ართურ ჩარლზ კლარკი

ართურ ჩარლზ კლარკი
ართურ ჩარლზ კლარკი 1965 წანას
დაბადებაშ თარიღი:	16 ქირსეთუთა, 1917
დაბადებაშ აბანი:	მაინჰედი, ინგლისი
ღურაშ თარიღი:	მელახი 19, 2008 (90 წანერი)
ღურაშ აბანი:	კოლომბო, შრი-ლანკა
ერუანობა:	ინგლისარი
საქვარუა:	ჭარუ, ნოველისტი
პერიოდი :	1946–2008
Magnum opus:	ბაღანობაშ დათებუ (1953) 2001: კოსმოსური ოდისეა (1968) პაემანი რამაწკჷმა (1973) სამოთხეშ ფანტანეფი (1979)
ჟანრი:	ომენცარე ფანტასტიკა, მენცარობაშ პოპულარიზაცია
ნინა:	ინგლისური ნინა
ჯილდოეფი:	ჰიუგოშ პრემია (1956, 1974, 1980) კალინგაშ პრემია (1961) სტიუარტ ბალანტაინიშ მენდალი (1963) ნებულაშ პრემია (1971, 1979) მარკონიშ პრემია (1982) ფანტასტიკაშ გროსმეისტერიშ პრემია (1986) ბრიტანეთიშ იმპერიაშ ორდენი (1989) თეოდორ ფონ კარმანიშ პრემია (1996) რაინდი ბაკალავრი (2000) ტელურაიდიშ ტექნოლოგიური ფესტივალიშ პრემია (2003) რობერტ ჰაინლაინიშ პრემია (2004)

სერ ართურ ჩარლზ კლარკი (ინგლ. Sir Arthur Charles Clarke; დ. 16 ქირსეთუთა, 1917, მაინჰედი, ინგლისი — ღ. 19 მელახი, 2008, კოლომბო, შრი-ლანკა) — ინგლისარი ჭარუ, ნოველისტი, მენცარი, მენცარობაშ პოპულარიზატორი დო ფუტუროლოგი.

ბიოგრაფია

ართურ ჩარლზ კლარკიქ დებადჷ 1917 წანაშ 16 ქირსეთუთას. გურაფულენდჷ ტონტონიშ სკოლას. 1936 წანას კლარკიქ ოცხოვრებშა ლონდონიშა გეგნორთჷ. მაჟირა მოსოფელიშ ლჷმაშ ბორჯის მსახურენდჷ ბრიტანეთიშ ომაფე ოჰეერე ნძალეფს, რადარიშ სპეციალისტო. ლჷმაშ თებაშ უკულ გემშართჷ ლონდონიშ ომაფე კოლეჯიშა, სოდეთ მათემატიკას დო ფიზიკას გურაფულენდჷ. გურაფაშ თებაშ უკული მუშენდჷ Physics Abstracts-იშ რედაქტორიშ ასისტენტო. 1946-1947 წანეფს დო კინ 1951-1953 წანეფს რდჷ ბრიტანეთიშ ინტერპლანეტარული ჯარალუაშ (BIS) პრეზიდენტი. 1945 წანას კლარკიქ წჷმარინუ ალმაშარეეფიშ კომუნიკაციეფიშ სისტემეფიშ კონცეფცია გეოსტაციონარული ორბიტეფიშ გჷმორინაფათ. ჸათე პერიოდეფს კლარკიქ გჷმაბჟინუ მენცარული წინგეფი, სოდეთ ეთმოჭარუნს რაკეტული ტექნოლოგიეფიშ დო კოსმოსური შარალუაშ ტექნიკურ დეტალეფს. ჸათე დო შხვა მენცარული რკვიებეფიშ გეშა, კლარკიშ პატიოცემელო საირქიანო ასტრონომიული რსხუქ, გეოსტაციონარულ ორბიტას, ნამუთ იდვალუაფჷ ეკვატორიშე 36,000 კილომეტრიშ სიმაღალას, გიოდჷ კლარკიშ ორბიტა.

კლარკი დაინტერესებული რდჷ სკუბა დაივინგით დო ჸათეშ გეშათ 1956 წანას, ოცხოვრებშა ცეილონიშა (ასეიან შრი-ლანკა) გეგნორთჷ, სოდეთ ღურაშახ ცხოვრენდჷ. შრი-ლანკას კლარკიქ დაივინგიშ სკოლა ხოლო ქუდარსხუ.

კლარკიქ ლიტერატურული კარიერა 1930-იან წანეფს დიჭყჷ. ჸათე პერიოდის გჷმაბჟინუ ომენცარე ფანტასტიკაშ ჟანრიშ შხვადოშხვა ნოველეფი. 1953 წანას გიშართჷ რომანქ "ბაღანობაშ დათებუ", ნამუქჷთ ავტორს დიდი პოპულარობა მოუღჷ. ჸათე ნახანდის უკულ მაჸუნჷ შხვა პოპულარულ ნაწარმებეფქ: "2001: კოსმოსური ოდისეა", "პაემანი რამაწკჷმა", "სამოთხეშ ფანტანეფი" დო შხვა. კლარკი რდჷ სცენარიშ ავტორი ფილმიშ "2001: კოსმოსური ოდისეა". ფილმი გერსხილი რე კლარკიშ თხობელუას "სენტინელი" დო თაშნეშე კლარკიშ შხვა კუნტა თხობელუეფს.

ართურ ჩარლზ კლარკი რდჷ შხვადოშხვა პრემიეფიშ დო ჯილდოეფიშ ლაურეატი. კლარკის, რობერტ ჰაინლაინი დო აიზეკ აზიმოვიწკჷმა ართო მიშინუანა მუჭოთ ომენცარე ფანტასტიკაშ "დიდი სუმი"-ს (The "Big Three").

რესურსეფი ინტერნეტის

• Arthur C. Clarke Official Website
• The Arthur C. Clarke Foundation
• Arthur C. Clarke (1917–2008) International Astronautical Federation
• ართურ ჩარლზ კლარკი — კინოფილმეფიშ ინტერნეტ მუნაჩემეფიშ ბაზას (ინგლისური)
• Sir Arthur C Clarke: 90th Birthday Reflections YouTube-ს
• Grave