ქვარაკუჩხამეფი (Gastropoda) — უგაგაჩეეფიშ კლასი მოლუსკეფიშ ტიპიშე. ქვარაკუჩხამეფიშ რსხული აკმოდირთუ დუდშე, ტანშე დო კუჩხეფშე. დუდს ართი ვარდა ჟირი ჭკობა ოცაცაფუ რე. კუჩხი რსხულიშ გიმე (ქვარაშ) ჸურე რე, კუჩხიშ გიმე ნაჩა უღუ. ტანიშ ანუ შიგანიშ პარკიშ ქვინჯი მანტიათ რე მორინელი. მანტიაშ დო შიგანიშ პარკის შქას რე მანტიაშ ქოქა, ნამუსჷთ ინოხე გური, შუროღალი ორგანოეფი, ჭაჭა, შიგანიშ პარკი — ოჭკომალიშ მარცუაფალი დო სასქესო ორგანოეფი. ქვარაკუჩხამეფიშ მანტია კანიშ თხითხუ ხუნჭი რე, ნამუშ ჯარკვალეფი გიშმართჷნა ქერენჭიშ (ფერწოშ დოხორეშ) წჷმმაქიმინალ ნიფთიარობეფს. ქერენჭი შხვადოშხვა ფორმაშ რე.
