ჩინური ჭარალუა

ვიკიპედიაშე
漢字 / 汉字 ჩინური სიმბოლო ჰანზიში, კანჯი, ჰანჯა, ჰან ტუ, ჭითატ გოლექინაფილი იეროგლიფეფი რე

ჩინური ჭარალუა (ტრად. 漢字, გოლექ. 汉字, პინ-ინშა Hànzì) — ლოგოგრამული ჭარალუა. ჭარალუაშ თე ტიპი გჷმირინუაფუ ვახვალე ჩინურს, თაშნეშე ნორთობურო იაპონურს დო კორეულს ხოლო. კინოხ თის ვიეტნამურ ნინას ხოლო გჷმირინუანდეს.

ჩინურ ჭარალუაქ წჷმიქიმინჷ 3200 წანაშ კინოხ დო სავარაუდოთ, ამდღარშო არსებული დო ასეშა ასქილადირი ჭარალუეფშე უჯვეშაში რე. თეშ უმკუჯინალო, თე 3200 წანაშ გოძვენას ჩინურ ჭარალუაქ ძალამი შანულამი თირუეფი გჷნიცადჷ დო თიში უჯვეშაში მინუშეფიშ კითხირი ხვალე ნინეფიშმენცარეფს დო არქეოლოგეფს შეულებჷნა.

ჩინეთის მეგორაფილი ჭარალუაშ უჯვეშაში მინუშეფი, ნამუთ კუშ ჯაშთანს რე რსულებურინ, დოხოლაფირო ჯვ. წ. VIII ვითოშწანურას ორხველჷ. თე მუკნაჭარეფი წჷმარინუანს ჭარალუაშ უჯვეშაშ მინუშეფს საართოთ, მარა თინეფიშ გოშიფრუაქ დიოდღარო ვამიხუჯინჷ. თაშნეშე უჩინებუ რე თინეფიშ რსხუ ჩინურ ჭარალუაწკჷმა[1].

ჩინურ ჭარალუას სიმბოლოეფიშ მუდანობა მუსხირენ ვითობათ ვითოში რე დო ირ სიმბოლოს უღუ ვახვალე ფონეტიკური, თაშნეშე არზობური შანულობა ხოლო.

ჩინური სიმბოლოეფიშ 4% რე პიქტოგრამეფშე წარმაფილი, მარა უმენტაშ შვანს თეხანურ იეროგლიფეფს დო პიქტოგრამეფს შქას რსხუშ ძირაფა ვართ ეფერი ლექინი რე. დოსქილადირეფი ლოგიკურო რე აკოდგინელი მუსხირენი ლექინი იეროგლიფშე.

დიდ ლექსიკონეფშა 46 ვითოშშე უმოსი იეროგლიფი რე მიშულირი, მარათ თინეფიშ დიდი მუდანობა ძალამ ოშა-გოშათ გჷმირინუაფუ. ოშქაშეთ ჩინარს ვარდა ჩინურიშ მარჩქენჯის 3000-4000 იეროგლიფი უჩქჷ.

ტრადიციულო ირი იეროგლიფი ეშანჷნს ირ ლაწკარს, მიარე ჩინური ზიტყვა აკმოდირთუ ართშე უმოს ლაწკარშე, ნამუეფიშ ოჭარალო გჷმირინუაფუ ართშე უმოსი იეროგლიფი. ჩინური ნინაშ შხვადოშხვა დიალექტეფს იეროგლიფიშ გჷმორაგადაფა გინორთელი რე, მარა შანულობა დო ჭარუაშ სახე საართო რე არძაშო. თეშ მოხ, მიარე სიმბოლო გინულირი რე იაპონურ დო კორეულ ნინეფშა, სოდე უკვე გვალო შხვა შანულობა დო გჷმორადაგი აფუ მეღებული.

კონტინენტურ ჩინეთის გჷმირინუაფუ 1956 წანაშე გოლექინაფილი (ლექინი) ჭარალუა, ტაივანს დო ჰონგკონგის ტრადიციული ჩინური ჭარალუა. გოლექინაფილი ჩინური თაშნეშე გეგნიღეს სინგაპურს ხოლო.

თაშნეშე ქოძირით[რედაქტირაფა | წყუშ რედაქტირაფა]

სქოლიო[რედაქტირაფა | წყუშ რედაქტირაფა]

  1. http://grani.ru/Society/History/m.30949.html Archived 2006-12-09 ვებ-ხასჷლას Wayback Machine. (რუსული)