ანატომიური დვალუა (წვანეთ)
ოჸულე (ლათ. occiput cranii) — ანატომიური ტერმინი, ნამუთ გჷმოხანტუნს დუდიშ ხოკოშ უკახალენი ნორთის. ოჸულეშ ტრავმაქ შილებე ბაზილარული ხოკოშ მოტახილობა გჷმიჭანუასჷნ. ოჸულეშ ეშაჩინება შანულამი რე ადამიერიშ ჸოფურიშ პერიოდის დოკვირაფაშ ბორჯის.
ოჸულეშ ძვალიშ თარი ნორთი სალიშობური ძვალიშ რსხულს მითმიარსხუ სოლიშობურ – ოჸულეშ სინქონდროზათ. ხანიშ ძინაწკჷმა ართო ხინტკირი გჷნიცადენს გოძვალაფას დო საბოლოოთ ჟირხოლო ძვალი არსხუ ართიანს. თარი ნორთიშ ჟილე, ხოკოშ ღრუშჸურე ჟინპიჯი სადა დო ინოკინელი რე. სოლიშობური ძვალიშ რსხულწკჷმა ართო თინა აკმოქიმინუნს დუდთუდოს, ნამუთ მეწურაფილი რე დიდი რხვილშა (თის გეძჷ მოგჷრძე ტვინი, ხინჯი დო ტვინიშ თარი არტერია მუში ნოჸელეფით). თარი ნორთიშ თუდო ჟინპიჯი ხოშქორამი რე, შქა აბანს მიოხე ჯგირო გჷმოხანტილი ხორხონტაშ გა დო ხოშქორამი ღოზეფი. ოჸულეშ ძვალიშ ლატერალური ნორთეფიშ დო თარი ნორთიშ ელაგელა კიდეფი არსხუაფუ საფეთქელიშ ძვალიშ კირდეამი ნორთიშ უკახალენი კიდას. თინეფს შქას აკმიქიმინუ კირდეამი ოჸულეშ ჭვიტე, ნამუთ ეშაფშაფილი რე ხინტკირით, თ. ჯ. კირდეამ-ოჸულე სინქონდროზათ.
