მუჰამად ალ-იდრისი

მუჰამად ალ-იდრისი
	მუჰამად ალ-იდრისი
	არაბ. محمد الإدريسي
	; მუჰამად ალ-იდრისიშ ნოჭახნაკუ ნოღა სეუტას
დაბადებაშ თარიღი:	1100
დაბადებაშ აბანი:	სეუტა, ალმორავიდეფიშ სახენწჷფო
ღურაშ თარიღი:	1165 (64-65 წანერი)
ღურაშ აბანი:	სეუტა, ალმოჰადეფიშ ხალიფატი
ომენცარე სფერო:	გეოგრაფია; კარტოგრაფია
ჩინებული რე მუჭოთ:	როჯერიშ წინგიშ ავტორი

აბუ აბდულაჰ მუჰამად ალ-იდრისი ალ-ყურთუბი ალ-ჰასანი ას-საბთი (არაბ. أبو عبد الله محمد الإدريسي القرطبي الحسني السبتي; დ. 1100, სეუტა, ალმორავიდეფიშ სახენწჷფო — ღ. 1165, სეუტა, ალმოჰადეფიშ ხალიფატი) — არაბი გეოგრაფი დო კარტოგრაფი.

ალ-იდრისიქ დებადჷ სეუტას. გურაფულენდჷ კორდობას. ახალობაშე ბრელს შარალენდჷ. უკულიან პერიოდის სიცილიაშა მიდართჷ დო დოხოლაფირო 18 წანას მსახურენდჷ სიცილიაშ მაფაშ როჯერ II-შ ომაფე კარს. ჸათაქ ალ-იდრისიქ როჯერ II-შ ინიციატივათ აკადგინჷ ატლასი, ნამუსჷთ "როჯერიშ წინგი"-ს ხოლო უძახჷნა. ატლასიშა მიშულირიე მოსოფელიშ რეგიონეფიშ 70 რუკა დო ჸათე რეგიონეფიშ ფიზიკური, გეოგრაფიული, პოლიტიკური, სოციოეკონომიკური ეჭარუა დო კომენტარეფი. წინგი ჭარილი რე არაბულ ნინაშა დო დორთილიე 7 კლიმატურ ზონათ დო ჸათე ზონეფი დორთილი რე 10 სექციათ.

მუჰამად ალ-იდრისიქ დიდი გოლინა იღვენუ უკულიანი პერიოდიშ მუსლიმი მენცარეფიშა, გიშაკერზაფილო იბნ საიდ ალ-მაღრიბიშა, ჰაფიზი აბრუშა დო იბნ ხალდუნიშა. მარა ალ-იდრისიშ ნახანდეფი ჩინებული ვარდჷ ბჟადალი ევროპას დო თის დიდი როლი ვაჸულაფინუ რენესანსიშ კარტოგრაფიაშ გოვითარაფაშო.

თაშნეშე, ალ-იდრისი რდჷ ავტორი შხვა გეოგრაფიული ნაჭარეფიშ დო ჩანარეფიშ სამედიცინო ლექსიკონიშ.