ნანტიშ ედიქტი
ნანტიშ ედიქტი (ფრანგ. édit de Nantes) — კანონი, ნამუთ მიშეღჷ საფრანგეთიშ მაფა ანრი IV-ქ, 1598 წანაშ პირელს. ედიქტიშ ნძალათ, საფრანგეთიშ კალვინისტი პროტესტანტეფს, ნამუეფსჷთ ჰუგენოტეფს უძახუდეს, მიაჩჷ რწუმაშ დუდიშალაქ.
ნანტიშ ედიქტით გეთუ საფრანგეთიშ რელიგიურ ლჷმეფქ, ნამუთ იგინძარებუდჷ 36 წანაშ გოძვენას. ლჷმეფიშ შედეგო დომინანტური რელიგიათ საფრანგეთის კინ კათოლიციზმი სქიდუდჷ, მარა ჰუგენოტეფიშ რელიგიური ნებეფი ხოლო აღიარაფილი რდჷ.
ნანტიშ ედიქტით მაფა ანრი IV ოცადუდჷ ოჯარალე ართოიანალაშ მეჭირინაფას. ედიქტი აკმოდირთუდჷ 92 პუნქტიშე, თაშნეშე თინა იკათუანდჷ გეძინელი, ფულირი 56 პუნქტის.
ედიქტით პროტესტანტეფს მიაჩჷ გეჸვენჯი შანულამი ნებეფქ:
- სვინდისიშ დუდიშალა დო რელიგიური (პროტესტანტული) ცერემონიეფიშ ნება საფრანგეთიშ შხვადოშხვა ნოღეფს
- პოსტეფიშ დაკინებაშ ნება ადმინისტრაციას, სასამართალოს
- მუნეფიშ სკოლეფიშ დო უნივერსიტეტეფიშ დორსხუაფაშ ნება დო თენეფიშო სახენწჷფო ფინანსეფიშ მეღებაშ ნება
- მუნეფიშ ნოღეფიშ ფორტიფიკაციაშ ნება
- მუნეფიშ ზოხორინელი ოურდუმე ნძალეფიშ ("ჰუგენოტეფიშ მილიცია") ჸოფაშ ნება
- შხვადოშხვა პროფესიეფით მუშობაშ ნება (მაგალთო მანუფაქტურას, თაშნეშე ტექსტილით დო ანჯარეფით ვაჭრუა)
- საფრანგეთიშ მასშტაბით დუდიშული შარალუაშ ნება
- ღურელეფიშ პროტესტანტული სასაფლეფს დასაფლებაშ ნება
ნანტიშ ედიქტიქ გეუქვჷ 1685 წანაშ გჷმათუთაშ ფონტებლოშ ედიქტით, ნამუთ გიშაშქჷ საფრანგეთიშ მაფა ლუი XIV-ქ (ანრი IV-შ მოთა). ჸათე ედიქტიშ შედეგო, ბრელი ჰუგენოტიქ ქიდიტუ საფრანგეთი დო გეუარესჷ საფრანგეთიშ ურთიართალაქ მეზობელი პროტესტანტი სახენწჷფოეფიწკჷმა.
რესურსეფი ინტერნეტის[რედაქტირაფა | წყუშ რედაქტირაფა]
- The Edict of Nantes Archived 2012-12-14 ვებ-ხასჷლას Wayback Machine.
- The Edict of Nantes Archived 2018-09-16 ვებ-ხასჷლას Wayback Machine. Manuscript and French transcription of the Edict of Nantes