ოშწანურაშ ლჷმა
ოშწანურაშ ლჷმა (ინგლ. Fight of the Century) — ბოქსიშ მატჩი მონკა წონაშ კატეგორიას, მოსოფელიშ ჩემპიონი (WBC/WBA) ჯო ფრეიზერიშ (26-0, 23 ნოკაუტი) დო (Ring/lineal) ჩემპიონი მუჰამედ ალიშ (31-0, 25 ნოკაუტი) შქას, 1971 წანაშ 8 მელახის, ნიუ-იორკის, მედისონ-სკვერ-გარდენს.
ოშწანურაშ ლჷმა რე მერჩქინელ უდიდაშ მატჩო ბოქსიშ ისტორიას. ვართ ფრეიზერს დო ვართ ალის წაგება ვაუღუდჷ. ოშწანურაშ ლჷმა რდჷ ჯო ფრეიზერიშ დო მუჰამედ ალიშ მაართა შეხვამილაფა, ალი-ფრეიზერიშ ტრილოგიაშე. თენეფიშ მაჟია მატჩი რდჷ სუპერ ლჷმა II (1974) დო მასუმა ისტორიული ტრილერი მანილას (1975).
მატჩიშახ
[რედაქტირაფა | წყუშ რედაქტირაფა]მუჰამედ ალიქ მოსოფელიშ ჩემპიონიშ ტიტული მიპალუ 1964 წანას, სონი ლისტონიწკჷმა მოგებათ. მუჰამედ ალი ვიეტნამიშ ლჷმას აპროტესტენდ დო ჯარშა ხოლო ვემიშჷ. თეშ გეშა, ალიშ ჩემპიონიშ ტიტული გეგლანწყეს, ბოქსიორიშ ლიცენზია ხოლო მიდუღეს დო კარიერაშ გოგინძორაფაშ ნება ხოლო ვემეჩეს. ლიცენზიაშ დორთინაფაშ უკულ, ალიქ რინგის დართუ დო ორჯგინჷ დიო ჯერი ქვორის დო უკულ ოსკარ ბონავენას.
ალი აქტიურ სპორტის ვარდუნ, ჯო ფრეიზერქ ჩემპიონიშ ტიტულშო ჩემპიონობაშ პრეტენდენტეფს ბასტერ მეტისის დო ჯიმი ელისის მუგუ დო ჩემპიონობაშ ტიტული ხოლო მიპალუ. ჯიმი ელისწკჷმა მოგებათ ფრეიზერქ მიპალუ WBA-შ ვერსიათ ჩემპიონიშ ტიტული დო WBC-შ ვაკანტური ტიტული.
მატჩი
[რედაქტირაფა | წყუშ რედაქტირაფა]მატჩი 15 რაუნდიანი რდჷ. ლჷმაქ დიჭყჷ ალიშ დომინირაფათ. ფრეიზერქ გეაქტიურ მანთხა რაუნდიშე დო უმოს აგრესიულო გინირთჷ დო ქიდიჭყჷ მუშ შინელ კვარჩხან ჰუკიშ ხვარება. მაამშვა რაუნდიშე ალიქ შულადა ქუდაჭყჷ დო ჯგირო დოჭყაფილი სუმი რაუნდიშ ინიციატივა მიოდინუ. უკულიან რაუნდეფს ფრეიზერი ლიდერენდჷ დო კვარჩხან ჰუკის ჯგირო ხვარენდჷ. მავითოხუთა რაუნდის კინ კვარჩხან ჰუკიშ მეგამათ ფრეიზერქ ალი ქუდარაგუ. რეფერიშ ოთხიშ თვალუაშა ალიქ გედირთჷ დო ჩხუპი გაგინძორჷ. 15 რაუნდიანი ლჷმაშ უკულ, ფრეიზერქ მიგუ დო რაუნდეფქ ხოლო ათაშ გირთუ: არტი აიდალა - ფრეიზერი, 9-6-0; ბილ რეხტი - ფრეიზერი, 11-4-0, არტურ მერკანტი (რეფერი) - ფრეიზერი, 8-6-1.
Scorecard
[რედაქტირაფა | წყუშ რედაქტირაფა]| რაუნდი | 1 | 2 | 3 | 4 | 5 | 6 | 7 | 8 | 9 | 10 | 11 | 12 | 13 | 14 | 15 | ტოტალი |
|---|---|---|---|---|---|---|---|---|---|---|---|---|---|---|---|---|
| არტი აიდალა (judge) | A | A | F | F | F | F | F | A | A | F | F | F | A | A | F | ფრეიზერი, 9–6–0 |
| ბილ რეხტი (judge) | F | A | F | F | A | F | F | F | A | F | F | F | F | A | F | ფრეიზერი, 11–4–0 |
| არტურ მერკანტი (referee) | A | A | F | F | F | A | A | F | A | A | F | E | F | F | F | ფრეიზერი, 8–6–1 |
ქოძირით თაშნეშე
[რედაქტირაფა | წყუშ რედაქტირაფა]- სუპერ ლჷმა II - მაჟია ლჷმა (1974)
- ტრილერი მანილას - მასუმა ლჷმა (1975)