ოდენატე
| ოდენატე 𐡠𐡣𐡩𐡮𐡶 | ||
 ტესერა ოდენატეშ გჷმოხანტუათ | ||
| ბჟაეიოლიშ მაფეფიშ მაფა | ||
|---|---|---|
| პოსტის გერინაშ ბორჯი | ||
| 263 – 267 | ||
| წიმოხონი | ტიტულქ გიჭყჷ | |
| მონძე | ვაბალატე | |
პალმირაშ მაფა | ||
| პოსტის გერინაშ ბორჯი | ||
| 260 – 267 | ||
| მონძე | ვაბალატე | |
| დუნაბადი | დოხ. 220 პალმირა, სირია | |
| ნაღურა | დოხ. 267 (46-47 წანერი) პონტოშ ჰერაკლეა, ვარდა ემესა | |
| ალმასქუ | ზენობია | |
| სქუალეფი | ჰაირან I (ჰეროდიანე) ვაბალატე ჰაირან II | |
სეპტიმიუს ოდენატე (არამ. 𐡠𐡣𐡩𐡮𐡶, ლათ. Lucius Septimius Odaenathus, ბერძ. Οδαίναθος, არაბ. أذينة; დ. დოხოლაფირო 220 — ღ. 267) — პალმირაშ ომაფეშ დუმარსხუაფალი მაფა (მალიქი), ნამუთ მართუნდჷ პალმირას (სირია) 260-267 წანეფს.
260 წანას, შაპურ I-ქ დამარცხჷ რომიშ იმპერატორი ვალერიანე დო თინა ტყვეთ ხეშა ქაშეჸოთჷ. ოდენატე ალურდჷ ვალერიანეშ მონძეს გალიენუსის დო სპარსალეფის ოლიმუდჷ. თიში ხემანჯღვერობათ პალმირაშ არმიაქ სერიოზული გავალი მიორინუ სპარსალეფს. 260 წანას გალიენუსიშ მართუალაშ მეხჷ ეარყჷ უზურპატორი მაკრიანუსიქ, ნამუქჷთ მუში სქუალეფი მაკრიანუს უკულაში დო კვიეტუსი ქჷმწარინუ იმპერატორეფო. მაკრიანუსიქ ართი სქუა ევროპაშა მიდეჸონჷ დო მაჟირა (კვიეტუსი) სირიას ქიდიტუ. ჸათე მომენტით ქისარგებლჷ ოდენატექ, დამარცხჷ კვიეტუსი დო არყებულეფი მოჯალაგუ. უკულიანი პერიოდიშ მიმალობას, ოდენატექ თეშ გენძალიერჷ თინა ხვალე ფორმალურო. ომორჩილჷდჷ რომიშ იმპერატორს დო მუში ომაფეს მართუნდჷ მუჭოთ ზოხორინელი მამართალი. 262 წანას ოდენატექ წყარმალუ ევფრატი გეგნოკვათჷ დო ქიდეკინჷ კარე დო ნუსაიბინი. უკულ თიქ ლესქერობა გაგინძორჷ დო სპარსეთიშ ნანანოღა ქტესიფონი ქართას ქინახუნუ, მარა ვეიაჭოფუ. შანულამი გომორძგუეფიშ უკულ ოდენატექ დუდი მაფეფიშ მაფათ გეგმაცხადჷ დო მუში უნჩაში ქომოლსქუა ჰაირან I (ჰეროდიანე) წორო-მამართალო ქჷმწარინუ. 263 წანაშო ოდენატე აკონტროლენდჷ ლევანტის, ჯეზირეს დო ანატოლიაშ ბჟაეიოლი ნორთის. 266 წანას ოდენატექ წიმიჭყჷ ახალი ოურდუმე კამპანია სპარსალეფიშ მეხჷ მარა ექსპედიცია ბოლოშა ვემუჸონაფუ, მუშენდა ბითინიაშა გერმანალეფქ გემშეჭკირეს. ანატოლიური ოურდუმე კამპანიაშ მიმალობას, 267 წანას ოდენატე დო ჰეროდიანე დოჸვილეს. მირდუ თინეფიშ მაჸვილარი რჩქინელი ვარე, ხვალე შხვადოშხვა ვერსია არსებენს ისტორიული წყუეფს. ოდენატეშ ღურაშ უკულ ხვისტაშა ეშართჷ ვაბალატექ, ნამუშ რეგენტი რდჷ დიდა ზენობია.