კალმარიშ ლაჸაფი

კალმარიშ ლაჸაფი; კორ. 오징어게임
ფორმატი	ექშენი; ოდუდგინალე; თრილერი; დრამა; გინოსქილადა;
ავტორი	ჰვან დონ ჰიოკი
სცენარი	ჰვან დონ ჰიოკი
რეჟისორი	ჰვან დონ ჰიოკი
როლეფს	ლი ჩონ ჯე; პაკ ჰე სუ; ო იონ სუ; ვი ჰა ჯუნი; ჩონ ჰო იონი; ჰო სონ თე; ანუპამ ტრიპატი; კიმ ჯუ რიონი;
კომპოზიტორი	ჩენ ჯოილი
ქიანა	ობჟათე კორეა
ნინა	კორეული
სეზონი	1
სერია	9
ხანგინძალა	32—63 წთ.
კომპანია	Siren Pictures Inc.
ორიგინალური არხი	Netflix
ძირაფაშ ფორმატი	4K (Ultra HD)
აუდიო ფორმატი	Dolby Atmos
მაართათ ეთერს	2021 წანაშ 17 ეკენიაშე
საიტი

კალმარიშ ლაჸაფი (კორ. 오징어게임) — ობჟათეკორეული ვებ-სერიალი გინოსქილადაშ, ოდუდგინალე ექშენიშ, თრილერიშ დო დრამაშ ჟანრით. ჩხოროხოლო ეპიზოდიშ ავტორი დო რეჟისორო რე ჰვან დონ ჰიოკი. თარ როლს ლაჸაფენდეს ლი ჩონ ჯე, პაკ ჰე სუ, ო იონ სუ, ვი ჰა ჯუნი, ჩონ ჰო იონი, ჰო სონ თე, ანუპამ ტრიპატი დო კიმ ჯუ რიონი. სერიალი თხობენს თი ადამიერეფიშ ბუნაშენ, ნამუეფჷთ ფარაშ ოხვილობაშ გეშა ღებულენა მოწვიებას ფულირ ტურნირს გინოსქილადაშ ფორმატით, ნამუშ ფინალური ჯილდო რე 45,6 მილიარდი ვონა (38,5 მილიონი USD). 2021 წანაშ 17 ეკენიას, იმანჯჷ სერიალიშ მოსოფელიშ პრემიერაქ პლატფორმას Netflix.

სიუჟეტი[რედაქტირაფა | წყუშ რედაქტირაფა]

ოთხოშ ჟარნეჩდოვითაამშვი ადამიერი, ნამუეფსჷთ ფინანსური პრობლემეფი უღჷნა, ღებულენა კათაფაშ მოწვიებას გინოსქილადაშ ფორმატიშ ფულირ ლაჸაფიშა, ნამუშ გომორძგვილი ღებულენს 45,6 მილიარდ ვონას (38,5 მლნ ააშ დოლარი). მარა ლაჸაფიშ გუნაკვათა ოღურალეთ მაღალი რე^[1]^[2].

არტისტეფი დო პერსონაჟეფი[რედაქტირაფა | წყუშ რედაქტირაფა]

თარი პერსონაჟეფი[რედაქტირაფა | წყუშ რედაქტირაფა]

ლი ჩონ ჯე — სონ კი ჰუნი (№ 456), მანქანაშ მაჸონაფალი დო მოლაჸაფე. ცხოვრენს მოხუცებულ დიამუშწკჷმა ართო დო ოცადჷ მუში ცირასქუაშ კა იონიშ ფინანსურ უნარღელჸუას. ლაჸაფის ოკათუ, კრედიტორეფშე ეჭოფილი ვალეფიშ გასურებელო.
პაკ ჰე სუ — ჩჰო სან ვოო (№ 218), საჰოლდინგე კომპანიაშ საინვესტიციე ბუნაშ მადუდე. კი ჰუნიშ მაჸალე დო ჭკვერი სტუდენტი, ნამუქჷთ გათჷ სეულიშ უნივერსიტეტი. პოლიცია გორუნს სან ვოოს კლიენტეფიშ ფარაშ ხირუაშ გეშა.
ჩონ ჰო იონი — კან სე ბიოკი (№ 067), ახალნორდი გინორაილი ოორუე კორეაშე, ნამუთ ფარას ოხვილუ შქამალშო ობჟათე კორეას დიამუშიშ ოგორალო, ნამუთ სინანდულეს დოსქილადირი რე ოორუე კორეას.
ო იონ სუ — ო ილ ნამი (№ 001), ბადიდი დუდიშ ტვინიშ კიბოთ, ნამუთ ისხუნუანს ლაჸაფის, ვინდარო რჩქვანელობურ რინას ღურაშ უჯინასჷნ.
ჰო სონ თე — ჩან დოკ სუ (№ 101), განგსტერი, ნამუქჷთ კაზინოს ქვერსემი ფარა წაგჷ დო კრედიტორეფიშ ვალქ ქეგიადჷ.
ანუპამ ტრიპატი — ალი აბდული (№ 199), გასტარბაიტერი პაკისტანიშე. ლაჸაფის აკათუ, მუში ჩილიშ დო ართ წანერი ქომოლსქუაშ ფინანსური უნარღელჸუაშო.
კიმ ჯუ რიონი — ჰან მი ნიო (№ 212), ისტერიული დო ოღრაში ოსური, ნამუსჷთ მუშ დუდშა დაღარი ხვალეხე ნანა უჯოხო.
ვი ჰა ჯუნი — ჰვან ჩუნ ჰო, ახალნორდი პოლიციაშ ოფიცერი, ნამუთ ლაჸაფის აკათუ მუში დინაფილი ჯიმაშ ოგორალო.

მაჟირახარისხამი პერსონაჟეფი[რედაქტირაფა | წყუშ რედაქტირაფა]

ლაჸაფიშ მაკათურეფი[რედაქტირაფა | წყუშ რედაქტირაფა]

იუ სონ ჯუ — პიონ კი (№ 111), ექიმი, ნამუთ გეჸვენჯი ლაჸაფეფიშ გეშა ინფორმაციაშ მანგიორშა ფულირო წოროხანდენს კორუმპირაფილ მათხილეეფიშ ბუნაწკჷმა, ნამუეფჷთ ღურელი მოლაჸაფეეფიშ ორგანოეფით ვაჭრენა.
ლი იუ მი — ჩი იონი (№ 240), ახალნორდი ძღაბი, ნამუქჷთ ასერდე გითორთჷ ციხეშე, ნამუთ აგრესორი მუმაშ ჸვილუაშ გეშა ხედჷ.
კიმ სი ჰიონი — (№ 244), პასტორი, ნამუთ ლაჸაფიშ ბორჯიშ კჷნ ღებულენს ღორონთიშ რწუმას.
ლი სან ჰი — (№ 017), მესარკე 30-წანიანი სტაჟიშ ხანდათ სარკეშ ქარხანას.
კიმ იუნ თე — (№ 069), მოლაჸაფე, ნამუთ ლაჸაფის ოკათჷ ჩილწკჷმა ართო, ნამუშ ნომერი რე 070.
ლი ჯი ჰა — (№ 070), მოლაჸაფე, ნამუთ ლაჸაფის ოკათჷ ქომონჯწკჷმა ართო, ნამუშ ნომერი რე 069.
კვაკ ჯა ჰიონი — (№ 278), მოლაჸაფე, ნამუთ აკათუ დოკ სუშ ბუნას დო ირჯებუ მუჭოთ ამბეშ გილმაღალარი.
კრის ჩანი — (№ 276), მოლაჸაფე, ნამუთ აკათუ დოკ სუშ ბუნას თოკიშ გინორჯგინაშ ლაჸაფიშ ბორჯის.