ბილ გეიტსი

უილიამ ბილ გეიტსი (ინგლ. William Henry "Bill" Gates III; 28 გჷმათუთა, 1955, სიეტლი, ააშ), კომპანია ”მაიკროსოფტიშ” ხემანჯღვერი დო გჷმაჭყაფალი. მუში პერსონალური კაპიტალი ,,ფორბსი’’-შ 2008 წანაშ მუნაჩემეფით აკმადგინანს 58 მილიარდ დოლარს. ”მაიკროსოფტიშ” წანმოწანური ღალა 2007 წანაშო 51,2 მილიარდი დოლარი რდჷ, დოსაქვარაფილი რე 78 000 ადამიერი 105 ქიანას, სოდეთ "მაიკროსოფტის" დორხველი წჷმმარინაფალობეფი უღჷ.

გეითსიქ მუშ ჟირ დაწკჷმა ართო ნოღა სიეტლის მირდჷ. მუმამუში უილიამ გეითს II, რდჷ სიეტლიშ რწუმებული, დიდა, მერი გეითსი რდჷ სკოლაშ მაგურაფალი დო ვაშინგტონიშ უნივერსიტეტიშ მამართვალეფიშ მაკათური.

ბილ გეითსის კომპიუტერული პროგრამეფიშ ინტერესიქ გორუჩქინდჷ 13 წანაშ ასაკის.

1973 წანას მუქ ჰარვარდიშ უნივერსიტეტის ენირიცხჷ, მარა გვალო მალას დიტუ ოგურაფუ, თიშენ, ნამდა თელი ენერგია ”მაიკროსოფტიშ” გოვითარაფაშო გაგმურინუაფუდჷკო. მუქ მუში საქვარუა 1975 წანას, ბაღანობაშ მაჸალე პოლ ალენწკჷმა ართო დიჭყჷ.

მუნეფი დარწუმებული რდეს, ნამდა კომპიუტერი მალას გინირთუდჷ უციო ატრიბუტი არძა სამუშა ტაბაკის, ოფისეფს დო ჸუდეეფს. მუნეფქ თელ ენერგიათ დიჭყეს პერსონალური კომპიუტერიშ გოჭყაფაშე მუშობა.

1999 წანას გეითსიქ ჭარჷ, სოდეთ რე ჩიება, მუჭო შეულებუ კომპიუტერულ ტექნოლოგიეფს, გინოჭყვიდას პრობლემეფი ახლებური მეთოდით. წინგიქ 25 ნინაშა 60 ქიანას გჷშართჷ.

1994 წანაშ 1 ღურთუთას მუქ ჩილო ქეკიხუნუ მელინდა ფრენჩი, ჸუნა სუმი სქუა.

ბილ გეითსი დო მუში ჩილი დაკინებული რენა ქველმოქმენდალათ, მუნეფქ 28,8 მილიარდი დოლარი (2005 წ.) გინორიცხეს მოსოფელიშ ჭყანთელობაშ დო განათლებაშ ფონდიშა.

კანკალეშა ბილ გეითსი მუშ ჸუდეს ონწყჷნს სადილეფს. სადილშა დოჭიშაფა შეულებუ არძას, მით გინიგანს 1 000 000 დოლარს მაჭანაფალშე. თელი შაყარელი ფარა დიუკიშ უნივერსიტეტშა გინმირიცხუ, სოდეთ მუში ჩილი მელინდა ფრენჩი გურაფულენდჷ.

რესურსეფი ინტერნეტის

ბილ გეიტსიშ ელაჩამეფი