დინორეშა გინულა

პროკოპი კესარიალი

ვიკიპედიაშე
პროკოპი კესარიალი
დაბადებაშ თარიღი:

დოხოლაფირო 500

დაბადებაშ აბანი:

კესარია

ღურაშ თარიღი:

დოხოლაფირო 565

ერუანობა:

ბერძენი

საქვარუა:

ისტორიკოსი,
ჭარუ, იურისტი

Magnum opus:
  • ლჷმეფიშ ისტორია
  • აკოგაფეფიშ გეშა
  • ნაფულა ისტორია
ნინა:

ჯვეში ბერძენული ნინა

პროკოპი კესარიალი (ბერძ. Προκόπιος ὁ Καισαρεύς; ლათ. Procopius Caesarensis, დ. დოხოლაფირო 500 — ღ. დოხოლაფირო 565) — ბერძენი ისტორიკოსი დო იურისტი, მოღალენდჷ ბიზანტიაშ იმპერატორიშ იუსტინიანე I-შ კარს.

პროკოპიშ ბიოგრაფიაშ გეშა ინფორმაციას ბგებულენთ ბიზანტიური ენციკლოპედია სუდაშე. პროკოპი დაბადებე ნოღა კესარიას. თის ჯგირი გონათაფა მეუღებუ. ჯგირო ნოჩქვე ლათინური ნინა დო პროფესიათ იურისტი ჸოფე. პროკოპი რდჷ ბიზანტიარი მანჯღვერთარიშ ველისარიუსიშ მელამოსე დო ოკათუდჷ ველისარიუსიშ ოურდუმე კამპანიეფს: ოორუე აფრიკას, იტალიას დო სპარსეთის.

პროკოპიშ ღურაშ ზუსტი თარიღი დო აბანი რჩქინელი ვარე.

ლჷმეფიშ ისტორია[რედაქტირაფა | წყუშ რედაქტირაფა]

პროკოპიშ არძაშე უმოსო შანულამი ნახანდი რე "იუსტინიანეშ ლჷმეფიშ ისტორია", ნამუთ იკათუანს ბრუო წინგის.

მაართა ჟირი წინგის (ნამუეფსჷთ ფშხირას სპარსული ლჷმეფს უძახჷნა) ეჭარილიე ბიზანტია-სპარსეთიშ კონფლიქტეფი შქაწყარმალონას, სირიას, სომხეთის, ეგრისის დო იბერიას. პროკოპი დეტალურო ეთმოჭარუნს სასანიდური ირანიშ შაჰიშ კავად I-შ ლაშქუეფს, 532 წანაშ ნიკაშ არყებას, ანტიოქიაშ მოჯალაგუას, ანტიოქიაშ მახორუეფიშ გინოხორაფას მესოპოტამიაშა, 541–549 წანეფიშ ეპიდემიას დო შხვა.

გეჸვენჯი ჟირი წინგის (ვანდალეფიშ ლჷმეფი), პროკოპი ეჭარუნს ველისარიუსიშ ლჷმას ვანდალეფიწკჷმა. ეკონია ოთწი წინგის (გოთური ლჷმეფი) მოჩამილიე ველისარიუსიშ იტალიური ოურდუმე კამპანია. პროკოპი კესარიალიშ ლჷმეფიშ ისტორიაქ კაბეტი გოლინა იღვენუ ბიზანტიური ისტორიოგრაფიაშა. აგათია სქოლასტიკოსიშ ნაჭარა "ისტორიეფი" პროკოპიშ სტილითიე ჭარილი დო პროკოპიშ ნახანდიშ გაგინძარება რე.

ნაფულა ისტორია[რედაქტირაფა | წყუშ რედაქტირაფა]

პროკოპიშ ჸათე ნაწარმების მიოგორეს ოშწანურეფიშ უკულ, ვატიკანიშ ბიბლიოთეკას. თინა მაართათ გჷმაბჟინეს ლიონს 1623 წანას. ნაფულა ისტორიას, პროკოპი აკრიტიკენს იუსტინიანეს, თიში ალმასქუ დიაფალი თეოდორას, მანჯღვერთარი ველისარიუსის დო თიში ოსური ანტონინას. პროკოპი ახასიათენს იუსტინიანეს მუჭოთ უბადო, ვაკომპეტენტური დო ჰარამი ადამიერს. ველისარიუსი ეჭარილიე მუჭოთ დაღარი კოჩი, ნამუთ ოსურს ურჩქილედუ დო ზოხორინელო მუთუნი ვეგნაჭყვიდედუ.

აკოგაფეფიშ გეშა[რედაქტირაფა | წყუშ რედაქტირაფა]

აკოგაფეფიშ გეშა რე პანეგირიკული ხასიათიშ ნახანდი. ჸათაქ ეჭარილი რე ჸეთი პროექტეფი, ნამუეფქჷთ იკეთინჷ ბიზანტიაშ იმპერიას, იუსტინიანეშ ინიციატივათ. იუსტინიანე მოჩამილი რე მუჭოთ ქირსიანი იმპერატორი, ნამუქჷთ ეიოგჷ ბრელი ეკლესია, წყარიშ სისტემეფი, აკვედუკეფი, ფორტიფიკაციეფი დო შხვა. ჸათე წინგის მოჩამილი შხვადოშხვა ფაქტეფი მენცარეფს ნანდულო ვემიოჩქუნა, მუშენდა თინა იუსტინიანეშ ზოჯალათ რე ჭარილი. წინგის შეთმოფხვადუთ ისტორიული ჩილათეფს ხოლო.

რესურსეფი ინტერნეტის[რედაქტირაფა | წყუშ რედაქტირაფა]