დანიელ ფიფია

დანიელ ფიფია (დ. 1896 წანა, წალენჯიხაშ რაიონიშ ოფუტე ობუჯი – ღ.1924 წანა) — პოეტი, მარგალ ბაირონო ჯოხოდვალირი. დებადჷ პავლე ფიფია დო ქეთევან კვირკველიაშ ფანიას. ჩილი დო ქომონჯის დანიელშახ ჟირი ბოშეფი დოღურუნა დო დანიელიშ გორჩქინა თინეფშო დიდ ხიოლი ჸოფე. მარა დანიელქ ბაღანობაშე ქჷდელახჷ. მუმაქ ქიანა ექიმეფშა გილეჸონჷ, მორო იშენ მუთუნქ ვემეხვარჷ. ჟირი წანერი დო გვერდი რდჷნ თეშ მუმაქ დუღურჷ, შკვით წანერი რდჷნ თეშ დიდაქ დო ქაშასქიდჷ თაშ დალეფიშ ხეს. თიქ ჟირ კლასამი სკოლა გაათუ ოფუტე ობუჯის დო მაჟირა სკოლაშა მიშელჷ, მარა უფარობაშ გეშა მიოტებელქ აჸუ გურაფაქ. უკული ქუთეშიშ გიმნაზია გაათუ დო ობუჯის ქჷდიჭყჷ მაგურაფალო ხანდა. თე ბორჯის გეჩინებაფუ შხვა დიდი კათა: კალისტრატე სალია, ლეო ქიაჩელი, ეგნატე ფიფია დო თინეფწკჷმა ართო ქიანა საქვარეფი ქიმინჷ მუშ ოფუტეშო.

მოღალობა

დანიელი მარგალურ ნინაშა ჭარჷნდჷ. თის ჭარილი აფუ გჷმორჩქინელი ნაჭარა "ხუმლა კოჩი", ისტორიული პოემა "ბულათია", ნამუთ 1855 - 1856 წანეფიშ მარგალეფიშ არყაფაშენ რე. დანიელ ფიფია სოციალ-დემოკრატიული პარტიაშ მაკათური დო ზუგდიდიშ მაზრას მადუდალე პროპაგანდისტი რდჷ.

ღურა

1924 წანაშ მარაშინათუთას, ქართიშ უნივერსიტეტიშ III კურსიშ სტუდენტი, 27 წანერი დანიელ ფიფია, მუჭოთ პოლიტიკურო ვასტაბილური კოჩინ, ბოლშევიკეფქ გვალო უდჷნოშურეთ გორხვეს დო 80-იან წანეფშა თიშ არგამათ შინა ფაქტობურო ვეშილებედჷ. დანიელიშ ნაჭარეფი დოჭვეს. ჩქინდა მაჭირინუ პოემა ,,ბულათიაქ, არიკი ,,ხუმლა კოჩიქ, მარგალურ–ქორთულ ლერსიკონიშ ჭიჭე ნორთიქ დო ხოლო მუზმარენი ლერსიქ.

რესურსეფი ინტერნეტის

• დანიელ ფიფიაშ ნამთინე ლერსეფი