინანი (15 პირელი, 1489 , ოფუტე აგირნასი (კაისერიშ გოხოლუას) — 17 კვირკვე, 1588(1588-07-17), სტამბოლი) — ოსმან არქიტექტორეფშე დო ინჟინერეფშე ართ-ართ ჩინებული რე. ედომუშამი ჯოხო აბდულმენან ოღლუ სინანედინ იუსუფი (თურქ. Abdülmennan oğlu Sinaneddin Yusuf), თაშნეშე რჩქინელი რე მუჭოთ ხოჯა მიმარ სინან აღა (თურქ. Hoca Mimar Sinan Ağa — პატჷნი მარწაფალი არქიტექტორი სინანი) დო უბრალოთ მიმარ სინანი (თურქ. Mimar Sinan — არქიტექტორი სინანი). 1538 წანაშე, ოსმალეთიშ თარი არქიტექტორიშ დო ინჟინერიშ პოსტის ოაკოგაფე საქვარებს აწარმენდჷ, სულთან სულეიმან I-შ დო თიში მონძეეფიშ, სელიმ II-შ დო მურად III-შ ბორჯის. უნჯღვერდჷ ომენოღალე დგჷმილეფიშ აკოგაფას — მეჩეთეფი, მუსულმანური დაჭყაფური სკოლეფი (მექთები), აკვედუკეფი, თაშნეშე ჯიხეფი, ხინჯეფი დო სულთანიშ ოურდუმე ლაშქარობეფშო გინაულარეფს. ჩინებული ყორშეფიშ როქსოლანაშ დო თიში მავზოლეუმიშ დჷმაპროექტაფალი.