პუმპულა (ჩე)

პუმპულა (ჩე) — ქორთული აბორიგენული ჩეჸურძენამი ჯიში სამარგალოშე.

გვალო იშვიათი ჯიში რე. კაკალია ჯინჯეფშა რე მეგორაფილი რიონიშ პიჯიშ ოფუტეეფს: შუაქალაქის, ნაესაკაოს, კოდორს, გულეისკარს, კეთილარს. გინოჩამათ ჩინებულიე, ნამჷ-და ჭყონდიდარეფი აბანობურ მებნეხეეფს პიჯალას უდვანდეს — „პუმპულა ჩქინი ქორდას დო არძანერ ვალდვალაშე გადუდიშულენთია“.

ბოტანიკური ეჭარუა

ძინათებული ფურცელი დიდი ზჷმაშიე, ოვალური ფორმაშ, სუმნაკვათამი. ფურცელიშ გიმენი განი ქეჩაშობურო რე გობუძგურელი. პეული ჟირსქესამიე. ტიანი ოშქაშე ზჷმაშიე, კონუსური ფორმაშ. კაკალეფი დიდი ზჷმაშიე, ელიფსური ფორმაშ. მონჭაფაშ ბორჯის ქრავაშფერიე.

ჩე პუმპულა ნძალიერი რდუალაშ დო ოშქაშემუნაწიებამიე. ოვეგეტაციე პერიოდი გვიგვილიშ გონწყჷმაშე ედომშამ მონჭაფაშახ 198 დღა რე. ედომშამ მონჭაფაშა გჷმათუთაშ მაჟირა გვერდშე მიშმურს. ჸურძენიშ ედომშამი მონჭაფაშ პერიოდის თიში შანქარიანობა ოჭირინუანს 22-23%-ს, სიბჟე — 6.8-7.5 გ/ლ-ს.

ჩე პუმპულა გჷმირინუაფჷ მაღალი ხარისხიშ სუფრაშ ჩე, სქჷრე ღვინიშ დადგჷმალო.

ლიტერატურა

• უჯმაჯურიძე ლ., კაკაბაძე გ., მამასახლიშვილი ლ., „ქართული ვაზის ჯიშები“, თბ., 2018, გვ. 302